Փաստ ինֆո

ԶԼՄ-ների մասին նոր օրինագիծը պետք է հանվի շրջանառությունից, որովհետև այն ուղիղ սպառնալիք է ոչ միայն լրագրողի մասնագիտական գործունեությանը, այլ նաև խոսքի ազատությանը,- «Փաստինֆո»-ի հետ զրույցում հայտարարել է Խոսքի ազատության պաշտպանության կոմիտեի նախագահ Աշոտ Մելիքյանը։

Հիշեցնենք, որ «Իմ քայլը» խմբակցության մի խումբ նախկին լրագրող պատգամավորներ առաջարկում են «Զանգվածային լրատվության մասին» օրենքում փոփոխություններ կատարել, որով սահմանափակվում է տեղեկատվության ազատությունը, այն է՝ արգելվելու է հղում կատարել անանուն աղբյուրներին:

«Այն իրավիճակը, որ ստեղծվել է լրատվական դաշտում, այն է՝ անանուն աղբյուրների հանգամանքը չարաշահելու պրակտիկան, որի հետևանքով դաշտում մանիպուլյացիաներն ու ֆեյք լուրերը դոմինանտ են դառնում, որոշ ուժերի ստիպել է այսօրինակ նախագիծ մշակել: Իհարկե, ոլորտում նմանօրինակ լուրջ խնդիր կա, ոչ ոք դա չի հերքում կամ բացառում, բայց սա չի նշանակում, որ իշխանությունները պետք է այս մեթոդով լուծեն հարցը: Սրանով նրանք տաշտի միջից թափում են ոչ միայն ջուրը, այլ նաև երեխային են գցում, այսինքն, խնդիրն, իբր լուծելու համար, նրանք խոչընդոտում են առհասարակ լրագրության, ընդ որում՝ դասական լրագրության գործունեությունը: Բերենք օրինակ՝ առանց փակ աղբյուրին հղում տալու, ուղղակի անհնար է հետաքննական լրագրություն իրականացնել: Առանց փակ աղբյուրների հնարավոր չէ հանրային կարևորության ինֆորմացիա ձեռք բերել՝ չհարգելով այդ տեղեկատվությունը տրամադրողին: Հետաքննական լրագրությամբ զբաղվողները շատ լավ գիտեն, երբ աղբուրը չափազանց կարևոր հանրային նշանակության տեղեկատվություն է տրամադրում, նա դա անում է մի պայմանով իր անունը չպետք է հրապարակվի: Հետևաբար, այս ամենն անտեսել կամ, ուղղակի դրանց վրայով անցնել չի կարելի»,- ասաց նա:

Հարցին, արդյո՞ք նոր օրենքի շրջանառությամբ իշխանությունը նպատակ է հետապնդում, ուղղակիորեն, ճնշումներ գործադրել մամուլի և ազատ խոսքի տարածման իրավունքի վրա՝ Աշոտ Մելիքյանը պատասխանում է՝ այսօրինակ օրենքի ընդունմամբ, այո, իշխանությունն անհիմն սահմանափակումներ կիրառելու փորձ է անում, որն անմիջականորեն տարածվելու է մամուլի ազատ և անխափան աշխատանքի վրա:

Եզրափակելով զրույցը, «Խոսքի ազատության պաշտպանության կոմիտե»-ի ղեկավարն ընդգծում է՝ ոլորտի պատասխանատուներն անելու են հնարավոր ամեն ինչ, որպեսզի նախագիծն օրենքի ուժ չստանա և շրջանառության մեջ չմտնի, հակառակ պարագայում, գործ կունենանք ոլորտի անօրինակ հետընթացի և լրագրության մասնագիտական որակի կտրուկ անկման հետ, ինչն անթույլատրելի է:

Հեղինակ՝ Նվարդ Մանվելյան

Աղբյուր` Փաստինֆո