Փաստ ինֆո

Իշխանության եկած մարդկանց թվացել է, թե միայն պաշտոնների, աթոռների, աշխատասենյակների զբաղեցումն է կարևոր և մնացած գործը հենց այնպես հալած յուղի նման անցնելու է։ Այս մասին «Ձայն հայրենյաց»-ի հավաք-քննարկման ժամանակ ասաց ՀՀ պաշտպանության նախկին նախարար, գեներալ-գնդապետ Սեյրան Օհանյանը։

«Հաջողությունների հասնելու համար զօր ու գիշեր աշխատել է պետք և որպեսզի աշխատանք ցույց տային, փորձեցին հնի և նորի համեմատություն անել։ Վտանգի պահին մենք միասնական ենք, բայց խաղաղ պայմանները ոչ միշտ է, որ օգտագործել ենք հետագա վտանգներին դիմագրավելու համար։ Այնուամենայնիվ այս 30 տարվա պատմությունը նախկին ժամանակահատվածներից նրանով է տարբերվում, որ կառուցել ենք պետություն,իշխանության տարբեր թևերը, անվտանգային համակարգը լավ, թե վատ ինչ-որ առաջ էին ընթանում։ Եթե այսօր մեր իշխանավորներն ինչ-որ հաջողության են հասնում, ապա դա նախկինում ձեռք բերված գոնե միջին հատվածներում այն քրտնաջան աշխատողների, հայրենիքի նվիրյալների աշխատանքի արդյունքում է»,-ասաց Սեյրան Օհանյանը։

Գեներալ-գնդապետի խոսքով ներկայիս իշխանությունները փոխեցին պետության կառուցվածքը և մի շարք կարևոր ոլորտներ, այդ թվում գյուղատնտեսությունը, էներգետիկ համակարգը, ենթարկեցրին երկրորդական և անփորձառու մարդկանց, ինչի հետևանքով այդ ոլորտներում չունեցանք հաջողություններ։

Սեյրան Օհանյան նկատեց՝ բյուջեի բաշխումը, պարգևատրումների համակարգը խոսում է այն մասին, որ առանց հաջողություններ գրանցելու մարդիկ իրենց պարգևատրումներ են նշանակում․ «Պարգևավճարը նման է մեդալի կամ շքանշանի և ամեն ամիս ինքդ քեզ ներկայացնես շքանշանի, ոչ թե սխալ է կառավարման առումով, այլև բարոյականությունից դուրս է։ Ուսուցիչներից, բժիշկներից և զինվորականներից բացի կառավարման համակարգում, որտեղ ոչ մի հաջողություն չկա, ոչ մեկ իրավունք չունի այդ պարգևավճարները ստանա»,-նշեց Սեյրան Օհանյանը։

Աղբյուր` Փաստինֆո