Փաստ ինֆո

«Ո՞ւր է կորել սպայի պատիվը: Դեռևս հունվարի 28-ին՝ Հայոց բանակի հիմնադրման առթիվ արված շնորհավորական գրառմանս մեջ, նույն հարցն եմ բարձրացրել, ի վերջո՝ որտե՞ղ է կորել հայ սպայի պատիվը: Միակ բանը, որ հիմա կարող եմ մաղթել հայկական բանակին՝ սպայի կորցրած արժանապատվության վերականգնումն է: Ասում են չէ՞ չկա զինվոր, ով չի ցանկանա դառնալ գեներալ, սական շատ եմ ցավում, որ սեպտեմբերի 27-ից ցայսօր, մենք չունենք գեթ մեկ գեներալ, ով կերազեր դառնալ սպարապետ Վազգեն»,- ասում է քաղաքագետ Թևան Պողոսյանը, «Փաստինֆո»-ի հետ զրույցում անդրադառնալով շրջանառվող տեղեկությանը, թե բանակի կազմավորման օրվա առիթով, ՀՀ-ում վարչապետ աշխատող անձի Պաշտպանության նախարարություն կատարած այցն ավարտվել է մեծ խռովությամբ:

Հիշեցնենք, որ Բանակի օրը՝ հունվարի 28-ին ՀՀ զինված ուժերի կազմավորման 29-րդ տարեդարձի կապակցությամբ Նիկոլ Փաշինյանն այցելել էր Պաշտպանության նախարարություն, որտեղ հանդիպել էր Զինված ուժերի բարձրագույն սպայակազմին: Մամուլում շրջանառվող լուրերի համաձայն, հանդիպումը հարթ չի ընթացել։ Հիմնական հանդիպումի ավարտից հետո տեղի ունեցած առանձնազրույցի ընթացքում, Փաշինյանը պատերազմում պարտության հետ կապված մեղադրանքներ է հնչեցրել, որոնք ուղղված են եղել ՊՆ բարձրագույն սպայակազմին, ինչից ԶՈՒ Գլխավոր շտաբի պետ Օնիկ Գասպարյանը վրդովվել է։ Նա հայհոյել է, դուռը խփել և դուրս եկել սենյակից։

Քաղաքագետ Թևան Պողոսյանը վստահ է՝ եթե անգամ ոչ մոտ ապագայում, ապա մի օր, անպայման, լինելու է հատուկ հանձնաժողով, որը քննելու է պարտված պատերազմի բոլոր հանգամանքներն, այդ թվում՝ բացահայտելու է նաև պատերազմի պարտության բոլոր իրական մեղավորներին: Վերջինս հույս է հայտնում, որ Հայաստանի Հանրապետության Արդարադատության համակարգն այնպիսի բարձրության վրա կլինի, որ նրա հարուցած վճիռները հանրության մեջ կասկածներ չեն հարուցի:

Անդրադառնալով ՊՆ-ում կայացած փակ հանդիպման ընթացքում Փաշինյանի որդեգրած վարքագծին, քաղաքագետը նկատում է՝ նոյեմբերի 10-ի ուշ գիշերվանից սկսած, էլ ում ասես, որ չի մեղադրել Փաշինյանը՝ բոլորին սևացնելով պատերազմում տարած պարտության համար. «Պարտության մեջ իր բաժին մեղքը նկարագրելիս նա հայտարարում է՝ ես եմ ստեղծված իրավիճակի միակ պատասխանատուն, բայց մեղավորը ես չեմ, հետևաբար, մինչ օրս, նա մեղադրել է հնարավոր ու անհնար բոլորին, բացի, իհարկե, իրենից: Սկզբում մեղավոր էին զինվորները, որ լավ չէին կռվել, հետո, երբ պարզվեց, որ իրական հերոսապատումներ կան և դրանք հերքելն ուղղակի անհնար է, մեղավոր դարձան հրամանատարները, որ իբր սխալ հրամաններ էին տվել:

Հետո մեղավոր դարձավ ժողովուրդը, որ չգնաց ու չկամավորագրվեց և մենք կորցրեցինք Շուշին: Իրավիճակն այ աստիճանի աբսուրդի հասավ, որ սկսեցին մեղադրել ընդհուպ քաղաքական կոնկրետ գործիչի, որ՝ այ, եթե նա գնացած լիներ ուղիղ Շուշի, Շուշին չէր ընկնի: Հիմա, ինչպես տեսնում ենք, մեղավոր է զենքի առք ու վաճառքում թաթախված անձը, ում ԱԱԾ-ն բոլորովին վերջերս բերման է ենթարկել, և ստացվում է, որ հիմա էլ զենքներն են հնամաշ ու ժամկետանց եղել ու այսպես շարունակ: Այսքանից հետո, բնականաբար, բոլորովին պատահական չէ, ես կասեի նույնիսկ սպասելի, որ ինչ - որ պահից մեղքը պետք է բարդվեր բանակի բարձրաստիճան սպաների վրա: Այնպես որ, այս զրույցը ես կուզենայի եզրափակել ճիշտ այն տեղում, որտեղից սկսեցի այն՝ մաղթում եմ, որպեսզի Հայոց բանակի բարձրաստիճան սպաները գտնեն իրենց կորցրած արժանապատվությունն ու ամեն ինչ իր տեղը կընկնի՝ իրական մեղավորներն էլ ջրի երես դուրս կգան»,- ամփոփելով զրույցն, ասում է քաղաքագետ Թևան Պողոսյանը:

Հեղինակ՝ Նվարդ Մանվելյան

Աղբյուր` Փաստինֆո