Փաստ ինֆո

Խորհրդարանը 98 կողմ, 8 դեմ ձայների հարաբերակցությամբ երկրորդ ընթերցմամբ և ամբողջությամբ ընդունեց «Սոցիալական աջակցության մասին» օրենքում փոփոխությունների վերաբերյալ նախագիծը։

ԱԺ «Լուսավոր Հայաստան» խմբակցության պատգամավոր Անի Սամսոնյանը նշեց, որ սոցիալական ապահովության ծառայության ոլորտում այս նախագիծը համարում են հիմնարար։

ՀՀ աշխատանքի և սոցիալական հարցերի նախարար Մեսրոպ Առաքելյանն ասաց, որ կարևորում են ոչ միայն կառույցի ստեղծումը, այլև բովանդակային փոփոխություններ․ «Առաջիկայում կներկայացվի հաշմանդամություն ունեցող անձանց նոր օրենքի քննարկումը, որն ամբողջությամբ փոխում է հայեցակարգը։ Ընտանեկան նպաստաների համակարգում նույնպես բարեփոխում է իրականացվելու, որտեղ ուղիղ ֆինանսական աջակցությունը փոխարինվելու է մարդկանց աշխատանքի խրախուսմամբ»,-նշեց նախարարը։

ԱԺ առողջապահության և սոցիալական հարցերի մշտական հանձնաժողովի նախագահ Նարեկ Զեյնալյանն էլ ասաց, որ մինչ այժմ գործել է սոցիալական պաշտպանության ոլորտի 4 առանձին մարմին, ինչը բնակիչներին շփոթմունքի մեջ է գցել․ «Այս 4 կառույցները միավորվում են մեկ կառույցում՝ միասնական սոցիալական ծառայության մեջ և սրա արդյուքնում մենք կունենանք սոցիալական կարիքների գնահատման միասնական համակարգ և վստահ եմ որ այս ոլորտում արդյունավետությունը կբարձրանա»,-ասաց Զեյնալյանը:

Աղբյուր` Փաստինֆո