Փաստ ինֆո

Ինձ հետաքրքիր է՝ այս նախագծերի հրատապ քննարկման անհրաժեշտությունն ինչո՞վ է պայմանավորված։ Այս մասին ԱԺ արտահերթ նիստի ժամանակ ասաց «Լուսավոր Հայաստան» խմբակցության պատգամավոր Տարոն Սիմոնյանը՝ դիմելով ՀՀ արդարադատության նախարար Ռուստամ Բադասյանին։

«Եթե օրինակ Արցախի օկուպացված տարածքների դեօկուպացիայի օրենքի նախագիծ լիներ, կհասկանայի։ Բերեիք «Զենքի մասին» օրենքում փոփոխություններ կատարելու մասին նախագիծ, էլի կհասկանայի, որովհետև այսօրվա մեր առաջնահերթությունն անվտանգային խնդիրն է դարձել։ Գիտեք՝ դատական բարեփոխումների կողմնակից եմ, բայց առաջնահերթ կարգով արտահերթ նիստ հրավիրել այս հարցը քննարկելու համար, չեմ հասկանում»,-ասաց Տարոն Սիմոնյանը։

Ռուստամ Բադասյանը նշեց, որ առաջնահերթությունները տարբեր են լինում։ Ինչ վերաբերում է դատական օրենսգրքին, նախարարը նշեց, որ ԱԺ-ն բավական ծանրաբեռնված օրակարգեր է ունենում․ «Այս նախագիծն ավելի վաղ կարող էր մտնել օրակարգ։ Մենք 1․5 տարի է, ինչ քննարկում ենք դատական համակարգի ծանրաբեռնվածության հարցը, անընդհատ ասում ենք, որ կառավարությունն այդ միջոցառումներն իրականացնում է։ Հիմա մոտ ենք այդ հարցը լուծելուն, դրա համար էլ հրատապ է։ Դատական համակարգում ծանրաբեռնվածության հարցի լուծումն օրակարգային, առաջնային հարց է»,-ասաց Ռուստամ Բադասյանը։

Տարոն Սիմոնանը նկատեց՝ հիմա տարածաշրջանում և ՀՀ-ում արմատական փոփոխություններ են տեղի ունեցել և պետք է վերանայենք առաջնահերթությունները․

«Չեմ ասում դատական համակարգի փոփոխություններով մի զբաղվեք։ Դա պետք է, բայց եթե արտահերթ կարգով իմ նշած նախագծերը բերեիք, միանգամայն կողջունեի։ Սահմանամերձ տարածքներում խնդիրներ ունենք, զենքի ներկրման հետ կապված կարգավորման անհրաժեշտություն ունենք, բանակ կառուցելու նոր խնդիր ունենք և այս ամեն ինչն օրենքի մակարդակով պետք է անենք, բայց դա թողած այն առաջնահերթություններն ենք առաջ բերում, որ մեկ-երկու տարի առաջ էր»,-նշեց պատգամավորը։

Աղբյուր` Փաստինֆո