Փաստ ինֆո

Մեզ համար անհասկանալի են  բոլոր այն զարգացումները, որոնք տեղի են ունենում Սյունիքում: Այս մասին «Փաստինֆո»-ի հետ զրույցում ասել է ԲՀԿ քարտուղար Արման Աբովյանը:

«Այսօր ադրբեջանական զինված ուժերը վերահսկում են դեպի հարավ ՀՀ ճանապարհը, թե ինչ պատճառաբանություն կբերի իշխանությունը, դա բնավ կապ չունի: Շուռնուխի կեսն անցել է թշնամուն, Որոտանի գլխին դիրքավորվել են ադրբեջանական զորքերը: Սա բացահայտ ցույց է տալիս, որ շատ ահավոր վտանգավոր իրավիճակ է: Չեմ ուզում խուճապ տարածել, բայց թուրքը արդեն Հայաստանի տարածքում է»,-ասաց Աբովյանը:

Պատգամավորի խոսքով՝ հակառակորդի սադրանքները շարունակվելու են այնքան ժամանակ, քանի դեռ Հայաստանի անվտանգային համակարգ չի ձևավորվել.
«Այն իշխանավորներին, որոնք լուրջ դեմքով պնդում են, որ Սյունիքի անվտանգությունը ապահոված է, կոչ եմ անում գնալ և երկու ամիս ապրել Շուռնուխում կամ Որոտանում»:

Պատգամավորը վստահեցնում է, քանի ՀՀ-ն չունի խորքային անվտանգային համակարգ, իսկ իշխանությունը չի գնահատում վտանգները, պատերազմի վերսկսման հավանակություն կա.

«Պետք է այս գաղափարի վրա հիմնվել, ոչ թե՝ սուտ խաղաղասիրական, սորոսածին գաղափարներով առաջնորդվել, թե՝ եկեք բոլորս բարեկամանանք: Ու՞մ հետ եք բարեկամանալու, թուրքի՞»,-մեզ հետ զրույցում իր անհանգստությունը հայտնեց  Արման Աբովյանը:

Աղբյուր` Փաստինֆո