Փաստ ինֆո

ՀՀ պաշտպանության նախարարությունը ՀՀ կառավարության դաշտ է վերադարձրել իր ուղղությամբ նետված գնդակը՝ ի ցույց դնելով, որ Նիկոլ Փաշինյանի աշխատակազմը՝ նախկին ղեկավար Էդուարդ Աղաջանյանի գլխավորությամբ, չի տիրապետում իրավիճակին կամ էլ գիտակցաբար է լրատվամիջոցներին տրամադրում կեղծ տեղեկատվություն։ Բացի այդ՝ հավելյալ ապացույցներ է ներկայացրել, որ Սյունիքում ու Գեղարքունիքում տեղի է ունեցել ոչ թե սահմանազատում, այլ դիրքերի հանձնում՝ ի հեճուկս ՀՀ տարածքային ամբողջականության։

Այսպես՝ «Փաստինֆո»-ի հարցումներին ի պատասխան ՀՀ կառավարությունը փորձել էր պատասխանատվությունը բարդել ՀՀ զինված ուժերի վրա՝ նշելով, թե՝ «Այս պահին պետական սահմանի երկայնքով մարտական հերթապահություն իրականացնելու նպատակով զինված ուժերի կամ սահմանապահ զորքերի տեղակայումն անմիջականորեն կամ միջնորդավորված բանակցվում է զինված ուժերի ներկայացուցիչների միջև՝ զինված ուժերի կողմից օգտագործվող տեղագրական քարտեզների վրա։ Ու հերքել ՊՆ-ի հայտարարությունը, որ Հայաստանի պետական սահմանի սահմանազատման և սահմանագծման ոլորտում աշխատանքները կազմակերպելու նպատակով ստեղծվել է միջգերատեսչական խումբ։

«ՀՀ պետական սահմանի սահմանազատման և սահմանագծման ոլորտում աշխատանքները կազմակերպելու նպատակով միջգերատեսչական աշխատանքային խումբ ստեղծելու մասին ՀՀ կառավարության որոշում չի ընդունվել»,- հունվարի 14-ի գրությամբ հայտնել էր Էդուարդ Աղաջանյանը։ Մինչդեռ, պարզվում է, որ նման աշխատանքային խումբ իրականում կա, որի կազմն անգամ փոխվել է ՀՀ վարչապետի 2020 թվականի դեկտեմբերի 30-ի որոշմամբ։

ՊՆ-ն տարածել է կեղծ տեղեկատվություն. Կառավարությունը պաշտոնապես հերքել է՝ սահմանազատման հարցերով աշխատանքային խումբ չի ստեղծվել

Ընդ որում, Նիկոլ Փաշինյանի աշխատակազմի արդեն նախկին ղեկավարի անգրագիտության կամ կեղծ տեղեկատվության տրամադրման մասին անուղղակի հայտարարել է ՀՀ պաշտպանության նախարարությունը, որին գրավոր հարցմամբ դիմել էինք պարզելու՝ ի վերջո սահմանազատումն իրականացվում է 1974 թվականի քարտեզի հիման վրա՞, թե ոչ։

Հիշեցնենք, որ նման հայտարարությամբ հանդես էր եկել ՀՀ Սյունիքի մարզպետ Մելիքսեթ Պողոսյանը։ ՊՆ-ն նշված հարցին պատասխանելու փոխարեն հակադարձել է կառավարությանը։ «ՀՀ պետական սահմանի սահմանագծման եւ սահմանազատման ոլորտում աշխատանքները համակարգող մարմին է հանդիսանում ՀՀ վարչապետի դեկտեմբերի 30-ի N1453-Ա որոշմամբ, շահագրգիռ պետական մարմինների ներգրավմամբ ստեղծված աշխատանքային խումբը»։

Ուսումնասիրելով որոշումը, նկատեցինք, որ դրանով Փաշինյանն ըստ էության փոփոխություն է կատարել շուրջ 20 տարի առաջ ընդունված որոշման մեջ. «Հայաստանի Հանրապետության վարչապետի 2000 թվականի նոյեմբերի 16-ի «Հայաստանի Հանրապետության պետական սահմանի սահմանագծման և սահմանազատման հանձնաժողով ստեղծելու մասին» N 763 որոշմամբ հաստատված հանձնաժողովի 1-ին կետը շարադրել հետևյալ խմբագրությամբ....»,- կարդում ենք Փաշինյանի N1453-Ա որոշման մեջ, որով, ըստ էության, թարմացվել է հանձնաժողովի կազմը։

Նկատենք, որ Հայաստանը սահմանային վեճեր է ունեցել եւ ունի Վրաստանի հետ, որի համար էլ 20 տարի առաջ ստեղծվել էր հանձնաժողովը, որը տեւական ժամանակ գործել է արտգործնախարարի տեղակալ Շավարշ Քոչարյանի ղեկավարությամբ, իսկ նրա հրաժարականից հետո Նիկոլ Փաշինյանի 2020 թվականի դեկտեմբերի 30-ի որոշմամբ հանձնաժողովի նախագահ է նշանակվել ՀՀ արտաքին գործերի նախարարի տեղակալ Ա.Ապիտոնյանը։

Չգիտե՞ր արդյոք այս մասին Էդուարդ Աղաջանյանը, որը ստորագրել է ակնհայտ կեղծ տեղեկատվություն պարունակող պաշտոնական փաստաթուղթ, թե գիտակցաբար է ստել, քանի որ այդպիսով ապացուցվում է, որ առանց համապատասխան հանձնաժողովի որոշման զինված ուժերի գլխավոր հրամանատարի կարգավիճակում հանդես եկող Նիկոլ Փաշինյանի բանավոր հրահանգներով, ՀՀ զինված ուժերը նահանջել են ՀՀ դիրքերից՝ թույլ տալով թշնամի պետության զինված ուժերին առաջխաղացում ունենալ՝ վտանգելով մի կողմից Վարդենիսի, մյուս կողմից Սյունիքի բնակչության անվտանգությունը։ Այս հարցի պատասխանը պետք է տա նախաքննական մարմինը։

Նշենք, որ ՀՀ ՊՆ ուղարկված հարցմամբ խնդրել էինք նաեւ պարզաբանել, թե որ թվականի տեղագրական քարտեզներն են օգտագործում զինված ուժերի տեղակայման համար, որեւէ իրավական ակտով հաստատվել է զորքերի տեղակայումը նոր տեղանքում, երբ եւ ում կողմից, ինչին ՊՆ-ն բավական ուշագրավ պատասխան է տվել.
Նախարարությունից պատասխանել են.

«Զինված ուժերում տեղագրական քարտեզները կիրառվում են համաձայն «Գեոդեզիայի և քարտեզագրության մասին» ՀՀ օրենքի 15-րդ հոդվածի, ՀՀ կառավարության 2011 թվականի սեպտեմբերի 29-ի N1441-Ն որոշման և պաշտպանության բնագավառի կարգավորվող ակտերով»։

Իսկ 15-րդ հոդվածն ամրագրում է, որ գեոդեզիական և քարտեզագրական գործունեության իրականացումը ՀՀ պաշտպանության և անվտանգության ապահովման նպատակներով իրագործում են պաշտպանության և գեոդեզիայի ու քարտեզագրության պետական կառավարման լիազորված մարմինները: Այդ մարմինների իրավասությունը վերոնշյալ բնագավառում որոշում է Հայաստանի Հանրապետության կառավարությունը:

2011 թվականի համապատասխան որոշման մեջ նշված է, որ ՀՀ տարածքում քարտեզագրության, գեոդեզիայի, չափագրման և հողաշինարարության աշխատանքները ներառում են՝ պետական և ոչ պետական նշանակության տեղագրական, կադաստրային և թեմատիկ քարտեզների և հատակագծերի ստեղծման նպատակով կատարվող աշխատանքներ։ Դրանք միտված են իրականացնելու հողամասերի, շենքերի, շինությունների չափագրման, հողաշինարարական աշխատանքներ և չեն նախատեսում դիրքերի զիջում Ադրբեջանին։ 

Ի դեպ, դրանք ներառված են «Գույքի նկատմամբ իրավունքների պետական գրանցման մասին» Հայաստանի Հանրապետության օրենքում փոփոխություն կատարելու մասին» ՀՕ-247-Ն օրենքի 3-րդ հոդվածի 1-ին կետի պահանջներում։

Փաստացի, նախարարությունը կրկին մեջբերում է որոշումներ, որով հստակ երևում է, որ գերատեսչությունները մոլորվել են իրենց իսկ պատճառաբանություններում, այս անգամ էլ փաստելով, որ օրենքով սահմանված կարգով որևէ իրավական ակտ չի հաստատվել՝ այս կամ այն տեղագրական քարտեզի հիման վրա զորքերի տեղակայում իրականացնելու համար։

Այլ խոսքով, միայն մեր հարցումներին ի պատասխան պետական մարմինների տված պատասխանները բավարար են ապացուցված համարելու, որ տեղի է ունեցել հանցագործություն՝ պետության անվտանգության դեմ, որն առ այսօր շարունակվում է եւ այն կանխելու ուղղությամբ ՀՀ գլխավոր դատախազը պարզապես ոչինչ չի ձեռնարկում՝ կատարելով հանցագործությունն անարգել ավարտին հասցնելն ապահովելու իր դերակատարումը։

Աղբյուր` Փաստինֆո