Փաստ ինֆո

Դեպի Ռուսաստան չվերթների տոմսերը շուրջ երեք անգամ թանկացել  են, սակայն փետրվարի 1-ի չվերթի համար տոմսերն արդեն սպառվել են։ Ընդ որում՝ ամրագրումները հիմնականում կատարվում են միակողմանի, այսինքն ՀՀ քաղաքացիները ՌԴ են մեկնում առանց վերադարձի ծրագրերի։

Ինչպես արդեն հայտնել ենք՝ ՌԴ-ն մեկ ամիս ժամանակով բացել է սահմանները ՀՀ քաղաքացիների համար՝ սահմանելով օդային  հաղորդակցության 20 անցակետ։ Պարզվում է լուրն սպասված էր  ՀՀ մի շարք քաղաքացիների համար, քանզի պաշտոնական այդ հայտարարությունը, կարծես թե, մեծ ոգևորությամբ են ընդունել։  Շատերին անգամ չի անհանգստացնում, որ ավիատոմսերի արժեքը գրեթե եռակի աճել է։ Ավիաընկերությունների  զանգերն էլ արդեն քանի օր է չեն դադարում։

«Բելավիասերվիս» ընկերությունից «Փաստինֆո»-ին տեղեկացրեցին, որ զանգերն այնքան շատ են, որ այդ տեղատարափի պայմաններում հնարավոր չէ մոտավոր ճշտել մեկնողների թիվը։  Քաղաքացիներին հիմնականում  հետաքրքրում է դեպի Մոսկվա ուղղությունը, տոմսերն էլ միակողմանի են ամրագրում։

«Մարդկանց հետաքրքրում է դեպի Մոսկվա թռիչքները, ամրագրումներն արդեն իրականացվում են։ Զանգերն էլ կանխատեսվածից կարծեք թե ավելի շատ են։ Մինչև այժմ ամրագրվածները հետադարձով չեն»,- նշեց ընկերության գործավարուհին։

«Նովէյր» ՍՊԸ-ից էլ հայտնեցին, որ վաճառքի մեկնարկն արդեն երեք օր է տրված է՝ միայն արժեքներն են փոփոխվել։

«Իհարկե, գները բարձր են։ «Ռեդն» այսօր 160 հազար է տալիս ամսի 8-ի համար։ «Ուրալ»ն էլ մոտավոր այդ արժեքներով է տալիս։ Արժեքները 60 հազարից այդքան աճել են։ Թռիչքները կիրականացվեն փետրվարի մեկից»։

Ավիաընկերություններից «Ռեդվինգս»-ն էլ արդեն սպառել է փետրվարի մեկի համար նախատեսված տոմսերը։ Մեծամասամբ, ՌԴ մայրաքաղաքի ուղղությամբ, ամրագրված են արդեն փետրվարի 2-ի  թռիչքների համար  նախատեսված տոմսերը։ Ավիաընկերությունից հայտնեցին, որ՝ ուղեբեռով տոմսի արժեքը 282 հազար դրամ է, այդ արժեքով տեղերից միայն մեկ չամրագրած տեղ է մնացել։

«Քաղաքացիներն անվերջ զանգահարում են։ Նրանցից  ոմանք  ամրագրում են, ոմանք գնում են, մի մասն էլ՝ պարզապես գներն են ճշտում։ Երեք օր է ահավոր ծանրաբեռնված ենք»,- նշեց օպերատորը։

Տոմսերի հանդեպ մեծ պահանջարկի պատճառով «Աէրոֆլոտ»ի գները վերջին օրերին ևս բարձրացել են 2-2,5 անգամ։

Հիշեցնենք, որ Հայաստանի և Ռուսաստանի միջև ավիահաղորդակցությունը կասեցվեց 2020–ի մարտին՝ կորոնավիրուսի համավարակի հետ կապված։ Բացառություն էին քաղաքացիներին հայրենիք վերադարձնելու նպատակով կազմակերպվող հատուկ չվերթերը։

2021 թվականի փետրվարի 1-ից մինչեւ մարտի 1-ը ՀՀ քաղաքացիները օդային ճանապարհով ՌԴ սահմանը կարող են հատել «Ճամփորդում եմ առանց COVID-19–ի» բջջային հավելվածի միջոցով կորոնավիրուսի թեստի բացասական արդյունքը ներկայացնելու դեպքում:

Աղբյուր` Փաստինֆո