Փաստ ինֆո

ԱԺ նախկին պատգամավոր Արագած Ախոյանի նկատմամբ քաղաքական հետապնդում է իրականացվում, նրա նկատմամբ կալավորումը որպես խափանման միջոց ընտրելու մասին միջնորդություն է ներկայացվել դատարան՝ նրան գոնե 72 ժամ անազատության մեջ պահելու համար։ Այս մասին «Փաստինֆո»-ի հետ զրույցում ասաց Արագած Ախոյանի պաշտպան Բենիկ Գալստյանը։

Ինչպես տեղեկացրել ենք՝ հունվարի 28-ին Փաշինյանի հրաժարականի պահանջով հայահավաք է իրականացվել, որի ընթացքում 21 անձ բերման է ենթարկվել ՀՀ քրեական օրենսգրքի 219-րդ հոդվածի հատկանիշներով՝ շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելու կամ դրանք պահելու կասկածանքով։ Նույն հոդվածի հատկանիշներով հարուցվել է քրեական գործ, որի շրջանակներում հինգ անձ ձերբակալվել է՝ Արագած Ախոյանը, Արշակ Զաքարյանը, Վահագն Չախալյանը, Տիգրան Չոբանյանը և Իսրայել Հակոբկոխյանը։ Վարույթ իրականացնող մարմինը նրանց մեղադրանք է առաջադրել՝ ՀՀ քրեական օրենսգրքի 34-219-րդ հոդվածի 2-րդ մասի 1-ին կետի՝ մի խումբ անձանց կողմից նախնական համաձայնությամբ շենք-շինություններ զավթելու փորձի հատկանիշներով։

Փաստաբան Բենիկ Գալստյանը «Փաստինֆո»-ի հետ զրույցում մանրամասներ ներկայացրեց՝ նշելով, որ Արագած Ախոյանը բերման է ենթարկվել 18։00-ին, իսկ երեք ժամն ավարտվելուց հետո դուրս են եկել քննչական վարչության տարածքից՝ նշելով, որ քննիչին դրսում կսպասեն, 45 րոպե անց ոստիկանության աշխատակիցը մոտեցել և տեղեկացրել, որ քննիչը խնդրում է մոտենալ։ Քննիչին մոտենալուց հետո ժամը 21։46-ին Արագած Ախոյանին ձերբակալել են՝ ՀՀ քրեական օրենսգրքի 34-219-րդ հոդվածի 2-րդ մասի 1-ին կետի կասկածանքով։ Փաստաբանի խոսքով՝ Արագած Ախոյանը կասկածանքը չի ընդունել, հայտարարել է, որ իր կարծիքով նշված գործողությունը քաղաքական նպատակներ է հետապնդում, ինքը մասնակցել է խաղաղ հավաքի և վերջ։

Ընդ որում՝ հատկանշական է, որ Ախոյանը բերման չի ենթարկվել, այլ՝ ոստիկանների հրավերով է ներկայացել։ Ուղղակի կատակել է ոստիկաններից մեկի հետ՝ Հրապարակի շատրվանների մոտ, ասել՝ ինձ չե՞ք ուզում տանեք, ոստիկանն էլ ասել է՝ գնանք, իսկ տանելուց հետո ձևակերպել են, որ կա քրեական գործ և բերման է ենթարկվել։ Ախոյանը ցուցմունք է տվել՝ ներկայացնելով իրավիճակը, սակայն քննիչի կողմից նրան ձերբակալելու մասին որոշում է կայացվել, որի դեմ պաշտպանը բողոք է ներկայացրել, որը մակագրվել է դատավոր Գրիգորյանին, սակայն նշանակված դատական նիստը հետաձգվել է, քանի որ քննիչը մեղադրանք է առաջադրել Արագած Ախոյանին և նրա նկատմամբ կալանավորումը որպես խափանման միջոց ընտրելու մասին միջնորդություն է ներկայացրել դատարան։

«Պարոն Ախոյանը նշեց, որ հետապնդումը քաղաքական է, ես էլ կարծիք հայտնեցի, որ նշված միջնորդությունը ներկայացնում են, որ հնարավոր լինի գոնե 72 ժամ անազատության մեջ պահել պարոն Ախոյանին, որովհետև ՀՀ քրեական դատավարության օրենսգրքի համաձայն՝ եթե ձերբակալման դեմ բողոք է ներկայացվում, բայց կալանքի միջնորդություն էլ են բերում, պետք է միաժամանակ քննարկվի»,- նշեց Գալստյանը՝ հավելելով, որ իրեն ներկայացվել են մոտ 200 թերթից բաղկացած նյութեր և տեսագրություններ՝ մոտ 3 ժամ տևողությամբ, ուստի դատարանից ժամանակ է խնդրել՝ նյութերին ծանոթանալու համար, սակայն խնդրել է նաև դատարանից Ախոյանի ձերբակալման որոշման դեմ բողոքը քննել առանձին, որ Ախոյանը չշարունակի գտնվել անազատության մեջ, ինչին դատարանը չի համաձայնել՝ ոչ թե դիտավորությամբ, այլ՝ օրենքը թույլ չի տալիս, սակայն դա կարող էր հետաքրքիր նախադեպ լինել։

Փաստաբանը նշեց, որ այսօր շարունակվել է դատական նիստը և համատեղ քննարկման ընթացքում, մասնավորապես, տեսագրությունների ուսումնասիրությունից պարզվեց, որ կալանքի միջնորդության մեջ քննիչը հղում է կատարում մոտ 4-5 տեսագրության, որոնք, ըստ էության ապացույց չեն, բայց դատարան ներկայացվել է մի տեսանյութ, որի զննությամբ չի նշում, որ Արագած Ախոյանը երևում է տեսանյութի մեջ, որ հեռվում կանգնած է, երեք անձի հետ քայլում է խաղաղ, չի նշում, որ շատրվանների մոտից Ախոյանը ոստիկանության աշխատակիցների՝ կարմիր բերետավորների հետ միասին քայլում ու նստում ոստիկանության ավտոմեքենայի մեջ։ Պաշտպանական կողմն էլ առաջարկել է քննել այն տեսագրությունները, որոնք ներկայացվել են դատարան, իսկ դատախազը ժամանակ է խնդրել՝ մնացած տեսագրությունները բերելու համար, ինչի պատճառով նիստն ընդմիջվել է։

Անդրադառնալով քննիչի կողմից ներկայացված միջնորդության հիմքերին՝ պաշտպանը նշեց, որ դրվել է գործի քննությանը խոչընդոտելու, թաքնվելու և նոր հանցանք կատարելու ռիսկերը։

Առաջադրված մեղադրանքի շուրջ Արագած Ախոյանը ցուցմունք տվել է՝ հայտնելով, որ մեղադրանքն աբսուրդ է և մեղադրանք, որպես այդպիսին չկա։ Գալստյանը հայտնեց, որ բացի այն, որ պաշտպանական կողմը մեղադրանքի փաստական կողմին համաձայն չէ, այլև՝ հոդվածն ինքնին որոշակի խնդիրներ ունի, մասնավորապես, մեղսագրվող արարքը հոդվածին չի համապատասխանում, իսկ մեղադրանքում կան նաև որոշակիության խնդիր։

Հեղինակ՝ Իզաբել Սահակյան

Աղբյուր` Փաստինֆո