Փաստ ինֆո

Սպորտի վաստակավոր վարպետ, բռնցքամարտիկ Իսրայել Հակոբկոխյանն առաջադրված մեղադրանքը չի ընդունում։ Այս մասին «Փաստինֆո»-ի հետ զրույցում ասաց փաստաբան Օնիկ Առաքելյանը։

Ինչպես տեղեկացրել ենք՝ հունվարի 28-ին Փաշինյանի հրաժարականի պահանջով հայահավաք է իրականացվել, որի ընթացքում 21 անձ բերման է ենթարկվել ՀՀ քրեական օրենսգրքի 219-րդ հոդվածի հատկանիշներով՝ շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելու կամ դրանք պահելու կասկածանքով։ Նույն հոդվածի հատկանիշներով հարուցվել է քրեական գործ, որի շրջանակներում հինգ անձ ձերբակալվել է՝ Արագած Ախոյանը, Արշակ Զաքարյանը, Վահագն Չախալյանը, Տիգրան Չոբանյանը և Իսրայել Հակոբկոխյանը։ Վարույթ իրականացնող մարմինը նրանց մեղադրանք է առաջադրել՝ ՀՀ քրեական օրենսգրքի 34-219-րդ հոդվածի 2-րդ մասի 1-ին կետի՝ մի խումբ անձանց կողմից նախնական համաձայնությամբ շենք-շինություններ զավթելու փորձի հատկանիշներով։

Փաստաբան Օնիկ Առաքելյանը մեզ հետ զրույցում նշեց, որ Հակոբկոխյանին ձերբակալելու որոշման դեմ բողոք է ներկայացվել, որով վիճարկվել է թե՛ հիմնավոր կասկածի, թե՛ ձերբակալության հիմքերի առկայության հարցը, սակայն բողոքի քննությունը հետաձգվել է, քանի որ վարույթն իրականացնող մարմինը միջնորդություն է ներկայացրել դատարան՝ Հակոբկոխյանի նկատմամբ կալանավորումը որպես խափանման միջոց ընտրելու մասին։ Պաշտպանական կողմը ժամանակ է խնդրել՝ միջնորդությանը պատշաճ ծանոթանալու համար, քանի որ պաշտպանական կողմին չէր տրամադրվել ոչ միջնորդությունը, ոչ էլ նյութերը։ Ներկայացված միջնորդությամբ քննիչը մատնանշել է կալանավորման հիմքերից գործի քննությունից թաքնվելու, նոր հանցագործություն կատարելու և ազդեցություն ունենալու ռիսկերը, իսկ թե ում վրա պետք է ազդեցություն ունենա՝ հայտնի էլ չէ։ Ընդ որում՝ փաստաբանը նկատեց՝ լրատվամիջոցները լուսաբանել են հայահավաքը, կան հրապարակված տեսանյութեր, որտեղ ամեն ինչ երևում է։

«Բոլորիս էլ հայտնի է, որ սա առնվազն քաղաքական հետապնդում է։ Փորձում են ակտիվ, հայրենասեր մարդկանց մեկուսացնել, որ հանգիստ կարողանան քնել»,- նշեց Առաքելյանը։

Առաջադրված մեղադրանքի շուրջ Հակոբկոխյանը ցուցմունք տվել է՝ նշելով, որ մեղադրանքը չի ընդունում, որևէ հանցագործություն կամ արգելված արարք չի կատարել, այլ՝ լինելով հայրենասեր ՀՀ քաղաքացի, մասնակցել է թույլատրելի հավաքին և իր անձնական կարծիքն է հայտնել առնվազն։

«Որևէ հակաօրինական արարք չի կատարվել իր կողմից, այդ ամենը տեսագրված է»,- նշեց փաստաբանը։

Ինչ վերաբերում է շրջանառվող լուրերին, թե դատական նիստի ընթացքում Հակոբկոխյանի ինքնազգացողությունը վատացել է, փաստաբանը հերքեց՝ նշելով, որ Հակոբկոխյանի առողջական վիճակը նորմալ է։

Հեղինակ՝ Իզաբել Սահակյան

Աղբյուր` Փաստինֆո