Փաստ ինֆո

Երևանի ընդհանուր իրավասության դատարանը՝ դատավոր Վահե Միսակյանի նախագահությամբ, բավարարել է ՀՀ երրորդ նախագահ Սերժ Սարգսյանի թիկնազորի նախկին պետ Վաչագան Ղազարյանի նկատմամբ համաներման հիմքով քրեական հետապնդումը դադարեցնելու հարցի քննարկումը հետաձգելու որոշման դեմ բողոքը։

Ինչպես ավելի վաղ տեղեկացրել ենք՝ Վաչագան Ղազարյանին նոր մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով։ Ըստ նախաքննական մարմնի՝ Ղազարյանը, պետական միջոցները սեփական ընտանիքի շահերին ծառայեցնելու և այդ ուղղությամբ սեփական միջոցներից լրացուցիչ ծախս չկատարելու անձնական շահագրգռվածությունից ելնելով, պաշտոնեական դիրքն օգտագործել է ծառայության շահերին հակառակ, այն է` ՀՀ ԱԱԾ պետական պահպանության ծառայության ավտոտնտեսության վարորդ Ս. Ա.-ին առաջարկել է պետական միջոցներից վարձատրություն ստանալով հանդերձ աշխատել որպես իր կնոջ և տան վարորդ: Ավելին՝ ըստ ՀՔԾ հաղորդագրության՝ Ս. Ա.-ն 2015-2018 թվականների ընթացքում վարորդի ծառայություններ է մատուցել Վ. Ղազարյանի կնոջը, ինչով պայմանավորված՝ հիշյալ ժամանակահատվածում ՀՀ ԱԱԾ պետական պահպանության ծառայության ավտոտնտեսությունում առհասարակ ծառայության չի ներկայացել և ծառայողական որևէ պարտականություն չի կատարել: Չնայած դրան` Պետական պահպանության ծառայությանը հատկացված միջոցներից այդ ընթացքում Ս. Ա.-ին որպես աշխատավարձ, պարգևատրում և իրային բավարարում փաստացի վճարվել է առանձնապես խոշոր չափի՝ 9.340.677 ՀՀ դրամ, որը Վ. Ղազարյանի կողմից ամբողջությամբ վերականգնվել է:

Արձանագրենք, որ, թեև գումարը վերականգնվել է, Ղազարյանն առաջադրված մեղադրանքը չի ընդունում, իսկ գումարը վճարել է միայն այն պատճառով, որ իրեն «հանգիստ» թողնեն։ Մեղսագրվող արարքի վրա համաներում է տարածվում և Ղազարյանը դեմ չի եղել, որ համաներում կիրառվի և քրեական հետապնդումը դադարեցվի, սակայն քննիչը դա դիտարկել է որպես միջնորդություն և հետաձգել դրա լուծումը, ավելին՝ քննիչը չէր նշել, թե ինչ հանգամանքներ պարզելու համար է հետաձգել այն, որևէ լուծում չկար։

Վաչագան Ղազարյանի պաշտպան Մհեր Հակոբյանը «Փաստինֆո»-ի հետ զրույցում նշեց, որ քննիչի գործողությունները բողոքարկել է դատախազին, որն էլ գրել է, թե միջնորդության քննարկումը հետաձգվել է՝ փաստաթղթերի իսկությունը պարզելու նպատակով։ Փաստաբանը քննիչի գործողությունը և դատախազի որոշումը բողոքարկել է դատարան. ինչը բավարարվել է։ Դատարանի որոշմանը փաստաբանը դեռևս չի ծանոթացել, սակայն նշեց բողոքն ամբողջությամբ բավարարվել է։

Ըստ փաստաբանի՝ համաներումը ենթակա է կիրառման և այստեղ հարցն այն է, թե ինչու քննիչը չի կիրառում և շարունակում է գործի քննությունը։ Փաստաբանը նշեց, որ նման նախադեպի չի հանդիպել, որ քննիչին հայտնի լինի համաներում կիրառելու հիմքեր, բայց քննիչը որոշի հետաձգել այդ հարցի քննարկումը՝ պարզելու, օրինակ, անձը հղի է, թե ոչ։ Այս պարագայում Վաչագան Ղազարյանը ներկայացրել ՊՆ-ի կողմից տրված վկայական՝ մարտական գործողություններին մասնակից լինելու մասին, իսկ քննիչը որոշել է պարզել՝ վկայականը սահմանված կարգով է տրվել, թե ոչ։ Փաստաբանը նշեց, որ նույն տրամաբանությամբ առաջնորդվելու դեպքում դատախազի որոշման վերաբերյալ պետք է դիմել գլխավոր դատախազին՝ պարզելու, թե արդյոք սահմանված կարգով է նա նշանակվել, թե ոչ։ Այլ խոսքով՝ քննիչը չի մերժել Վաչագան Ղազարյանի նկատմամբ համաներում կիրառելը, հետաձգել է՝ պատճառաբանելով, որ պետք է պարզի փաստաթղթի իսկությունը, բայց դրա փոխարեն շարունակում է քրեական գործի քննությունը և պարզում իր համար հետաքրքիր հանգամանքներ, մինչդեռ, փաստաբանի դիտարկմամբ, օրենքի համաձայն՝ եթե քննիչին հայտնի է հանգամանք, որը բացառում է քրեական հետապնդումը, ապա քննիչը պետք է կարճի գործի վարույթը և դադարեցնի քրեական հետապնդումը։ Ըստ փաստաբանի՝ քննիչն անգործություն է դրսևորել, ինչն էլ բողոքարկվել է դատարանում։

Դատարանի որոշումից հետո նախաքննական մարմինը մարմինը պետք է համաներում կիրառի Վաչագան Ղազարյանի նկատմամբ։

Հիշեցնենք, որ Վաչագան Ղազարյանի ու նրա կնոջ նկատմամբ նախկինում հարուցվել էին քրեական գործեր՝ ապօրինի հարստանալու, դրամական միջոցների իրական չափի մասին հայտարարագրման ենթակա տվյալները թաքցնելու, հարկերի վճարումից չարամտորեն խուսափելու դեպքերի առթիվ, բայց գործերն այդպես էլ դատարան չհասան եւ նախաքննության փուլում կարճվեցին՝ Վ.Ղազարյանի ու նրա կնոջ նկատմամբ դադարեցնելով քրեական հետապնդումը։
Հեղինակ՝ Իզաբել Սահակյան

Աղբյուր` Փաստինֆո