Փաստ ինֆո

ԱՀ ԱԺ նախկին պատգամավոր, ազատամարտիկ Վահան Բադասյանին մեղադրանք է առաջադրվել ՀՀ քրեական օրենսգրքի 301-րդ հոդվածի հատկանիշներով՝ իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերի համար։ Այս մասին «Փաստինֆո»-ի հետ զրույցում ասաց պաշտպան Արայիկ Պապիկյանը։

Ինչպես արդեն տեղեկացրել ենք՝ երեկ ԱԱԾ-ն բերման է ենթարկել, ապա՝ ձերբակալել Վահան Բադասյանին՝ Եռաբլուր զինվորական պանթեոնում իր կողմից արված հայտարարությունների համար։ Վերջինս հայտարարել է, որ Նիկոլ Փաշինյանը կործանել է բանակը և նրան պետք է հեռացնեն ոչ միայն որպես պարտության խորհրդանիշ, այլև թշնամի․

«Հեռացնելու տարբեր ճանապարհներ կան ընդհուպ ֆիզիկապես հեռացնելը։ Դա ենթադրում է, որ թշնամուն պետք է վերացնենք, թեկուզ զենքի ուժով։ Այո, ես գիտակցաբար սպառնալիքի կոչեր եմ անում, թող ԱԱԾ-ն ձերբակալի ինձ։ Ցանկացած մեկը պետք է ցանկանա թշնամուն ոչնչացնել։ Դա անհատները պետք է անեն։ Ես ինքս պատրաստ եմ դրան»,-ասել է Վահան Բադասյանը։

Փաստաբանը մեզ հետ զրույցում ասաց, որ Վահան Բադասյանի հայտարարությունների հիման վրա հարուցվել է քրեական գործ՝ ՀՀ քրեական օրենսգրքի 301-րդ հոդվածի հատկանիշներով, որի շրջանակներում Բադասյանը ձերբակալվել է։ Պաշտպանի փոխանցմամբ՝ Բադասյանը կասկածանքի շուրջ հրաժարվել է ցուցմունք տալ, իսկ երեկ երեկոյան վարույթն իրականացնող մարմինը մեղադրանք է առաջադրել նրան։

Վերջինս առաջադրված մեղադրանքի շուրջ ևս հրաժարվել է ցուցմունք տալուց, միայն հայտարարել է, որ չի ընդունում մեղադրանքը։

Պաշտպանը հայտնեց, որ վարույթն իրականցնող մարմինը Բադասյանի նկատմամբ կալանավորումը որպես խափանման միջոց ընտրելու մասին միջնորդություն է ներկայացրել դատարան, որը դեռևս չի մակագրվել։ Ինչ վերաբերում է ձերբակալման որոշման դեմ բողոքին, պաշտպանը նշեց, որ դեռևս բողոք չի ներկայացվել, սակայն պատրաստվում են վիճարկել ձերբակալության իրավաչափության հարցը, ձերբակալման որոշման դեմ բողոքը կքննվի կալանավորման միջնորդության հետ համատեղ՝ դատական նիստի ընթացքում։

Հեղինակ՝ Իզաբել Սահակյան

Աղբյուր` Փաստինֆո