Փաստ ինֆո

Երբ լսում ենք Նիկոլ Փաշինյանի հայտարարությունները, պետք է մոռանանք, որ նա ժուռնալիստ է, խմբագիր է, որ ինքը թերթում գրում էր, ԱԺ-ում շատ մեծ հումորով գործող իշխանությանը քննադատում էր, պետք է պատկերացնենք՝ երկրի վարչապետ։ Մեղավոր չենք, որ վարչապետի պաշտոնը սարքել են ոչ լուրջ պաշտոն, մենք պետք է դիտարկենք որպես երկրի թիվ մեկ քաղաքական պաշտոնյայի կողմից արված հայտարարություն։ Այս մասին Նիկոլ Փաշինյանի նկատմամբ քրեական գործ հարուցելու գործով դատական նիստի ընթացքում ասել է փաստաբան Արամ Օրբելյանը։

Նշենք, որ փաստաբան Արամ Օրբելյանը ՀՔԾ հաղորդում էր ներկայացրել Նիկոլ Փաշինյանի գործողությունների վերաբերյալ՝ պահանջելով քրեական գործ հարուցել ՀՀ քրեական օրենսգրքի 137-րդ հոդվածի՝ սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքի, 226.2-րդ հոդվածի՝ բռնություն գործադրելու հրապարակային կոչերի, 332-րդ հոդվածի՝ արդարադատության իրականացմանը և քննությանը խոչընդոտելու, 344-րդ հոդվածի՝ դատավորին, դատախազին, քննիչին, հետաքննություն կատարող անձին կամ հարկադիր կատարողին զրպարտելու հատկանիշներով։ ՀՔԾ-ն մերժել է քրեական գործի հարուցումը, որը հետագայում բողոքարկվել է։

Փաստաբան Արամ Օրբելյանը նշեց, որ միակ պատճառաբանությունը, որ դրվել է Նիկոլ Փաշինյանի նկատմամբ քրեական գործ հարուցելու վերաբերյալ հաղորդումը մերժելու հիմքում՝ ՀՀ քրեական դատավարության օրենսգրքի 35-րդ հոդվածի 1-ին մասի 8-րդ կետն է, որևէ այլ հղում չի կատարվում։

Տվյալ հոդվածը սահմանում է՝ քրեական գործ չի կարող հարուցվել և քրեական հետապնդում չի կարող իրականցվել, իսկ հարուցված քրեական գործի վարույթը ենթակա է կարճման, եթե անձի նկատմամբ կա նույն մեղադրանքով քրեական հետապնդում իրականացնելուց հրաժարվելու մասին հետաքննության մարմնի, քննիչի և դատախազի չվերացված որոշում, մինչդեռ՝ Օրբելյանը պարզաբանեց, որ եթե դիմումում առկա է նույնիսկ մեկ հանգամանք, որի վերաբերյալ քրեական գործ չի հարուցվել, ապա պետք է հարուցվի։ Ներկայացված հաղորդման մեջ նշված են երկու տարվա ընթացքում Նիկոլ Փաշինյանի մի շարք գործողություններում, արտահայտություններում առերևույթ հանցագործության հատկանիշներ, որոնց վերաբերյալ վարույթն իրականացնող մարմինը վերլուծություն չի կատարել։

Փաստաբանը կարևորեց, որ Նիկոլ Փաշինյանի հայտարարությունները դիտարկվեն որպես երկրի վարչապետի կողմից արված հայտարարություններ, քանի որ, եթե քրեաիրավական, քաղաքացիաիրավական գնահատական չի ստանում այդ հայտարարությունը, վարչապետն իրեն թույլ է տալիս այնպիսի հայտարարություններ, ինչ թույլ էր տալիս որպես ընդդիմադիր քաղաքական գործիչ, ունենում ենք այն, ինչ ունենք այսօր։
Նրա խոսքով՝ արդեն երկուսուկես տարի գործադիր իշխանությունը զրպարտել է դատական իշխանությանը, միջամտել է դատական իշխանության գործունեությանը, ճնշումներ է գործադրել դատական իշխանության ներկայացուցիչների նկատմամբ, դատավորներին անվանել է «վնգստացող», որի իրավունքը որևէ մեկը չունի։

«Մենք բերել ենք ոչ մեկ հայտարարություն, ամբողջական շարք։ Բոլորը դա հասկանել են սպառնալիք, Ձեր փոխարեն ես լինեի, ես էլ կհասկանայի սպառնալիք, քննիչը որոշել է, որ որևէ խնդիր չկա։ Միայն այն հայտարարությունը, թե «էս երկրում ինչի դատավոր կա՞, որ իմ ասածը չանի», արդեն քրեական հանցագործություն է, սակայն քննիչի կողմից այդ փաստի հանգամանքների վերաբերյալ քննություն չի իրականացրել»,- նշեց Օրբելյանը՝ հավելելով, որ հիմք ընդունելով ՀՀ քրեական դատավարության օրենսգիրքը խնդրում է դատարանից վերացնել քննիչի որոշումը, ինչը պարտադրում է դատախազին հարուցել քրեական գործ, որի շրջանակներում դեռևս պետք է իրականացվի քննություն և քննիչը ոչ թե պետք է ենթադրի, թե ինչ է ասել Նիկոլ Փաշինյանը, այլ՝ կանչի և հարցնի, դատավորներից հարցնի՝ արդյոք սպառնալիքներ կան, թե ոչ, հիմնավորում կա, թե ոչ։

«Ցանկացած մարդու մոտ ընկալումներ են առաջանում։ Մեղավոր չեմ, որ այդ մարդը հայտարարում է, հետո ասում է՝ ես դա չեմ ասել։ Մանկապարտեզ չի, պետության կառավարման մասին է խոսքը»,- նշեց նա՝ հիշեցնելով նաև ԲԴԽ նախագահ Ռուբեն Վարդազարյանի հայտարարությունն առ այն, որ օրհասական պահն է հասունացել՝ գործնականում ի ցույց դնելու արդարադատություն իրականացնողների բարձր պրոֆեսիոնալիզմը, նվիրումը հայրենիքին, իրավունքի գերակայության և օրենքի իշխանության պահապանի բարձր դերակատարությունն ապահովելու ճանապարհով։

Հաջորդ դատական նիստը նշանակվել է փետրվարի 17-ին՝ ժամը 16։30-ին։

Հեղինակ՝ Իզաբել Սահակյան

Աղբյուր` Փաստինֆո