Փաստ ինֆո

ՍԴ աշխատակազմի նախկին ղեկավար Էդգար Ղազարյանը ցուցմունք է տվել՝ վկայի կարգավիճակով։ Այս մասին «Փաստինֆո»-֊ի հետ զրույցում ասաց փաստաբան Արմեն Գալստյանը։

Ավելի վաղ տեղեկացրել ենք, որ հունվարի 28-ին Փաշինյանի հրաժարականի պահանջով հայահավաք է իրականացվել, որի ընթացքում 21 անձ բերման է ենթարկվել, այդ թվում՝ Էդգար Ղազարյանը, որը շարունակում էր գտնվել անազատության մեջ՝ անգամ բերման ենթարկվելու երեք ժամի ավարտից հետո։ Ղազարյանը բերման էր ենթարկվել ՀՀ քրեական օրենսգրքի 219֊րդ հոդվածի հատկանիշներով՝ շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելու կամ դրանք պահելու կասկածանքով։ Նույն հոդվածի հատկանիշներով հարուցվել է քրեական գործ, որի շրջանակներում հինգ անձ ձերբակալվել է։

Փաստաբանը, անդրադառնալով Ղազարյանին բերման ենթարկելու հանգամանքներին, պատմեց, որ Ղազարյանն իրականում չի մասնակցել ակցիային, նա գտնվել է Կառավարության մոտ գտնվող ավտոկայանատեղիի տարածքում, այսինքն՝ իրադարձությունների բուն տարածքից հեռու։

«Տեսել է, որ ինչ-որ գործողություններ են տեղի ունենում և հետաքրքրությունից ելնելով փորձել է նկարել, ինչ-որ ոստիկան նկատել է և հրահանգել բերման ենթարկել նրան»,- նշեց Գալստյանը՝ հավելելով, որ պարոն Ղազարյանին պարզապես բերման են ենթարկել, որևէ բան չեն պարզաբանել և հետագայում ընթացակարգերը շատ տարօրինակ են ընթացել։

«Ինձ թվում է՝ պարոն Ղազարյանը՝ կապված իր հասարակական գործունեության հետ, հանրային ելույթներով պայմանավորված, որոշակիորեն աչքի է ընկել և գուցե ենթադրվել է, որ պարոն Ղազարյանը նույնպես մասնակցում է։ Կարծում եմ՝ պարոն Ղազարյանին պարզապես ունեցել են տեսադաշտում»,- նշեց փաստաբանը։

Քրեական գործով Ղազարյանն ունի վկայի կարգավիճակ, արդեն ցուցմունք է տվել՝ ՔԿ Երևան քաղաքի քննչական վարչությունում։

Հեղինակ՝ Իզաբել Սահակյան

Աղբյուր` Փաստինֆո