Փաստ ինֆո

Երևանի քաղաքապետ Հայկ Մարությանի պարբերական հիվանդության նախանշանները հստակ վերածվել են հիվանդության։ Նա տառապում է պերմանենտ հրաժարականի սինդրոմով։

Ընդ որում, նրա այդ հրաժարականի թեման բարձրացվում է հատկապես այն շրջանում, երբ «քաղաքացիական պայմանագիր» կոչվող ուժը, որն իր բովանդակությամբ ավելի շատ առևտրային, քան՝ քաղաքական միավոր է, կանգնած է լինում իր հետագա գոյության համար կատաստրոֆիկ վիճակում։ Ահա այդպիսի վիճակներում Հայկ Մարությանի մոտ անձի երկվություն է առաջանում և նա տարօրինակ հայտարարություններ է անում՝ իր հրաժարականի մասին։

Հետո, երբ տեսնում է, որ հանրությանն այսօր ավելի կարևոր հարցեր են հուզում, քան իր հրաժարականն է, նա մեկ այլ հայտարարություն է անում, թե բա՝ փոշմանել եմ, ինչի պիտի հրաժարական տամ որ։

Մանավանդ, եթե Հայկ Մարությանի ղեկավարը կառավարության ռեստարտի մասին է հայտարարել և արդեն սկսել է այսպես կոչված՝ «ռակիրովկաներ» անել կառավարության վարչական ապարատում, առանձին գերատեսչություններում և մարզպետարաններում, բուժհաստատություններում։

Այս մերկանտիլ «ռակիրովկաները», որ «ռեստարտ» որակվեց Փաշինյանի կողմից, ոչ այլ ինչ են, քան ընտրական գործընթացի մեջ մտնելու նախապատրաստական փուլ։ Հո պատահակա՞ն չի Փաշինյանը բազմաթիվ ենթակառուցվածքներ և ՊՈԱԿ-ներ ունեցող ԿԳՄՍ նախկին նախարար Արայիկ Հարությունյանին իր խորհրդական նշանակեց պատերազմից անմիջապես հետո։ Իսկ առողջապահության նախկին նախարար Արսեն Թորոսյանին բոլորովին վերջերս հո պարապ տեղը չտարա՞վ աչքի առաջ՝ որպես աշխատակազմի ղեկավար։ Նա էլ իր մասնագիտական ոլորտում է նախընտրական «ռեստարտ» տալու։ Կրթություն, մշակույթ, սպորտ, առողջապահություն՝ արդեն կազմուպատրաստ անցել են գործի, օրերս տեղեկատվություն եղավ, թե՝ Հրազդանի խոշոր բուժկենտրոնի տնօրենի պաշտոնում երեք քննությամբ «անցել է» Արսեն Թորոսյանի ընկերը։ Իսկ Աբովյան քաղաքի դպրոցներից մեկի սիրված և արդյունավետ աշխատող տնօրենին քպական նախկին մարզպետ Ռոմանոս Պետրոսյանի հավատարիմներից մեկով փոխարինելու ցանկությունը դպրոցի կոլեկտիվին նախարարության շենքի մոտ էր բերել՝ իրենց բողոքը բարձրաձայնելու։

Քաղաքապետարանում այս նույն գործին է լծվելու քաղաքապետը, ուր «կարգին ռեստարտի» կարիք կա։ Քաղաքային իշխանությունն իր ենթակայության տակ եղած դպրոցների, արվեստի և սպորտդպրոցների, բուժհաստատությունների, իր ենթակայությամբ գործող մշակութային օջախների շրջանում էլ «ռևիզիա» է սկսել իրականացնել, Երևանի բոլոր համայնքները նույնպես այս գործին են լծվել։

Թե բա՝ հրաժարական եմ տալիս, հետո էլ՝ չեմ տալիս, թիմ եմ հավաքում, դիրքերս եմ ամրապնդում․․․ ՈՒղղակի այս շարունակական հրաժարականներն էլ Հայկոյի խորհրդավորության շղարշն են։ «И ежу понятно»․․․

Հանձնարարությունը ստացել է, անցել է կատարմանը։

Իսկ եթե Աստված չանի, հետպատերազմական և ամեն պահ սպասվող պատերազմի այս ահավոր վիճակում արտահերթ ընտրություն լինի՝ ներկա իշխանության կազմակերպմամբ, արդեն շատերն են այն համոզման, որ 1996-ը գլուխը քարն է տալու։ Ջահանգիրյանի ընտրությունը կյանքի գնով հո՞ պատահական չէր։

Բայց արդեն աչքներիս առաջ է Հայկական բանակի օրը հանրահավաքի մասնակիցների նկատմամբ ոստիկանական դաժանությունն ու բռնությունները՝ Հանրապետության Հրապարակում՝ իրենց սահմանադրական իրավունքն իրացնող ՀՀ քաղաքացիների հանդեպ։

Այդ էր «ռեստարտի» կատարողականի առաջին արարը։

Հեղինակ՝ Մարինե Մինասյան

Աղբյուր` Փաստինֆո