Փաստ ինֆո

«Առաջին հերթին պետք է մաքրենք մեր տունը՝ դավադիրներից, անունակներից, որովհետև 30 տարուց ավելի մենք բանակը թողեցինք բարձիթող, դարձրեցինք դուքյան»,-այս մասին «Եռաբլուր» պանթեոնում հարգանքի տուրք մատուցելուց առաջ լրագրողների հետ զրույցում ասաց Արցախյան պատերազմի մասնակից, «Հիմնադիր խորհրդարան» կազմակերպության անդամ, «Սասնա Ծռեր» խմբավորման անդամ Պավլիկ Մանուկյանը։ 

Վերջինս նշեց, որ մեր միակ ապահովության երաշխիքը բանակն էր ու դա գիտակցում էին նաև մեր հարևանները։ Պավլիկ Մանուկյանի խոսքով, ներկա իշխանություններն ամեն ինչ արեցին բանակը կազմալուծելու և բարոյալքելու համար, ինչը հաջողվեց։

«Թաթախվեցինք ամբողջությամբ քաղաքականության մեջ։ Բոլորդ էլ տեղյակ եք ընտրություններում ի՞նչ էր կատարվում. զինվորները դեմ էին քվեարկում,  աղբարկղի պես տանում դատարկում, նորից բերում լցնում էին»,- ասաց Մանուկյանը։

Ներկա իշխանությունների մասին Մանուկյանը կարծիքը չի փոխել, կրկնում է. «Նիկոլ Փաշինյանենց պետք է նետենք Սերժ Սարգսյանի անվան աղբանոց»։ 

Հարցին, թե հենց այս իշխանությունների օրոք արդարությունը վերականգնվեց և ինքն ազատ արձակվեց, Մանուկյանը հակադարձեց.

«Արդարությունը վերականգնվե՞ց, թե բռնաբարվե՞ց։ Ես ազատության համար չէի դուրս եկել, հայրենիքիս ազատության համար էի դուրս եկել։ Հիմա իմ վրա 9,5 տարի հոդված է դրված։ Ես թքել եմ այդ ազատության վրա։ Էսօր կիսով չափ մեռած ենք, կիսով չափ արթուն ենք։ Շուշին 90 տոկոսով թուրքերի՞նն էր։ Ես էլ հարց եմ տալու՝ մեր հինավուրց մայրաքաղաքում՝ Կարսում զորավարժություն են անցկացնում»։

Մանուկյանը նաև նշեց, որ իշխանություններին հեռացնելու համար նախկին մեթոդներին՝ բռնի ուժի, չեն դիմի. «Եթե իշխանությունները չեն հեռանում՝ կհեռացնենք ճիպոտով»։

Մանուկյանը հարաբերական որակեց նաև Դավիթ Տոնոյանի՝ «Նոր պատերազմ, նոր տարածքներ» արտահատությունը, ապա հարցրեց՝ «Տրուսկիկ մայկով բանա՞կ են պահում։ Դրա համար էլ դաշտերը ներկեցին սրբազան տղերքի կարմիր արյունով»։

Աղբյուր` Փաստինֆո