Փաստ ինֆո

Ես Ղարաբաղից եկել, նայում եմ ձեզ, փոշմանում եմ, որ Նիկոլի հրամանը չեմ արել ու տարածքները չեմ տվել: Մենք 46 հոգով կարողացանք Քարվաճառի տարածքը պահել, չտալ, մինչև այսօր իրենց հրամանը չենք անում, դիրքերից չենք իջնում, իսկ այս մարդիկ դեռ այստեղ նստած են: Այս մասին Նիկոլ Փաշինյանի հրաժարականի պահանջով ակցիայի ժամանակ հայտարարեց պատերազմի մասնակից, ազատամարտիկ Աշոտ Սավյանը: 

«46 հոգով Դադիվանքի գլխից սկսած պահել ենք ու չենք ենթարկվում այս մարդկանց հրամաններին, որովհետև դա իմ օջախն է, ես այսօր իմ օջախի դիրքերը թողել եմ, եկել եմ ձեզ ասելու՝ օգնեք մեզ մինչև վերջ մնալ: Եթե այսպես պասիվ եք մնալու, սրանք գնալու են ընտրությունների էլ, Վարդենիսն էլ են տալու, վաղը Մարտունին էլ են տալու: Ես իմ բոլոր մարտական ընկերներին կոչ եմ անում միանալ մեզ: Այս ժողովուրդը միայն ուտելու, մակարոնի մասին է մտածում: Ի՞նչ եք մտածում, ժողովուրդ, էսօր ինձ նման տղաները Օմարի լեռնաշղթայում 42 աստիճան սառնամանիքի մեջ կանգնած ձեզ են պահում: Ի՞նչ ենք փոխանցում մենք մեր երեխաներին՝ կորցրած տարածքներ, ավերված բանակ, կաշառակերություն, զինվորն առանց կոշիկի է, դուք հասկանու՞մ եք»,-ասաց ազատամարտիկը:
Վերջինս կոչ արեց հանրությանը համախմբվել և պայքարել.

«Այս դասալիքները բանակի օր են անում, կառավարության 90 տոկոսը բանակից փախած է, հասկանու՞մ եք: Ես կուսակցական չեմ, իմ կուսակցությունն իմ ձեռքի զենքն է: 1990-ից ես 30 տարի պայքարում եմ այնտեղ, իմ տունն այսօր թուրքից 30 մետր է հեռու, իմ 7 տարեկան աղջիկ երեխան ամեն օր թուրք է տեսնում: Իրենց հետ չեք կարողանալու մուտք կիսել, մտածե՛ք, ժողովուրդ: Սա լինելու է շարունակական, մինչև սրանք չգնան, ես էլ դիրքեր չեմ բարձրանալու»,- իր ելույթում ասաց Աշոտ Սավյանը:

Աղբյուր` Փաստինֆո