Փաստ ինֆո

«Մարտի 1»-ի գործով տուժողների իրավահաջորդներն ընդդեմ սևազգեստ մայրերի գործով վարույթը կարճվել է։ Երևանի ընդհանուր իրավասության դատարանը՝ դատավոր Լիզա Գրիգորյանի նախագահությամբ, բավարարել է հայցային վաղեմության հիմքով զոհված զինծառայողների մայրերի ներկայացուցչի միջնորդությունը։ Այս մասին «Փաստինֆո»-ի հետ զրույցում ասաց փաստաբան, սևազգեստ մայրերի ներկայացուցիչ Ալեքսանդր Կոչուբաևը։

Ավելի վաղ հայտնել ենք, որ «Մարտի 1»-ի գործով տուժողների իրավահաջորդները դատական հայց են ներկայացրել՝ ընդդեմ Մարգարիտա Խաչատրյանի և Սաթենիկ Խլղաթյանի՝ զրպարտության և վիրավորանքի համար։ Մասնավորապես՝ նրանց վրդովեցրել էր զոհված զինծառայողների հարազատների հայտարարությունն առ այն, որ կառավարությունը 30 մլն դրամ է տրամադրում «Մարտի 1»-ի իրադարձությունների ժամանակ խանութներ թալանին և անկարգությունների մասնակիցներին, իսկ հայրենիքի սահմանները պաշտպանող զոհված զինծառայողների հարազատներին՝ ոչ։

Շուրջ մեկ տարի տևած դատաքննության ընթացքում հայցվոր կողմը չի ներկայացել որևէ դատական նիստի, որևէ դիրքորոշում չի ներկայացրել։ Պատասխանող կողմը բազմիցս բարձրաձայնել է, որ հայցը ներկայացվել է ներկայացնելու համար, այն փաստարկված չէր, քանի որ այն, ինչ խոսել են մայրերը կառավարության դիմաց, արձանագրված է դատական ակտով, ուստի՝ դա չի կարող համարվել վիրավորանք և զրպարտություն։ Ավելին՝ պատասխանող կողմը նաեւ արձանագրել էր, որ հայցվոր կողմը տուժողների իրավահաջորդներ են քրեական դատավարության իմաստով, իսկ քաղաքացիական դատավարության իմաստով վերջիններս իրավահաջորդ լինել չեն կարող։

Փաստաբան Ալեքսանդր Կոչուբաևը «Փաստինֆո»-ի հետ զրույցում ասաց, որ իր վստահորդները չէին ցանկանում, որ գործը կարճվի հայցային վաղեմության հիմքով՝ գտնելով, որ դատարանը ևս մեկ անգամ պետք է արձանագրի, որ 2008թ մարտի 1-ի իրադարձություններն անկարգություններ են և թալան են եղել է, այդուհանդերձ, միջնորդություն է ներկայացվել հայցային վաղեմություն կիրառելու վերաբերյալ, ինչը բավարարվել է։

Իսկ հիմա պարզվում է, որ հայցվոր կողմը, որն ամբողջ դատավարության ընթացքում գեթ մեկ դատական նիստի չի ներկայացել, վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը։ Վերաքննիչ բողոքը դատարան մուտք է եղել 2021թ հունվարի 12-ին և օրեր անց՝ հունվարի 26-ին մակագրվել։ Բողոքը կքննվի Վերաքննիչ քաղաքացիական դատարանի դատավոր Ամրահի Պետրոսյանի նախագահությամբ, դատարանի կազմում կլինեն դատավորներ Նարինե Բարսեղյանը և Տարոն Նազարյանը։

Հեղինակ՝ Իզաբել Սահակյան

Աղբյուր` Փաստինֆո