Փաստ ինֆո

«Երկրի ղեկավարի դիվանագիտական անձնագիրը կորել է: Այս բովանդակությամբ նախադասությունն, ինքնին, զավեշտ է: Եթե այսպիսի մի բան ուրիշ երկրի ղեկավարի մասին լսեինք, երևի ծիծաղից կմեռնեինք: Հիմա ես պատկերացնում եմ, թե այս մասին լուրն ինչ արձագանքներ և էմոցիաներ է առաջացրել այլ երկրների քաղաքացիների մոտ…Պարզ է, որ մեր այս խեղկատակը հերթական անգամ ծաղրի ու ծանակի է ենթարկվել աշխարհում, բայց խնդիրն այլևս ինքը չէ, այլ մեր երկրի գահավիժող հեղինակությունը, ինչն աղետալի հետևանքների է հանգեցնում մեզ, - «Փաստինֆո»-ի հետ զրույցում ասել է ՀՅԴ բյուրոյի անդամ Բագրատ Եսայանը՝ անդրադառնալով ՀՀ-ում վարչապետի աթոռը զբաղեցնող անձի՝ առեղծվածային պայմաններում կորցրած դիվանագիտական անձնագրի թեմային։ «Քանի որ դեպքը, ըստ Անդրանիկ Հովհաննիսյանի, տեղի է ունեցել պատերազմի օրերին, ուրեմն, հավանաբար, Ալիևը թրաֆիկինգի է ենթարկել մեր թշվառին՝ Նիկոլ Փաշինյանին»։

Բագրատ Եսայանը նկատում է՝ ինչպե՞ս հասկանալ, երբ նոյեմբերի 10-ին հայտարարվեց այն մասին, որ այդ մարդու կեցավայրից ինչ – որ իրեր են կորել, դրանց թվում ոչ մի խոսք չկար դիվանագիտական անձնագրի կորստի մասին, և, ահա, երեք ամիս անց՝ Արտաքին գործերի նախարարության կողմից հայտարարվում է, որ հենց այդ պատահարի ընթացքում կորել է նաև Նիկոլի անձնագիրը. «Երևի իրենք տնեցիներով ընկած՝ երեք ամիս է հողատուի անձնագիրն էին փնտրում և, հանկարծ, հայտնվեց մի տղա, որ ասաց, թե անձնագիրն իր մոտ է և, ահա, ԱԳՆ-ն պաշտոնապես հայտարարում է, որ անձնագիրն, իբր, գողացվել է նոյեմբերի 10-ին՝ վարչապետի աթոռը զբաղեցնող անձի կեցավայր մուտք գործած քաղաքացիների կողմից: Մինչդեռ, ինքը՝ Անդրանիկ Հովհաննիսյանն ասում է, որ Փաշինյանի դիվանագիտական անձնագիրն իր ձեռքում է հայտնվել դրանց առաջ՝ նոյեմբերի 7-ին: Հիմա պարզ չէ, թե ինչպե՞ս կարելի է հասկանալ այս ողջ խառնաշփոթը, բայց այս ամենում ինձ մի հարց է հետաքրքրում՝ ինչպե՞ս է Նիկոլն առանց դիվանագիտական անձնագրի Ռուսաստանի Դաշնություն հասել՝ կարո՞ղ է վարորդական իրավունքով է նա սահմանը հատել»,- ասում է Բագրատ Եսայանը:

Հիշեցնենք, որ կորել է ՀՀ-ում վարչապետ աշխատող անձի դիվանագիտական անձնագիրը: Անհայտ պայմաններում, այն հայտնվել է Կենտրոնական Ասիայում ժամանակավոր բնակություն հաստատած հայազգի Անդրանիկ Հովհաննիսյանի ձեռքերում, ով միջադեպի մասին խոսելիս հայտնել է՝ երկրի թիվ մեկ ղեկավարի դիվանագիտական անձնագիրն իրեն են հանձնել Ղրղըզստանում բնակվող էթնիկ ադրբեջանցիները, դրա դիմաց Անդրանիկ Հովհաննիսյանից պահանջելով և ստանալով աստղաբաշխական թվերի հասնող կլորիկ գումար:

Հեղինակ՝ Նվարդ Մանվելյան

Աղբյուր` Փաստինֆո