Փաստ ինֆո

«Իմ քայլ»-ը խմբակցությունը նախաձեռնել է ԱԺ-ն ինքնալուծարման տանելու սահմանադրական փոփոխություն։ Թեմայի շուրջ «Փաստինֆո»-ի հարցերին է պատասխանում զրուցել է ԼՀԿ-ի համամասնական ցուցակով ԱԺ պատգամավոր ընտրված, բայց հետագայում խմբակցությունից հեռացած եւ որպես անկախ պատգամավոր հանդես եկող Արման Բաբաջանյանը։

- Մայր օրենքում ռազմական դրության ժամանակ իշխանությունները նախաձեռնում են քաղաքական նախասիրություններին համահունչ փոփոխություններ։ Ինչպես եք գնահատում ԱԺ-ն ինքնալուծարման տանելու իշխանության գործողությունները։

-Անկեղծ ասած քննարկումներին ամբողջությամբ չեմ հետևել, սակայն շաբաթներ առաջ վարչապետի հետ հանդիպման ժամանակ ինքս եմ առաջարկել, որ արտահերթ ընտրություններ իրագործելու համար բոլոր խոչընդոտները օրինական ճանապարհով հաղթահարելու ուղիներ է պետք գտնել։ Ինձ այս պահին անհանգստացնողը ավելի շատ արտահերթ ընտրություններին պետության անպատրաստ վիճակն է։ Բացի Ընտրական օրենսգրքից բազմաթիվ օրենսդրական հիմնարար փոփոխությունների փաթեթներ պետք է ընդունվեն ընտրություններից առաջ, որոնք ընտրություններում կպաշտպանեն ժողովրդի քվեն և կամարտահայտությունը։

Պետական հեղաշրջման փորձ հիշեցնող վարչապետի հրաժարականի տեխնիկապես գրեթե անիրագործելի պահանջի ձախողումից հետո կարծում եմ այդ պահանջը ձևակերպած քաղաքական ուժերը պետք է իրենք արտահերթ ընտրություն անցկացնելու պահանջ ձևակերպեն։ Հայաստանում պարադոքսալ իրավիճակ է՝ վարչապետի հրաժարականը պահանջող ուժերը դեմ են հանդես գալիս արտահերթ ընտրություններին, փոխարենն ինքը՝ իշխանությունը փորձում է արտահերթի հասնելու իրավական ուղիներ գտնել։ Եթե գործող կարգավորումներով խորհրդարանի բոլոր խմբակցությունների և անկախ պատգամավորների հետ արտահերթի հասնելու համախոհության հնարավոր լինի հասնել, ոչ մի սահմանադրական փոփոխության կարիք չի լինի։ Այս հարցում շատ էական է բոլոր, անխտիր բոլոր քաղաքական ուժերի պատասխանատվությունը երկրի, պետության առջև։

- Եթե խորհրդարանական հանրապետությունում խորհրդարանական մեծամասնությունը որոշում է գնալ ինքնալուծարման՝ արդյոք չպետք է ձեւավորվի նաեւ ժամանակավոր (անցումային) կառավարություն։

-Անկեղծորեն դեռևս շատ վաղ է խոսել այսպիսի հեռանկարի մասին, բայց եթե նույնիսկ այդպիսի փոփոխությունները գան ԱԺ օրակարգ և հնարավոր լինի սահմանադրական փոփոխություններով լուծել խնդիրը և գնալ արտահերթ ընտրությունների, ես և իմ առաջնորդած կուսակցությունը միայն կողջունի նման նախաձեռնությունը։ Բայց կրկին պետք է նշեմ, որ մինչև այս փոփոխությունները պետք է երկիրը պատրաստել արտահերթ ընտրության։ Հիմնարար բարեփոխումների կարիք կա՝ թույլ չտալու նախկինում սովորույթի ուժող զոռբայության, կաշառքի և ապօրինությունների ճանապարհով համապետական ընտրությունների անցկացումը։

- «Իմ քայլը» փորձում է ամեն գնով պահել Նիկոլ Փաշինյանին վարչապետի պաշտոնում որքան հնարավոր է երկար՝ իր ձեռքի տակ պահելով գործադիրի լծակները, որոնք կարող են օգտագործվել ինքնավերարտադրման համար։ Ձեր գնահատականը։

-Ավելի շատ տպավորություն ունեմ, որ ժողովրդի մեծ մասը պատրաստ չէ վարչապետի պաշտոնում Փաշինյանից բացի այլ մեկին տեսնել առնվազն մինչև արտահերթ ընտրություններ ընկած ժամանակահատվածում։ Եթե Փաշինյանը չունենար ժողովրդի վստահությունը, նրան ոչ միայն հրաժարականի պահանջող առաջադրած քաղաքական ուժերը, այլև սեփական թիմը հեշտությամբ կազատեր իր վարչապետի պաշտոնից։

-Դուք սահմանադրական փոփոխություններին պատրաստվո՞ւմ եք կողմ քվեարկել։

Այդպիսի որոշում չունեմ, բայց դեմ չեմ լինի այդ փոփոխություններին, եթե ինչպես վերևում ասացի, ժողովրդի քվեն պաշտպանող օրենսդրական հիմնարար փոփոխությունների փաթեթները բերվեն Ազգային ժողով։

Խմբ. Պատգամավորը հարցերին պատասխանել է գրավոր։ Իր պատասխաններից հետո պատգամավորին հիշեցրեցինք, որ ընդդիմությունը արտահերթ ընտրություններին չեմ չէ, ինչպես ինքն է նշել հարցազրույցում, այլ կարեւորում է Նիկոլ Փաշինյանի հրաժարականը, որից հետո կձեւավորվի անցումային կառավարություն՝ արտահերթ ընտրությունները կազմակերպելու համար։ Սակայն այս հարցին պատգամավորն այլեւս չարձագանքեց։

Աղբյուր` Փաստինֆո