Փաստ ինֆո

«Իմ տեղեկություններով Հայկ Մարությանին փոխարինելու գործընթացը կամ նպատակադրումը համակարգվում է փոխվարչապետ Տիգրան Ավինյանի կողմից»,- այս մասին «Փաստինֆո»-ի հետ զրույցում ասաց Երևանի ավագանու «Լույս» խմբակցության ղեկավարը։ Դավիթ Խաժակյանը տեղեկացրեց, որ փաստ է՝ Արմեն Կոտոլյանը ակտիվ հանդիպումներ է իրականացնում քաղաքապետարանում, որպես քաղաքապետի հնարավոր թեկնածու և բնականաբար, դա նպաստում է այն խոսակցություններին, որ Մարությանը պետք է հրաժարական տա։

Նշենք, որ Հայկ Մարությանի հրաժարականի մասին խոսակցությունները լայն թափով սկսեցին տարածվել այս տարի՝ նկատի ունենալով նրա ու Նիկոլ Փաշինյանի հարաբերություններում առկա խնդիրները։ Ամանորի տոներից հետո Երեւանի քաղաքապետը հերթական անգամ մեկնեց արձակուրդ, որն անցկացրել է արտերկրում եւ ըստ տեղեկությունների վերադարձից հետո նախատեսվում էր նրա հրաժարականը։ Այսօր արդեն տելեգրամյան ալիքները հաղորդեցին, որ Հ.Մարությանը «Քաղաքացիական պայմանագիր» կուսակցությունից դուրս գալու որոշում է կայացրել։ 

Դավիթ Խաժակյանը «Փաստինֆո»-ի հետ զրույցում նշեց, որ ստույգ տեղեկություններ չունի տելեգրամյան ալիքներում տարածվող այն լուրերի մասին, թե Մարությանը լքել է ՔՊ-ն, սակայն ավելի վաղ հայտնել էր, որ կա լուրջ, ներքին լարվածություն Մարությանի և կառավարության ներկայացուցիչների, Փաշինյանի, իշխող ուժի միջև։ Խաժակյանը չի բացառում, որ դա իրականություն է, բայց պաշտոնական մեկնաբանություն դրա մասին պետք է տա Հայկ Մարությանը։

Խաժակյանը Մարությանի արձակուրդից վերադառնալու մասին դրվագը հիշեց, երբ քաղաքապետը՝ ի պատասխան խոսակցությունների, թե հրաժարական է տալու, ասել է՝ «այդ խոսացողներին պետք է գցենք գազանանոցում՝ էշերի վանդակը»:

«Այն, որ նա գործակարգավարական նիստին կոպիտ կերպով է արտահայտվել նման խոսակցությունները հարուցողներին՝ իր հրաժարականին ձգտող կառավարության և քաղ. պայմանագրի ներկայացուցիչներին, նշանակում է, որ այդ գործընթացը այդքան էլ իր սրտով չէ և ինքը չի պատրաստվում հենց այնպես հրաժարական տալ։ Գործընթացները ինչպե՞ս կզարգանան՝ դժվար է ասել։ Հասկանալի է, որ Մարությանի վրա կունենան բազմաթիվ լծակներ, բայց մյուս կողմից էլ նա ՏԻՄ մարմնի ներկայացուցիչ է և հրաժարականի լծակները այդքան էլ ուղղակի չեն»,- ասաց Խաժակյանը։

Աղբյուր` Փաստինֆո