Փաստ ինֆո

Պողոս Պողոսյանի սպանության գործով դատավճռի բեկանումից հետո գործի նոր քննությունը կիրականացվի Երևանի ընդհանուր իրավասության դատարանի դատավոր Կարեն Ֆարխոյանի նախագահությամբ։ 

Գործը դատարան մուտք է եղել 2021թ հունվարի 25-ին և նույն օրը մակագրվել է Երևանի ընդհանուր իրավասության դատարանի դատավոր Կարեն Ֆարխոյանին։ Նշենք, որ դատավոր Կարեն Ֆարխոյանը համարվում է իշխանությունների կամքը դակող դատավորներից մեկը։ Ըստ մամուլում շրջանառվող լուրերի՝ վերջինս կազմել ու Փաշինյանին է ներկայացրել այն դատավորների ցուցակը, որոնք պատրաստակամ են բավարարել Նիկոլ Փաշինյանի իշխանության քմահաճույքները՝ քաղաքական հետապնդումներ իրականացնելու համար։ «Ֆարխոյանի ցուցակ»-ը գլխավորում է ինքը՝ Կարեն Ֆարխոյանը։

Նշենք, որ խոսքը գնում է 2001թ. սեպտեմբերի 24-ի լույս 25-ի գիշերը «Առագաստ» սրճարանում քաղաքացի Պողոս Պողոսյանի մահվան դեպքի առթիվ հարուցված քրեական գործին. Պողոս Պողոսյանի «Պրիվետ, Ռոբ» արտահայտության պատճառով նրա և անվտանգության աշխատակից Աղամալ Հարությունյանի միջև միջադեպ էր տեղի ունեցել, որի ժամանակ Պ.Պողոսյանն ստացել էր կյանքի հետ անհամատեղելի մարմնական վնասվածք։

25.09.2001թ. հարուցված քրեական գործով ՀՀ ԱԱ նախարարության աշխատակից Աղամալ Հարությունյանը մեղավոր է ճանաչվել ՀՀ նախկին քրեական օրենսգրքի 103-րդ հոդվածով նախատեսված՝ հանցավոր անփութությամբ անզգուշ սպանություն կատարելու համար: Դատարանը հաստատված է համարել, որ 25.09.2001թ.՝ ժամը 00:30-ի սահմաններում, Երևանի «Առագաստ» սրճարանի զուգարանում վերջինիս և ոգելից խմիչք օգտագործած վիճակում գտնվող Պ.Պողոսյանի միջև տեղի է ունեցել փոխադարձ քաշքշուկ, հասցվել են փոխադարձ հարվածներ, որոնց ընթացքում Պ. Պողոսյանը մեջքի ուղղությամբ վայր է ընկել, գլխի հետևի մասով հարվածել զուգարանի սալիկապատ հատակին, որի հետևանքով ստացած գանգուղեղային ծանր մարմնական վնասվածքից մահացել է: Դատարանի 2002թ. փետրվարի 21-ի դատավճռով ամբաստանյալ Աղամալ Հարությունյանը դատապարտվել է 2 տարի ժամկետով ազատազրկման, միաժամանակ նշանակված պատիժը պայմանականորեն չի կիրառվել և սահմանվել է փորձաշրջան՝ 1 տարի ժամանակով:

2018 թվականի իշխանափոխությունից հետո դատախազությունը հայտարարեց, թե դեպքի վերաբերյալ դիմում էր ստացել, որով նոր հանգամանքներ են ներկայացվել միջադեպի ականատես, վկա Սթիվեն Ջոն Նյուտոնի ներկայացուցիչների կողմից եւ քրեական գործով կայացված դատական ակտը նոր երևան եկած հանգամանքների հիմքով վերանայելու համար Երևան քաղաքի դատախազությունում հարուցվել է համապատասխան վարույթ, որի շրջանակներում կատարվել են մի շարք գործողություններ, հարցաքննվել են վկաներ, որոնք հաստատել են Պողոս Պողոսյանին մի քանի հոգով ծեծի ենթարկելու հանգամանքը, հարցաքննվել է նաև Ջոն Սթիվեն Նյութոնը, ով տվել է ներկայացված վերոնշյալ վկայությանը նույնաբովանդակ ցուցմունք:

2020թ հուլիսի 6-ին Վերաքննիչ քրեական դատարանը՝ դատավոր Ռուբիկ Մխիթարյանի նախագահությամբ, կազմով՝ դատավորներ Կարեն Մարդանյանի և Արմեն Բեկթաշյանի, բեկանել է Պողոս Պողոսյանի սպանության գործով դատապարտված Աղամալ Հարությունյանի վերաբերյալ դատավճիռը և գործն ուղարկել առաջին ատյանի դատարան՝ նոր քննության։ Վերաքննիչի դատական ակտից 6 ամիս անց գործի նյութերը վերջապես ստացվել են Երեւանի ընդհանուր իրավասության դատարանում ու վստահվել հենց «Ֆարխոյանի ցուցակը» գլխավորող Ֆարխոյանին։

Հեղինակ՝ Իզաբել Սահակյան

Աղբյուր` Փաստինֆո