Փաստ ինֆո

Արարատի մարզում բնակիչների հետ հանդիպման ժամանակ «Հայրենիքի փրկության շարժման» վարչապետի թեկնածու Վազգեն Մանուկյանը նշեց, որ վերջին 100 տարվա մեջ այսքան վտանգավոր իրավիճակում չենք եղել։ 

Անդրադառնալով արցախյան վերջին պատերազմին, Մանուկյանը նշեց, որ Ադրբեջանը պատրաստվում էր հաղթելու, Հայաստանը՝ պարտվելու: Ըստ վարչապետի միասնական թեկնածուի, դեռևս 2018 թվականից է սկսվել բանակի ջարդը։ Կոռուպցիայի անվան տակ գեներալների էին ձերբակալում, քրեական գործեր հարուցում։ Կոտրելով Արցախի ղեկավարությանը, դուրս մղեցին գեներալներին: Եվ բանակի ներսում արդեն անվստահություն մտավ:

Հաջորդ քայլը, որ կազմակերպում էր պարտության տանելու, Մանուկյանը նշեց, որ բանակի արդիականացումն էր: Դեռևս 2016-ին էինք հասկացել, որ թռչող սարքերի, նոր տեխնոլոգիաների դեմ ենք պայքարելու, բայց այդ ուղղությամբ ոչինչ չարվեց:

«Այն ցուցակով, որով դիմել էինք Ռուսաստանին, թե ինչ զենքեր ենք ուզում գնել, նախկին իշխանությունների օրոք այդ ցուցակում գրված էր «ՏՈՌ»-երը, այսինքն այն սարքերը, որոնք պետք էին ԱԹՍ-ները ոչնչացնելու համար: Դա ջնջվեց, դրա փոխարեն առան խաղալիք ինքնաթիռներ: Այդ ինքնաթիռները ոչ մի օգուտ չունեին պատերազմի ժամանակ եւ այդպես էլ չօգտագործվեցին: Պատերազմի ժամանակ հոկտեմբերի 3-ին Ֆրանսիան մեզ առաջարկեց, որ կարող է տրամադրել զենք, որի միջոցով կարող ենք պայքարել այդ ԱԹՍ-ների դեմ: Մենք հրաժարվեցինք: Հոկտեմբերի 11-ին Ֆրանսիան նորից առաջարկեց, մենք հրաժարվեցինք»,- ասաց Մանուկյանը։

Մանուկայնը մեջբերեց նախկին պաշտպանության նախարարին, երբ ասում էր, թե կանոնավոր չէինք կարողանում կառավարել բանակը:

«Ճիշտ է, բանակ ունենալով սկսեցինք կազմակերպել ջոկատներ, ինչից դուրս էինք եկել. ՄՈԲ ռեսուրսը տանում թողնում էին անտառում, ասում՝ ձեզնից մեկը հրամանատար է ու թողնում, գնում էին»,- ասաց Վազգեն Մանուկյանը։

Վարչապետի միասնական թեկնածուն նշեց՝ սա պատերազմ չէր, սպանդանոց էր, մարդկանց տանում էին սպանելու ու սպանեցին: Հավելեց, որ գաղտնի բանակցություններ էին վարում, որի պատճառով Շուշին հանձնեցին թշնամուն: Հայաստանը հրաժարվում էր Ռուսաստանի օգնությունից և այդ է պատճառը, որ կարծում է, թե պատերազմը սպանդանոց էր ու դիտավորյալ պարտված պատերազմ, որի նպատակը Արցախից ազատվելն էր։

Աղբյուր` Փաստինֆո