Փաստ ինֆո

«Մենք հիշում ենք, որ, բոլորովին վերջերս, Փաշինյանն արտահերթ ընտրությունների գաղափար էր առաջարկում և, այս օրակարգում, նա կոնսուլտացիաների էր հրավիրում ընդդիմադիր քաղաքական ուժերին: Սակայն տեսնելով, որ ընդդիմադիր քաղաքական ուժերը մերժում են այդ տարբերակը, մասնավորապես այն միտքը, որ այդ ընտրությունները պետք է անցկացվեն հենց իր գլխավորությամբ, ահա, խորհրդարանական իշխող խմբակցությունը որոշում է այս կերպ, ինչ - որ ձևով փրկել իր կաշին , - «Փաստինֆո»-ի հետ զրույցում ասել է քաղաքագետ Երվանդ Բոզոյանը՝ անդրադառնալով Սահմանադրության մեջ փոփոխություններ կատարելու «Իմ քայլի» հերթական նախաձեռնությանը, որով փորձ է արվում ԱԺ-ն տանել ինքնալուծարման՝ առանց Նիկոլ Փաշինյանի հրաժարականի։

«Իրականում, Փաշինյանը հիմա անելանելի իրավիճակում է՝ ողջ պետական ապարատը կաթվածահար է, որի արդյունքում ծանր անորոշության մեջ է հայտնվել նաև պետությունը: Փաշինյանը շատ լավ է հասկանում, որ ինքը կորցրել է ոչ միայն հանրային լեգիտիմությունը, այլ իր այդ լեգիտիմությունը կորած է նաև պետական համակարգի ներսում: Հետևաբար, որպեսզի գոնե պետական համակարգում նա կարողանա վերականգնել իր կորցրած լեգիտիմությունը, իրեն օդի ու ջրի պես արտահերթ ընտրություններ են պետք, որտեղ ինքն անպայման պետք է հաղթի: Եվ, քանի – որ ընդդիմադիր քաղաքական ուժերը չեն համաձայնում իր գլխավորությամբ արտահերթ ընտրությունների գնալ, հետևաբար, Փաշինյանը վախենում է ինքնակամ հրաժարական ներկայացնելու մտքից, որովհետև չունի ոչ մի երաշխիք, որ մարդիկ չեն հեռանա իր «Իմ քայլը» դաշինքից և չեն միանա ընդդիմությանը: Փաշինյանն ակնհայտ կերպով չի վստահում իր թիմի անդամներին: Հենց այդ պատճառով էլ նա փորձում է օրակարգ մտցնել ինքնալուծարման նախագիծը, որպեսզի լուծարելով խորհրդարանը, առանց հրաժարական տալու՝ արտահերթ ընտրությունների գնա»,- ասել է քաղաքագետը:

Հարցին՝ արդյո՞ք «Իմ քայլը» խմբակցության այսօրինակ նախաձեռնությունը հակասության մեջ չի՞ մտնում երկրի մայր օրենքի հետ, քաղաքագետը պատասխանում է՝ իշխանությունները մոտ երեք տարի շարունակ, այնքան են ոտնահարել և տապալել սահմանադրական կարգը, որ խոսել հերթական անգամ այն տապալելու փորձի մասին, ուղղակի ժամանակի անհարկի կորուստ է. «Պարզ է ու ակնհայտ, որ ՀՀ-ում վարչապետի աթոռը զբաղեցնող անձը նպատակ ունի օր առաջ լուծարել Ազգային Ժողովը և արտահերթ ընտրություններ անցկացնելով ու կեղծելով դրանք, վերարտադրվել ու շարունակել ղեկավարել երկիրը: Եթե այդ մարդու գերնպատակը բացահայտ կերպով հենց սա է, ապա, հաշվի առնելով վերջինիս բարոյական և քաղաքական նկարագիրը, ավելորդ եմ համարում խոսել Սահմանադրական կարգի տապալման միջոցով դրան հասնելու տարբերակի մասին, որովհետև, ինչպես մենք արդեն տեսել ենք, այդ մարդը չունի որևէ տարրական հարգանք ոչ միայն երկրի Մայր օրենքի, այլև՝ որևէ այլ բանի նկատմամբ»:

Կհաջողվի՞ արդյո՞ք իմքայլականներին գնալ այս ճանապարհով: Քաղաքագետը կարծում է, որ սա մեծապես կախված է հասարակության և ընդդիմության՝ առաջիկայում որդեգրած գործողություններից.«Այս ամենն արդեն, փաստացիորեն, ոչ թե իշխանազավթման, այլ Հայաստանի՝ որպես պետության, լինել – չլինելու հարցն է: Հանրության ճնշող մեծամասնությունը միանշանակ կերպով մերժել է Փաշինյանին: Այլ խնդիր է, որ այդ նույն հանրությունը չի տեսնում այնպիսի մի այլընտրանք, որը կկոնսոլիդացնի լայն մասսաներին և որի աջակցությամբ, ինքը կկարողանա հեռացնել այս իշխանությանը: Հետևաբար, հաշվի առնելով այս իրավիճակը, ընդդիմությունը պետք է կարողանա միասնական ջանքերով այնպիսի տեխնոլոգիա մշակել, որը թույլ կտա ազատվելու Փաշինյանից, որից հետո միայն՝ գնա արտահերթ ընտրությունների ճանապարհով: Իհարկե, ստեղծված իրավիճակից դուրս գալու լավագույն տարբերակը ժամանակավոր իշխանության կազմավորումն էր, սակայն, իմ տպավորությամբ, Վազգեն Մանուկյանի գլխավորությամբ ժամանակավոր իշխանության մոդելին ընդդիմությունը լիարժեք կերպով կպած չէ: Գուցե ընդդիմությունը բավարար էֆեկտիվությամբ չի աշխատում, կամ ներսում առկա էգոցենտրիկ տրամադրությունները թույլ չեն տալիս արդյունավետ ելքեր գրանցել, որպեսզի Հայաստանն, ի վերջո, այս իրավիճակից դուրս գա: Կարծում եմ, նրանք նույնիսկ լավ չեն գիտակցում, թե ի՞նչ հետևանքներ կարող են լինել, եթե այս պրոցեսին ժամ առաջ վերջ չդրվի և երկիրը դուրս չբերվի այս վիճակից»,- նկատում է քաղաքագետը:

Ամփոփելով զրույցը, Երվանդ Բոզոյանն ընդգծում է՝ Փաշինյանն ու իր թիմն, ըստ էության, պայքարում են սեփական կաշին ու ֆիզիկական գոյությունը փրկելու համար միայն, որովհետև այն հանցագործությունները, որ իրենց ղեկավարի անմիջական մասնակցությամբ կատարվել են վերջին երկուս ու կես տարիներին և հատկապես պատերազմի ընթացքում ու դրանից հետո, նրանց այլ ելք չի թողում, քան գիտակցել, որ իրենք, ըստ էության, այլևս դատապարտված են:

Հեղինակ՝ Նվարդ Մանվելյան

Աղբյուր` Փաստինֆո