Փաստ ինֆո

Անհետ կորած զինվորների ծնողները հարուցված քրեական գործերի շրջանակներում չունեն տուժողի իրավահաջորդի կարգավիճակ։ Այս մասին «Փաստինֆո»-ի հետ զրույցում ասաց անհետ կորած զինվորների հարազատների փաստաբանական խմբի անդամ Հրանտ Կարապետյանը։

Ավելի վաղ տեղեկացրել ենք, որ անհետ կորած զինվորների ծնողները հանցագործության մասին հաղորդումներ են ներկայացրել ԶՔԳՎ՝ պահանջելով քրեական գործ հարուցել և պատասխանատվության ենթարկել այն անձանց, որոնց գործողությունների հետևանքով իրենց որդիները զոհվել են կամ համարվում են անհետ կորած։

Հրանտ Կարապետյանը մեզ հետ զրույցում ասաց, որ զրուցել է գործընկերներից Անժելիկա Հակոբյանի ու Կարինե Խաչատրյանի հետ, որոնք ԶՔԳՎ-ում կազմել և ներկայացրել էին ծնողների մի մասի դիմումները։ Նշված մասով ծնողները վկայի կարգավիճակով տվել են համապատասխան ցուցմունքներ՝ իրենց հայտնի փաստերի վերաբերյալ։

«Քրեական գործերը հարուցվել են փաստի առթիվ, այսինքն՝ ըստ էության տարածքային սկզբունքով և ոչ թե կոնկրետ անձի վերաբերյալ։ Քրեական գործերի շրջանակներում մեղադրանք որևէ անձի, ըստ մեր ունեցած տեղեկությունների, չի առաջադրվել, իսկ ծնողներն էլ չունեն տուժողի իրավահաջորդի կարգավիճակ»,-նշեց Կարապետյանը՝ հավելելով, որ նախաքննական գաղտնիքի պահպանման սկզբունքից ելնելով, ավելին հնարավոր չէ հայտնել, այսինքն՝ թե ո՞ր տարածքների մասին է խոսքը։ Ծնողների մի մասի հաղորդումները կազմվել են հանրային պաշտպանի գրասենյակում, որի վերաբերյալ ևս տեղեկատվություն տրամադրել չեն կարող։

Նրա խոսքով՝ կան հարուցված գործեր, որոնցով վարույթն իրականացնող մարմինը պարտավոր է ձեռնարկել անհրաժեշտ գործողություններ՝ հանցագործությունների բացահայտման նպատակով։

«Մեր նախաձեռնությունը ի սկզբանե նշել է, որ պատրաստ է ծնողների հետ մասնակցել ամբողջ գործընթացին։ Հետևաբար եթե լինեն վարույթն իրականացնող մարմնի կողմից թերացումներ, ապա դրանց մասին ևս միանշանակ կբարձրաձայնենք»,- նշեց Կարապետյանը։

Իսկ թե՝ ի՞նչ հանցագործությունների հատկանիշներով են հարուցվել քրեական գործերը՝ փաստաբանը չմանրամասնեց՝ նշելով, որ հոդվածները տարբեր են, խոսքը հիմնականում զինվորական հանցագործությունների մասին է և ծնողների վկայակոչած փաստերն էլ, ըստ էության, դրանց են վերաբերել։

Փաստաբանը նաև չմանրամասնեց, թե ինչ հատկանիշներով են ներկայացվել հաղորդումները՝ նշելով, որ խոսքը  հրամանատարական բացթողումների, վիրավորներին չտարհանելու մասին է, ավելացնելով, որ՝ փաստաբանն իրավասու չէ հրապարակային քննարկել կոնկրետ գործի հանգամանքները։

Հեղինակ՝ Իզաբել Սահակյան

Աղբյուր` Փաստինֆո