Փաստ ինֆո

Փորձում են ջղաձիգ շարժումներով հնարավորինս երկարաձգել իրենց հանցագործ իշխանությունը։ Ուժային կառույց ոստիկանությունը Ներքին գործերի նախարարության մեջ ընդգրկելով՝ փորձում են ՆԳ նախարար նշանակել իրենց ուսապարկերից մեկին՝ այդ կերպ փորձելով իրենց ձեռքում հավաքել հակակարգը։ Այս մասին «Փաստինֆո»-ի հետ զրույցում ասաց ՀՀ նախկին փոխոստիկանապետ, ոստիկանության գեներալ-մայոր Գագիկ Համբարձումյանը՝ անդրադառնալով ՆԳՆ ստեղծելու կառավարության առաջարկին։ 

Ինչպես արդեն տեղեկացրել ենք՝ ՀՀ արդարադատության նախարարությունը քննարկման է դրել «Կառավարության կառուցվածքի և գործունեության մասին» օրենքի և հարակից օրենքների նախագծերի փաթեթը, որով նախատեսվում է Հայաստանում ներքին գործերի նախարարություն ստեղծել։ Ներկայացվող փոփոխությունների նախագծերի համաձայն՝ Նախարարության ենթակա մարմիններ են լինելու Հայաստանի Հանրապետության ոստիկանությունը, Ներքին գործերի նախարարության քննչական դեպարտամենտը, Միգրացիայի և քաղաքացիության ծառայությունը, ինչպես նաև ներկայումս Ոստիկանության ենթակայությամբ գործող ուսումնական հաստատությունը՝ «Հայաստանի Հանրապետության ոստիկանության կրթահամալիր» պետական ոչ առևտրային կազմակերպությունը։ Բացի այդ՝ այս կառույցին կվերապահվի նաեւ նախաքննություն իրականացնելու գործառույթ, առայժմ միայն ՃՏՊ-ներով։ Հատկանշական է, որ ՆԳ նախարար կարող է նշանակվել քաղաքացիական անձ, որի համար պարտադիր չի լինի համակարգում աշխատանքի ստաժը՝ այսինքն` կարող է նշանակվել քաղաքական նկատառումներ ունեցող անձ։

Կառույցին՝ նախաքննություն իրականացնելու գործառույթներով օժտելու հարցին անդրադառնալով Համբարձումյանը նշեց, որ դեռևս չի ծանոթացել փաստաթղթին, սակայն արձանագրեց, որ օպերատիվ ծառայություններ և նախաքննություն իրականացնող մարմիններն ունեն շահերի բախում, այսինքն՝ աշխատանքների գնահատման չափանիշները տարբեր են։ Ինչ վերաբերում է ՃՏՊ-ների վերաբերյալ քրեական գործերի նախաքննությանը, ապա դա ևս հարաբերական է։

«Ինչ փոփոխում են՝ կիսատ-պռատ։ Խելքներն այդքան էլ չի հասնում, որ, եթե անգամ մի բան որոշում են իրենց օգտին՝ դա էլ որակյալ, պրոֆեսիոնալ մակարդակով անելու համար։ Լինելու է հերթական աբսուրդ փոփոխությունը։ Արդեն իսկ կատարված փոփոխությունները, իրավական կարգավորումները ցույց են տալիս, որ սրանք այդքան մտավոր բազա, խելք չունեն անգամ իրենց օգտին որոշումներ պրոֆեսիոնալ կատարելու համար։ Սա անհասկանալի երևույթ է, երևի իրենց ուժն իրենց ապուշության մեջ է»,- նշեց Համբարձումյանը։

Նրա խոսքով՝ այս պահի դրությամբ նման փոփոխությունները հետադիմական կլինեն՝ հաշվի առնելով այն ինչ ցանկանում են դատարանների գլխին, այն կեցվածքը, որն ունի այսօր դատախազությունը, ապա ամբողջի մեջ տրամաբանական կապով ակնհայտ երևում է ուղղվածությունը, որ ընդամենը ցանկանում են կենտրոնացվածություն ապահովել՝ ապօրինի քրեական գործերի հարուցումները, ապօրինի հետապնդումները, կալանքները, ընտրողական արդարադատությունն իրականացնելու համար, իրենց ոչ հաճո անձանց նկատմամբ հաշվեհարդար տեսնելու համար։ Համբարձումյանն ընդգծեց, որ պետք է հարցը դիտարկել ամբողջ տրամաբանական կապի մեջ՝ ԲԴԽ շուրջ ստեղծված իրավիճակը, դատախազության հետ կապված հարցերը, «կոռուպցիայի» դեմ պայքարի գործիքակազմը, որով փորձում են հակակոռուպցիոն կոմիտե ստեղծել՝ միլիարդներ հատկացնելով։ Բացի դա՝ հակակոռուպցիոն կոմիտեի ստեղծման դեպքում ոստիկանության մի շարք գործառույթներ կվերապահվեն, ուստի պետք է կարգավորումներ լինեն։

«Թե պետք է կրկնօրինակ լինի՝ նա էլ զբաղվի, նա էլ։ Մի շարք հարցեր կան, որոնք պետք է կարգավորվեն, որ պետական իրավապահ մարմինները կարողանան ներդաշնակ աշխատել, բայց իրենց ցանկությունը՝ հավաքել ամեն ինչ իրենց ձեռքում և հնարավորությունները՝ մտավոր, ակնհայտ չեն համապատասխանում իրար, հետևաբար՝ անգամ այն, ինչ անելու են, անելու են շատ ապաշնորհ ձևով՝ ավելի շատ ընդգծելով իրենց թաքցված ցանկությունները, այն է՝ իշխանության մաքսիմալ կենտրոնացում՝ ուսապարկերի ձեռքում»,- նշեց Համբարձումյանը։

Աղբյուր` Փաստինֆո