Փաստ ինֆո

Շուշիի նախկին քաղաքապետ Արծվիկ Սարգսյանը լրագրողների հետ զրույցում նշեց, որ Արցախի բնակչությունը անսպասելիորեն խնդիրների առաջ է կանգնել՝ թողել են տունը, ունեցվածքը ու 99.9 տոկոսով դատարկաձեռն՝ միայն իրենց հագուստով դուրս են եկել բնակավայրերից։ Բնակիչները մտածում էին, մի քանի օրով են լքում տները, սակայն այդպես էլ չվերադարձան։ Շուշիում բնակվողները վարկ էին վերցնում, տուն կառուցում ու նորոգում, քաղաքն էին վերակառուցում ու գեղեցկացնում, բայց այսօր մնացել են առանց օթևան։ 

Արցախցիները՝ շուշեցիները կենցաղի, սննդի, հագուստի հետ կապված խնդիրներ ունեն։ Չնայած օգնության ձեռք մեկնողներ կան, բայց դա հետագայում ապրելու համար, ըստ քաղաքապետի՝ բավարար չէ։

Սարգսյանը նշում է, որ վարձով բնակարանները աստղաբաշխական թվեր են կազմում, իսկ պետական աջակցությամբ տված գումարները բավարար չեն, որպեսզի կարողանան վարձերը վճարել։

«Աջակցում են 68 ու 15 հազար դրամներով, որոնցից 18-58 տարեկան տղամարդիկ չեն օգտվում։ Ասում են, թող տղամարդիկ գնան աշխատեն, բայց որտե՞ղ։ Մարդիկ նաև բողոքում են, որ գումարները չեն նստել։ 300 հազար դրամ ևս տրամադրում են, բայց թերություններ կան։ Շուշիում ու մնացած համայնքներում, որ ադրբեջանցիների հսկողության տակ են գտնվում, բնակիրչները պետք է օգտվեն 300 հազարական դրամներից։ Օրենքում նշված է, որ երեք ամիս պետք է բնակվեին Շուշիում։ Բայց եթե երեք ամիս չեն բնակվել, սակայն տուն, կահույք ու ունեցվածք ունեն, ո՞նց է լինելու փոխհատուցումը»,- ասաց Սարգսյանը։

Քաղաքապետն ասում է, որ Ստեփանակերտում օրինակ, սնունդ են բաժանում, սակայն հարցը կարգավորված չէ։ Մարդիկ կան տեղեկացված չեն, չեն կարողանում օգտվել ու հարցերը մնում են օդում կախված, դրանք պետք է լուծեն պետականորեն։ Բաժանվող սնունդը ցուցակագրված չէ, շատերը հուսալքված ու դատարկաձեռն տուն են վերադառնում։

Առաջային է նաև կենցաղի հարցը։ Շատերը ՀՀ-ում են, ժամանակավորապես  մայրաքաղաքում են բնակվում, սակայն նրանցից շատերին հյուրընկալած մարդիկ, ժամանակ են տալիս լքելու իրենց տները։

Աղբյուր` Փաստինֆո