Փաստ ինֆո

«Ցավալի է, որ եվրոպական կառույցները շարունակում են առաջնորդվել կեղծ օրակարգերով։ Իհարկե, ես այսօր պիտի ընդունեմ նաև խորհրդարանական դիվանագիտության պասիվ, անգործունյա լինելը, որի հետեւանքով ունենում ենք այսպիսի իրավիճակներ, երբ մեկ բլոգերի հարցը շատ ավելի կարևոր է դառնում, քան մի ամբողջ Արցախի ցեղասպանությունը»,- այս մասին «Փաստինֆո»-ի հետ զրույցում ասաց ԱԺ «բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով այն հարցին, որ ԵԽԽՎ խորհրդարանական վեհաժողովը նախընտրել է Ադրբեջանի կողմից ՀՀ ռազմագերիներին ապօրինաբար պահելու հարցի փոխարեն քննարկել բլոգեր Ալեքսեյ Նավալնու ձերբակալման հարցը։

Զոհրաբյանը ցավով նշեց, որ Եվրոպայի համար առաջնային են կեղծ արժեքները։

«Դուք պիտի տեսնեք, թե հինգշաբթի օրը նախատեսված Ալեքսեյ Նավալնու ձերբակալման հարցի քննարկմանը քանի տասնյակ եվրոպացի պատգամավոր է հերթագրվել ելույթ ունենալու համար։ Եվ երբ քաղաքական խմբում բարձրացրեցի հարցը՝ արդյոք ձեզ համար մեկ Նավալնիի խնդիրը շատ ավելի կարևոր է, քան գլխատված, Ադրբեջանի կողմից տանջամահ եղած, կտտանքների ենթարկված հայ զինվորները, բնականաբար որևէ արձագանք Եվրոպայից չստացանք։ Ցավոք, մենք պիտի ընդունենք, որ եվրոպական կառույցները վերջին շրջանում ակնհայտորեն վերածվել են տարբեր գլոբալիստական շահեր սպասարկող կենտրոնների»։

Պատգամավորը նշեց, որ մեծ ջերմեռանդությամբ է քաղաքական խմբերում առաջնային օրակարգ մղվել Նավալնու հարցը։ Պատգամավորը դեմ չէ մարդու իրավունքին, բայց դա սելեկտիվ չպետք է լինի։ Զոհրաբյանը նկատեց՝ մարդու իրավունքը կախված չպետք է լինի նրանից, որ Եվրոպայի խորհուրդը ակնհայտ հակակրանք ունի Ռուսաստանի հանդեպ ու հակառուսական ցանկացած օրակարգ Եվրոպայի խորհուրդն օգտագործում է համաեվրոպական թիվ մեկ օրակարգը դարձնելու համար։

«Ցավում եմ, որ արցախյան վերջին պատերազմի հումանիտար ճգնաժամից հետո հարյուրավոր ռազմագերիները, որ առ այս պահը պահվում են Բաքվում, չնայած Ժնևի 1949 թվականի երրորդ կոնվենցիան հստակ ամրագրում է, որ պատերազմի կրակի դադարից անմիջապես հետո առանց, որևէ նախապայմանի, ռազմագերիները պիտի վերադարձվեն։ Եվրոպայի խորհուրդը գերադասում է սորոսական օրակարգը, հումանիտար ճգնաժամից»,- ասաց Նաիրա Զոհրաբյանը։

Պատգամավորը տեղեկացրեց, որ այսօր առավոտյան մասնակցել է ԵԽ պահպանողականների և ռեֆորմիստների քաղաքական խմբի նիստին, որտեղ ադրբեջանական պատվիրակության ղեկավար Սեիդովը խաղաղասիրական նոտաներով հարց է բարձրացրել, թե ի՞նչ կարող է անել ԵԽ-ն, որպեսզի հայկական ու ադրբեջանական պատվիրակությունները կարողանան խաղաղ գոյակցել ու աշխատել։ Զոհրաբյանն էլ հակադարձել է.

«Ասացի, առաջինը, որ դուք պիտի անեք, պարոն Սեիդով, պիտի դիմեք ձեր նախագահին, որպեսզի րոպե առաջ ազատ արձակի հայ ռազմագերիներին, որոնց չգիտես ինչի ինքը հռչակել է ահաբեկիչներ։ Երկրորդ, պիտի անեք առավելագույնը, որպեսզի ձեր երկրում հայատյացությունը չշարունակի լինել պետական քաղաքականություն»։

Զոհրաբյանը վստահ է, որ եթե անգամ, Ալեքսեյ Նավալնու ձերբակալման հարցը օրակարգում չլիներ, միևնույն է ԵԽԽՎ օրակարգ հայ ռազմագերիների հարցը չէր ընդունվի, փոխարենը կգտնեին մի կեղծ օրակարգ, որով և կառաջնորդվեին ու կխուսափեին կարևորագույն հարցի քննարկումից։

«Խնդիրն այն է, որ Եվրոպայի խորհդում հստակ ձևավորված է հակառուսական օրակարգ. ուկրաինական, վրացական, լատվիական, լիտվական ու էստոնական պատվիրակությունները հիմնական առաջամարտիկներն են հակառուսական օրակարգն առաջ մղելու համար և այդ օրակարգը դեռևս ակտուալ է։ Ցանկացած հակառուսական օրակարգ ԵԽԽՎ-ում ընդունում են մեծագույն ծափողջույններով»,- եզրափակեց Զոհրաբյանը։

Աղբյուր` Փաստինֆո