Փաստ ինֆո

Մեր պետության հնարավորությունների սահմաններում և՛ ես, և՛ ՊՆ նախկին նախարարներն արել ենք այն, ինչ կարողացել ենք։ Եթե ուզում են խորանալ «բանակի թալանի մեջ»՝ թող խորանան այն գումարների մեջ, որը պետք է մտներ բյուջե, բայց չի մտել։ Բանակի բյուջեն պետք է ավելանար, ավելի մեծ գնումներ պետք է իրականացվեին։ Այս մասին լրագրողների հետ զրույցում ասաց ՀՀ ՊՆ նախկին նախարար Սեյրան Օհանյանը՝ անդրադառնալով բանակը թալանելու մեջ նախկիններին մեղադրող իշխանությունների հայտարարություններին։

Օհանյանը նշեց, որ հստակ պատկերացնում է բանակի բյուջետավորումը, գիտի ինչ է նշանակում պահպանման ծախսեր, կապիտալ ներդրումներ և այդ ներդրումների համար ինչքան գումար է հատկացվել։Ավելին՝ վստահեցրեց, որ իր ղեկավարության ժամանակ հստակ պայքար է մղվել կոռուպցիոն ռիսկերի դեմ։

«Ութ ու կես տարվա ընթացքում ես 135 գնդապետ և բարձր պաշտոն զբաղեցնող մարդ եմ ազատել՝ սկսած զորամասի հրամանատարից մինչև փոխնախարար։ Մարդիկ, որոնք թերացել են, մարդիկ, որոնք մեծ բանակի՝ հրամանատարական կազմի, սպաների, ենթասպաների, սերժանտների, զինվորների աշխատանքը փորձել են ստվերել ։ Այդ 135-ի շուրջ կեսը կոռուպցիոն ռիսկերով է եղել։ Այսինքն՝ 23 օրը մեկ ես գնդապետ և բարձր պաշտոնյա եմ ազատել, դրանից ավել ո՞վ ազատած կլինի։ Մեծ ուրախությամբ չեմ ազատել, բայց թերացել են»,- նշեց Օհանյանը՝ հավելելով, որ իր ղեկավարության ժամանակ բավականին մեծ քանակությամբ վերահսկող օրգաններ են եղել։

Նրա փոխանցմամբ՝ բանակի նկատմամբ երկու տիպի վերահսկողություն գոյություն ունի. առաջինը՝ ժողովրդավարական, որի մաս է կազմում նախագահը՝ իր վերահսկողական օրգաններով, ԱԺ-ն՝ իր վերահսկողական օրգաններով, վերահսկիչ պալատը, ՄԻՊ-ը, կառավարությունը՝ ֆինանսական գործունեությամբ, իրավապահ ոլորտը՝ դատախազական վերահսկողությամբ, երկրորդը՝ հասարակական, որի մեջ մտնում են հասարակական կազմակերպությունները և զանգվածային լրատվամիջոցները։

«Իմ ղեկավարության ժամանակ կազմվել է բանակում՝ մարդու իրավունքների և բարեվարքության ամրապնդման կենտրոն, ինչը նշանակում է՝ մարդու իրավունքների հետ կապված բարձրացնել յուրաքանչյուր ենթակայի, ըստ ստորադասության, իրավունքների գերադասությունը, վերադասի պատասխանատվությունը և բարձրացնել զինծառայողների իրավագիտակցությունը՝ հատկապես բարեվարքության մակարդակը»,- նշեց Օհանյանը՝ հավելելով, որ, այնտեղ, որտեղ կա մարդկային գործոն, միշտ էլ փորձելու են այս կամ այն պաշտոնում անձնական շահը վեր դասել, քան՝ պետական շահը։

Բացի դա՝ այնտեղ, որտեղ կա կադրային հոսք, միշտ էլ նոր կադրերը փորձում են սկզբնական ժամանակահատվածում բացասական երևույթները ներդնել կառույցում։

Մանրամասները՝ տեսանյութում։

Աղբյուր` Փաստինֆո