Փաստ ինֆո

«Նիկոլ Փաշինյանն այլևս ադեկվատ մարդ չէ, հետևաբար, փորձել նրա այս կամ այն գործողությունը մեկնաբանել նորմալ քաղաքական վերլուծության տեսակետից, կարծում եմ՝ անհնար է: Դիվանագիտությունից զրո գիտելիքներ և փորձ ունեցող Մակունցին նշանակել աշխարհի գերհզոր երկրներից մեկում ՀՀ դեսպան, ընդ որում, մի երկրում, որի հետ հարաբերությունները Հայաստանի հետ չափազանց էական դեր ու նշանակություն ունեն, մեղմ ասած անմեկնաբանելի է: Այս թեմայով, արդեն իսկ, իրենց դժգոհությունն են հայտնել նաև հեղինակավոր և ծանրակշիռ դիվանագետներ՝ նշելով, որ ԱՄՆ դեսպանի պաշտոնում նշանակվելու պարագայում, Մակունցն իր անգիտությամբ կտապալի հայ – ամերիկյան հարաբերությունները», - «Փաստինֆո»-ի հետ զրույցում ասել է «Ազգային անվտանգություն» կուսակցության նախագահ Գառնիկ Իսագուլյան։

Հիշեցնենք՝ Մակունցի ԱՄՆ-ում դեսպան նշանակելու Նիկոլ Փաշինյանի մտադրության մասին առաջին խոսել է Վատիկանում ՀՀ նախկին դեսպան Միքայել Մինասյանը։ Մամուլում տեղեկություն տարածվեց նաեւ նախկին խոսնակ Վլադիմիր Կարապետյանը՝ Կիեւում դեսպան նշանակվելու հավանականության մասին։ Լուրն իր մասով չհերքեց, ավելին՝ հաստատեց Լիլիթ Մակունցն, ասելով, որ հարցը դեռևս քննարկման փուլում է:

Մեդիամագնատ Արամ Գաբրիելյանովը հայտարարել է, որ այս նշանակումներով, ՀՀ-ում վարչապետի աթոռը զբաղեցնող անձը փորձում է մաքրել իր ապաշնորհ քաղաքական գործունեության հետքերը՝ հեռացնելով Հայաստանից իր թիմում հակահայկական առավել նշանակալից գործունեություն ծավալած քաղաքական ֆիգուրներին:

Հիշեցնենք նաև, որ Վլադիմիր Կարապետյանի կնոջ հետ են կապում թշնամական երկրի հետ դավաճան իշխանությունների՝ կապավորի դերը ստանձնելու աշխատանքը, մասնավորապես, ըստ մամուլում շրջանառվող լուրերի, Շուշիի դավադիր հանձնման գործընթացը:

Գառնիկ Իսագուլյանը նկատում է՝ բացի Մակունցին ԱՄՆ-ում դեսպան նշանակելու անհեթեթ որոշումից, Նիկոլ Փաշինյանն աչքի է ընկնում նաև մի շարք այլ անհասկանալի և հապշտապ քայլերով նույնպես: Դրա վառ օրինակներից՝ ԲԴԽ անդամների նշանակումն է կամ վերաքննիչ դատարանի՝ հատկապես քրեական պալատի դատավորների թիվն արագ տեմպերով ավելացնելու մոլուցքը և այլն. «Հավանաբար, Փաշինյանն ուզում է նոր դատավորներ նշանակել, որոնց, իր պատկերացմամբ, հետախուզում հայտարարելու կամ ձերբակալության և կալանքի որոշումներ կայացնելու միանձնյա արտոնություններ կտրվեն: Տպավորություն է, թե մի կողմից նա շտապում է ինքն իրեն ապահովագրել ակնկալվող շատ խնդիրներից, միևնույն ժամանակ, փորձում է օրինականացնել իր կողմից իրականացվող բոլոր ապօրինի քրեական հետապնդումները: Հետևաբար, այս ամենն ի մի բերելով, շատ բարդ է դառնում այդ մարդու անհասկանալի և հապճեպ կայացրած որոշումներին որևէ նորմալ մեկնաբանություն տալ: Մի բան ակնհայտ է՝ Փաշինյանը խուճապի մեջ է, նա հասկանում է, որ պատասխանատվությունից խուսափել չի կարողանալու, իսկ այդ պահը մոտենում է»:

Իր մտերիմներին տարբեր երկրներում, որպես դեսպան ուղարկելով, Փաշինյանը հստակ ազդակ է ուղարկում իր թիմի մնացյալ անդամներին՝ նրանք մնալու և զոհաբերվելու են իր կատարած հանցավոր ապօրինությունների համար, ասում է Գառնիկ Իսագուլյանն ու հավելում. «Կախված նրանից, թե օրերի տաքացմանը զուգահեռ, ինչ զարգացումներ կլինեն, իր պաշտոնանկության վերաբերյալ Փաշինյանն ակտիվորեն երկու սցենարի է պատրաստվում: Նա իրեն հիանալի կերպով հաշիվ է տալիս նաև այն հարցում, որ իր թիմից շատ շատերին ինքը որպես զոհ է թողնում՝ պատասխանատվության ենթարկվելու իր կատարած անհավանական ապօրինությունների համար: Ինչ վերաբերում է մտերիմներին Հայաստանից հանելու փորձերին, ապա պետք է ասեմ, որ նույնիսկ դեսպաններ նշանակվելու պարագայում, նրանց չի հաջողվելու խուսափել հետագա քրեական պատասխանատվությունից: Խոսելով այն մասին, ինչ տեղի է ունեցել Արցախի հետ, պետք է նշեմ հետևյալը՝ այդ դավադիր ծրագրում այնքան դավաճաններ են ներգրավվել, որ նրանց բոլորին փրկել կամ փրկվել չի հաջողվելու: Ես գրեթե համոզված եմ, որ Նիկոլ Փաշինյանն, ընտանիքի հետ Հայաստանից փախչելու փորձ է անելու, բայց, եթե անգամ դա նրան հաջողվի, ինքը գտնվելու և հետ է վերադարձվելու Հայաստան՝ դատվելու իր կատարած ազգակործան և դավաճան քայլերի համար»,- եզրափակելով զրույցն, ասել է «Ազգային անվտանգություն» կուսակցության նախագահ Գառնիկ Իսագուլյանը:

Հեղինակ՝ Նվարդ Մանվելյան

Աղբյուր` Փաստինֆո