Փաստ ինֆո

«Այն, որ ադրբեջանական կողմը թույլ չի տալիս, որպեսզի հայկական կողմից Արցախում զինված ուժեր մտնեն, սա ոչ թե Ադրբեջանի, այլ մեր խնդիրն է: Նա ասում է՝ սա իմ պետության տարածքն է, հետևաբար, այլ պետության զինվորական համազգեստով մարդն իր տարածքում որևէ կարգավիճակով չի կարող մուտք գործել: Ասեմ ավելին՝ իրեն հասանելի բոլոր մեթոդներով, ադրբեջանական կողմը մշտապես խոչընդոտելու է Հայաստանից որևէ զինվորականի մուտքը՝ դեպի Արցախ: Սա մենք պետք է ընդունենք, որպես հայկական կողմի ռազմական պարտության ևս մեկ անխուսափելի դրսևորում, - «Փաստինֆո»-ի հետ զրույցում ասել է ռազմական փորձագետ Հայկ Նահապետյանը՝ անդրադառնալով այն հարցին, որ պատերազմից հետո ժամկետային զինծառայողներին Արցախ տեղափոխելու հարցում խնդիրներ են առաջացել։

«Արցախի ժողովրդի անվտանգության երաշխավորը պատերազմից հետո, այլևս ռուսական խաղաղապահ զորքն է, Ռուսաստանի Դաշնության Զինված ուժերի համապատասխան ստորաբաժանումները, որոնք Արցախում հստակ կարգավիճակով և Դաշնային խորհրդի որոշմամբ են գործունեություն ծավալում: Չեի՞նք ուզում այսպիսի իրավիճակում հայտնվել, ուրեմն պետք էր ժամանակին լուրջ բանակաշինությամբ զբաղվել և երկրի ղեկը չհանձնել գործակալական ցանցի տնօրինությանը»,- նշել է Նահապետյանը:

Նրա դիտարկմամբ՝ հայկական կողմից՝ Զինված ուժերի ներկայությունը Արցախում բացառելու որոշումը երկկողմ պայմանավորվածության արդյունք է՝ Հայաստանի կապիտուլյանտ ղեկավարի և Ադրբեջանի ղեկավարության միջև, հակառակ պարագայում, ըստ վերջինիս, կլինեին համապատասխան փորձեր, թեև դրանք կարող էին ավարտվել կոնֆլիկտով կամ որոշակի բախումներով, այնուամենայնիվ, Հայաստանի Հանրապետության Զինված ուժերն Արցախում ելումուտի հնարավորություն անպայման կունենային:

Հարցին՝ ի՞նչ նպատակ է հետապնդում այս պայմանավորվածությունը, Հայկ Նահապետյանը պատասխանել է՝ Հայաստանում գործակալական ցանցի շահերը սպասարկող վարչապետն իր առաջ խնդիր է դրել վերջնականորեն հայաթափել Արցախն ու Սյունիքը. «Հաշվի առնելով այն փաստը, որ Սյունիքում Ադրբեջանի հետ սահմանային իրավիճակն անմխիթար է, այլ կերպ ասած, չկա կանոնավոր բանակ, որ հարավային հատվածում կվերահսկի Սյունիքի ու Ադրբեջանի սահմանը, բայցի այդ, մենք տեսնում ենք, թե ի՞նչ է կատարվում Սյունիքում՝ սահմանազատումների անվան տակ, ապա, այս ամենից կարելի է միայն մեկ տրամաբանական հետևության գալ՝ Փաշինյանը նպատակ է հետապնդում հայաթափել Արցախն ու Սյունիքը և իշխանության մնալու վեց ամիս ժամանակը հենց դրա համար է օգտագործելու»:

Հայկ Նահապետյանը կարծում է՝ ի վերջո, այն իրավիճակը, որ կա Արցախում, մեծապես նպաստելու է բնակչության արտագաղթին: Եթե, նույնիսկ, Արցախում էական ռազմական բախումներ չլինեն, ապա միայն ադրբեջանական կողմի գործադրած բարոյահոգեբանական ճնշումներն, ըստ վերջինիս, բավարար են լինելու, որպեսզի այնտեղ ապրող մարդիկ ուժասպառ և հուսահատ վիճակում, երկիրը լքելու որոշում կայացնեն. «Դրան մեծապես կարող է նպաստել նաև Արցախում նախագահ աշխատող անձի պաշտոնավարման շարունակելիությունը: Ի վերջո, որպես ի գիտություն, մենք պետք է ընդունենք և հաշվի նստենք այն իրողության հետ, որ այս ամենը հայկական կողմի վարած դավաճանական քաղաքականության հետևանք է: Չմոռանանք Սամվել Բաբայանի մասնակցությամբ գաղտնի արված ձայնագրության տարածումը, որտեղ նա Արայիկ Հարությունյանին առաջարկում էր ռուսական կողմից 10 օր խնդրել՝ Արցախն ամբողջովին հայաթափելու համար»,- ասել է Հայկ Նահապետյանը:

Որպես ստեղծված իրավիճակի փոփոխության երաշխիք, փորձագետը միայն մեկ ճանապարհ է տեսնում՝ անհապաղ իշխանափոխությունը, ինչը, սակայն, ըստ վերջինիս խորին համոզման, ինքնակամ ճանապարհով չի լինելու՝ Փաշինյանը երբեք ինքնակամ չի հեռանալու, ասում է Հայկ Նահապետյանն ու հավելում. «Մոռացեք, որ Փաշինյանն իշխանությունը հանձնելու է: Ավելին, այժմ նա ակտիվորեն զբաղված է այդ իշխանության ուղղաձիգն ուժեղացնելով: Նա օրենքի ուժով նոր մարմիններ է ստեղծում, որոնք հնարավորություն կտան՝ տնտեսական գործունեությամբ զբաղված իրավաբանական անձանց, իբր կոռուպցիայի մեջ թաթախված լինելու պատրվակով, միասնական հակակոռուպցիոն կենտրոնի ղեկավար Արգիշտի Քյարամյանի գլխավորությամբ ստուգման ենթարկվել: Միաժամանակ, դատավորների նոր ինստիտուտ է ձևավորվում, որոնք, ինչ – որ անհասանելի և կասկածելի գործառույթ են իրականացնելու: Ընդ որում, չունենալով դատավորական պրակտիկայի փորձ, նրանք օժտված են լինելու գաղտնալսման, խուզարկության, բերման ենթարկելու և ձերբակալելու գործառույթներով, որի արդյունքում, Փաշինյանը ցանկացած ընդդիմադրի, շատ դյուրին կերպով չեզոքացնելու անսահմանափակ լծակներ կունենա: Ի դեմս Ոստիկանության և ԱԱԾ-ի, Փաշինյան Նիկոլն իր ձեռքին ունի նաև մի մեծ մահակ, որ ամեն պահին կարող է բաց թողնել ժողովրդի վրա: Այս ամենի ֆոնին, կար այսպես ասած, մի բացթողում, որն ընդդիմադիր լրատվամիջոցների տեսքով էր, սակայն, բոլորովին վերջերս, մենք ականատես եղանք նաև ընդդիմադիր կեցվածք որդեգրած մի շարք լրատվամիջոցների փակման պրոցեսին, ինչն, այս ամենի հետ միասին, միայն մեկ բան է ապացուցում՝ Փաշինյանն ինքնակամ հեռանալու որևէ մտադրություն չունի»:

Եվ, այնուամենայնիվ, արդյո՞ք կապիտուլյանտ և հողատու վարչապետը հավերժ է: Խոսելով ժողովրդի հասունացած ցասումով վերջինիս հեռացնելու հեռանկարի մասին, Հայկ Նահապետյանը նկատում է՝ թող ժողովրդին չթվա, թե Փաշինյանին ինքն է բերել իշխանության: Ցավոք, ժողովուրդն ընդամենը գործիք է ծառայել այդ ճանապարհին՝ ուժային ամենատարբեր կենտրոնների ձեռքին. «Բոլոր այն ընդդիմադիրները, ովքեր հավատում են, թե Փաշինյան Նիկոլի ձեռքից իշխանություն են վերցնելու, դատապարտված են ձախողման: Դա պետք է վերցնել այն ուժային կենտրոններից, որտեղ գտնվում է իրական իշխանությունը, որովհետև Փաշինյանն ու իր թիմն ընդամենը կեղտոտ գործիք են այդ կենտրոնների ձեռքին: Իսկ երբ ժողովուրդն իր կամարտահայտմամբ, մի քանի հարյուր հազարներով օրեր շարունակ դուրս կգա փողոց ու տուն չի գնա, այն ժամանակ այդ ուժային կենտրոնները կփորձեն բանակցել այն քաղաքական ուժի հետ, որը կկարողանա այդ ողջ զանգվածին ղեկավարել և փողոցում պահել»,- եզրափակելով զրույցն ասել է Հայկ Նահապետյանը:

Հեղինակ՝ Նվարդ Մանվելյան

Աղբյուր` Փաստինֆո