Փաստ ինֆո

Մենք գործ ունենք 82 պատգամավորների հետ, որոնք սեփական կարծիքը չունեն և առաջնորդվում են մեկ մարդու քմահաճույքով և որևէ հնարավորություն չենք տեսնում մեր խոսքով ազդելու այդ մարդկանց որոշումների վրա: Այս մասին ԱԺ-ում ճեպազրույցի ժամանակ ասաց ԼՀԿ պատգամավոր Տարոն Սիմոնյանը: Պատգամավորը տեղեկացրեց, որ խմբակցությունը որոշում է կայացրել չմասնակցել ԲԴԽ անդամների քվեարկությանը:

Անդրադառնալով ԲԴԽ անդամի պաշտոնում նախկին զինդատախազ Գագիկ Ջահանգիրյանի թեկնածությանը, պատգամավորն ասաց, որ նրան ճանաչում է որպես շատ լավ մասնագետ և իրավաբանական գիտության բնագավառում ավանդ ունեցող անձի.

«Թեկնածուի անձնական հատկյանիշներին չենք անդրադարձել, որովհետև ասում ենք մասնագիտական տեսանկյունից՝ խնդիր չունենք, բայց քաղաքական որոշում է»,-ասաց Սիմոնյան:

Պատգամավորի խոսքով՝ ընդդիմությունը պետք է որևէ կերպ մասնակից դառնար դատաիրավական բարեփոխումներին, այլ ոչ թե՝ անտեսվեր:

Տարոն Սիմոնյանը հիշեցրեց, որ անցած տարի պայմանավորվածություն էր ձեռք բերվել, որ ԲԴԽ անդամի մեկ թեկնածուին պետք է առաջադրի իշխանությունը, մյուսին՝ ընդդիմությունը, սակայն իշխանությունն այդ պայմանավորվածությունը խախտել է.

«Այստեղ քաղաքական պայքար չէ, այստեղ քաղաքական որոշումներով պայմանավորված դատաիրավական բարեփոխումներ իրականացնելու հարց է, երբ իշխանության ներկայացուցիչներն անտեսում են ընդդիմության ներկայացուցիչների որևէ գործողություն՝ այդ բարեփոխումների մեջ ավանդ ունենալու, ինչ իմաստ ունի ընդդիմության որևէ այլ գործողություն կատարել»,-ասաց ԼՀԿ պատգամավորը:

Հարցին՝ արդյո՞ք Գագիկ Ջհանգիրյանը իրենց խմբակցության համար նախկին կադր չէ, Տարոն Սիմոնյանը պատասխանեց.
«Նախկին, ներկա արտահայտություններով քաղաքական որոշումներ չեն կայացնում, իսկ նրանք, ովքեր կայացնում են նման կատեգորիաներով, ազգային շահով չեն առաջնորդվում»,-ասաց պատգամավորը:

Տարոն Սիմոնյանը, անդրադառնալով ԲԴԽ անդամների տարիքային սահմանափակմանը, ասաց, որ տարիքային սահամանափակումը բացառապես վերաբերում է դատավոր թեկնածուներին, այլ ոչ՝ գիտնական թեկնածուներին:

Աղբյուր` Փաստինֆո