Փաստ ինֆո

Վարդենիսի, Մարտունու, Ճամբարակի շատ բնակիչներ ինձ դիմել են, դժգոհություն են հայտնել ու ասել, որ իրենք պատրաստվում են առաջիկայում փակել հնարավոր ավտոճանապարհները և իրենց բողոքի ձայնը բարձրացնել, որպեսզի Հայաստանի իշխանությունը տեղից շարժվի ու Վարդենիս-Քարվաճառ ավտոճանապարհի հարցը բարձրաձայնի: Այս մասին ԱԺ-ում լրագրողների հետ զրույցում ասաց պատգամավոր Թագուհի Թովմասյանը:

Պատգամավորի խոսքով՝ հայակական կողմը ողջունում է մի փաստաթուղթ, որով նախատեսվում է ճանապարհների ապաշրջափակում, բայց ստացվում է որ Արցախը մնում է շրջափակման մեջ։ Թագուհի Թովմասյանը կարևորեց հատկապես Քարվաճառի ավտոճանապարհի վերագործարկումը, որը, ըստ պատգամավորի, կարող է գործել ռուս խաղաղապահների վերահսկողությամբ.

«Արցախը գտնվում է շրջափակման մեջ։ Շատ մարդիկ Արցախում են աշխատում՝ հանքարդյունաբերության, շինարարության ոլորտում։ Նախկինում 80 կմ էր ճանապարհը, տեղ էին հասնում, հիմա 300-400 կմ պետք է անցնեն։ Սա օրհասական խնդիր է, օր առաջ պետք է բարձրաձայնվի»,-ասաց պատգամավորը:

Հարցին՝ արդյոք պատասխանատվություն չի զգում պատերազմի եւ դրա հետեւանքների համար, Թագուհի Թովմասյանը պատասխանեց.
«Ես եթե պատասխանատվությունից խուսափելու ցանկություն ունենայի, կշարունակեի նույն թիմում մնալ, բայց ես սովոր եմ պատասխանատվություն կրել այն ամենի համար, ինչից տեղյակ եմ, ինչ հասկանում եմ և կարող եմ բացատրել: Այն ինչ այսօր կատարվում է մեր երկրում, ոչ մի բացատրություն չունի, դրա համար ես դուրս եմ եկել՝ ի նշան բողոքի: Մինչև պատերազմը ամեն ինչի համար պատասխանատվությունը կիսում եմ»,-հայտարարեց նախկին իմքայլական պատգամավորը։ 

Անկախ պատգամավորը չցանկացավ մեկնաբանել Փաշինյանի հայտարարությունը Շուշիի վերաբերյալ, ընդամենը փաստելով հետևյալը.

«Շուշին հայկական քաղաք է, իմ ամենասիրելի քաղաքներից է և ես ամեն անգամ կարոտով ու ափսոսանքով եմ հիշում Շուշին»:

Թագուհի Թովմասյանը կարծում է՝ ներկա քաղաքական գործընթացները չեն տանի վարչապետի փոփոխությանը.
«Երկու կողն էլ՝ իշխանությունը եւ ընդդիմությունը նահանջել են, ցավալիորեն պետք է շարունակենք այն իրավիճակում, ինչ իրավիճակ ունենք»,- նշեց նա։

Աղբյուր` Փաստինֆո