Փաստ ինֆո

Վարչապետի ելույթն ամբողջովին խեղաթյուրվել է։ Խեղաթյուրված է ներկայացվել և՛ մամուլում, և՛ ընդդիմադիր քաղաքական գործիչների խոսքում։ Այս մասին լրագրողների հետ ճեպազրույցի ժամանակ ասաց ԱԺ «Իմ քայլը» խմբակցության պատգամավոր Ռուբեն Ռուբինյանը՝ անդրադառնալով վարչապետի՝ Շուշիի վերաբերյալ հայտարարությանը։

«Ընդհանրապես այդ հարցուպատասխանի թեման Շուշիի հայկական կամ ադրբեջանական լինելը չի եղել։ Շուշին պատմական հայկական քաղաք է, և դա պատմագիտական փաստ է։ Տիկին Զոհրաբյանը հարց է ուղղել վարչապետին՝ ասելով, որ հոկտեմբերին վարչապետը կարող էր համաձայնվել Շուշի փախստականների վերադարձի պայմանով պատերազմը կանգնեցնելուն, հետևաբար Շուշին կմնար հայկական։ Ինչին ի պատասխան վարչապետն ասել է, որ և՛ պատերազմի ընթացքում, և՛ պատերազմից առաջ ամբողջ բանակցային գործընթացի մաս է եղել փախստականների վերադարձը, ընդ որում այն փախստականների, որոնք փախստական էին դարձել 90-ականների պատերազմի ընթացքում, իսկ պատերազմից առաջ Շուշիի բնակչության մոտ 90 տոկոսն ադրբեջանցիներ էին, հետևաբար ենթադրյալ վերադարձի դեպքում Շուշիի բնակչությունը պետք է դառնար 90 տոկոսով ադրբեջանական։

Սա ասելով վարչապետը հետադարձ հարց էր ուղղել Նաիրա Զոհրաբյանին՝ եթե համաձայնվեր Շուշի փախստականների վերադարձին, այդ պայմաններում արդյոք Շուշին շարունակելու էր մնալ հայկական։ Այս խոսակցությունն ընդհանրապես Շուշիի հայկական լինել-չլինելու՞ մասին էր, թե՞ փախստականների վերադարձի արդյունքում Շուշիի փաստացի վերահսկողության»,-ասաց պատգամավորը։

Վերջինս նշեց, որ մամուլի և ընդդիմադիր դաշտի զգալի հատվածը գիտակցաբար խեղաթյուրել են վարչապետի ասածը։

Աղբյուր` Փաստինֆո