Փաստ ինֆո

«Հավաքվել ենք այստեղ, որպեսզի այս թուրքա-ադրբեջանական արտադրության ուսապարկերի ժողովին բացատրենք, որ չի կարելի այն դեպքում, երբ դուք ունեք բազմաթիվ գերիներ, որոնց անուններն անգամ չգիտեք, եկել ԲԴԽ անդամներ եք ընտրում»,- այս մասին Բարձրագույն դատական խորհրդի անդամների ընտրության դեմ քաղաքացիների բողոքի ակցիայի ժամանակ ասաց «Հայրենիք» կուսակցության քաղաքական խորհրդի անդամ Արսեն Բաբայանը։ 

Վերջինս չցանկացավ խոսել թեկնածուների անձերի մասին, սակայն նշեց, որ նրանցից մեկը Սորոսի հիմնադրամի գլխավոր տնօրենի պաշտոնն է զբաղեցրել, ՀՔԾ պետ Սասուն Խաչատրյանի հարազատ եղբայրն է։

«Հավանաբար Սասուն Խաչատրյանի «անուրանալի» ծառայությունների համար փորձում են եղբորը վարձահատույց լինել»։

Բաբայանը ենթադրում է, որ իշխանությունը փորձում է ցույց տալ, թե իբր ՀՀ-ում չկան խնդիրներ, պատերազմից հետո գոյություն չունեն հրատապ հարցեր, օրինակ՝ մարդկանց տներ կորցնելուց չեն պաշտպանում կամ գերիների վերադարձով չեն զբաղվում։

«Հիմա հավաքվել են այստեղ ու որոշում են Դատական խորհրդի թեկնածու պիտի առաջադրեն, այն դեպքում, երբ վերջերս ընդունեցին մի օրենք, որով փորձում են ստեղծել նոր դատարան՝ իրենց ծառայող նոր դատավորներով և մենք գիտենք, որ ունենք լավ ու անկախ դատավորներ»։

Բաբայանն ասում է՝ ԲԴԽ միջոցով փորձելու են այդ դատավորների նկատմամբ ճնշում գործադրել։ Ի վերջո, այս ամենը միտված է լռեցնելու ընդդիմությանը։

«Երբ որ ինձ նորից ապօրինի կկալանավորեն կամ կձերբակալեն, ուզում են այնպես անել, որ չլինի հանկարծ որևէ դատավոր, որ կհամարձակվի հանկարծ այդ գործողությունները ոչ իրավաչափ համարել»,- ասաց Արսեն Բաբայանը։

Աղբյուր` Փաստինֆո