Փաստ ինֆո

Ադրբեջանն ի տարբերություն մեզ շարունակում է իր ակտիվ գործունեությունը միջազգային հարաբերություններում, զբաղվում է ակտիվ դիվանագիտությամբ և բնական է, որ նման ակտիվությունը հաջողելու է։ «Փաստինֆո»-ի հետ զրույցում այս մասին ասաց միջազգայնագետ Սուրեն Սարգսյանը՝ անդրադառնալով G20 գագաթնաժողովին Ադրբեջանին հրավիրելու մասին տեղեկությանը։ 

Սուրեն Սարգսյանի գնահատմամբ Հայաստանի արտաքին քաղաքականությունը, դիվանագիտությունը տոտալ տապալված են։

Հարցին՝ ինչպե՞ս պետք է արձագանքի Հայաստանը, որը պատերազմի ողջ ընթացքում բարձրաձայնում ու միջազգային հանրությանն էր ներկայացնում Ադրբեջանի կողմից իրականացվող պատերազմական հանցագործությունները, Սուրեն Սարգսյանը նկատեց՝ Հայաստանը որևէ արձագանք ներկայացնելու ունակություն չունի․ «Մենք նույնիսկ ադրբեջանցիներին չենք կարողանում պատասխանել, երբ նրանք մեզ սպառնում են։ Մեր իշխանությունները վախենում են Ադրբեջանին պատասխանեն, երբ նրանց կողմից սպառնալիքներ են հնչեցվում Հայաստանի անվտանգության հասցեին։, այնպես որ այստեղ առանձնապես ոչինչ պետք չէ ակնկալել։ Ունենք մի իրավիճակ, երբ ամեն ինչ տապալել ենք և կարծում եմ, որ ունակ չենք որևէ բան ասել կամ անել»,-նշեց միջազգայնագետը։

Դիտարկմանը՝ արդյոք միջազգային հանրությունը մեզ որպես երկիր, ինչ-որ բանի ունակ սուբյեկտ չի՞ ընկալում, Սուրեն Սարգսյանը նկատեց՝ եթե դիտարկենք, թե որքան ենք դուրս մնացել միջազգային հարաբերություններում տեղի ունեցող բոլոր գործընթացներից, տապալել արտաքին քաղաքականությունը, սուբյեկտայնությունը, ապա մեզ նայում են այնպես, ինչպես կանք։

«Ադրբեջանն ի տարբերություն մեզ ակտիվ աշխատում է և կարողանում արձանագրել իր ուզած արդյունքները, իսկ մենք չենք կարողանում արձանագրել մեր ուզած արդյունքները, որովհետև ունակ չենք արտաքին քաղաքականության մեջ էֆեկտիվ աշխատել»,-նշեց Սուրեն Սարգսյանը։

Նշենք, որ Ադրբեջանը հրավիրվել է 2021թ․-ի հոկտեմբերի 30-31-ին Հռոմում կայանալիք գագաթնաժողովին։ Այս պահի դրությամբ գագաթնաժողովին հրավիրվել է ևս 38 երկիր, այդ թվում Դանիան, Լաոսը, Շվեդիան, Զիմբաբվեն։

«Փաստինֆո»-ն հարցում է ուղարկել ՀՀ արտաքին գործերի նախարարություն ՝ այս հարցի վերաբերյալ ԱԳՆ-ի դիրքորոշումը պարզելու նպատակով։

Աղբյուր` Փաստինֆո