Փաստ ինֆո

«Որևէ իշխանության ներկայացուցչից չեք լսել ու չեք լսի, որ վախենում ենք պատերազմի հարցով քննիչ հանձնաժողով ստեղծել»,- այս մասին ԱԺ-ում լրագրողների հետ ճեպազրույցում նշեց «Իմ քայլը» խմբակցության պատգամավոր Հրաչյա Հակոբյանը, հիշեցնելով վարչապետի խոսքերը, երբ պնդում էր, թե իբր լինելու է քննություն պատերազմի մասին։ 

Իշխող ուժն արտահերթ ընտրությունների էլ դեռ չի պատրաստվում։ Հանդիպումները շարունակվում են։ Այս պահին չեն պատրաստվում շտապել այդ հարցում. «Ընտրություններին չենք պատրաստվում, որովհետև քննարկումները շարունակվում են»,- ասաց պատգամավորը։

Հրաչյա Հակոբյանը վստահ է, որ դժվար թե լինեն պատգմավորներ, որոնք պատեհ պահի կողմ կքվեարկեն օրինակ՝ Էդմոն Մարուքյանի թեկնածությանը։

«Չեմ կարծում, որ մեր այսօրվա խմբակցությունում կան այդպիսի պատգամավորներ։ Եթե անգամ լինեն, ապա շատ քիչ, որովհետև չեմ կարող հիմա բացառել ամեն ինչ։ Եթե լինեն, ապա մեկ կամ երկու հոգի»։

Իշխող ուժի պատգամավորը հակված է մտածելու, որ խմբակցությունը լքող նոր պատգամավորներ էլ չեն լինի։ Նա վստահ է, որ անգամ եթե լինեն, ապա կրկին ՝ շատ քիչ։ 

Հակոբյանն անպատասխան թողեց հարցը, թե ինքն արդյոք  խմբակցությունը լքած պատգամավորներին դավաճան համարո՞ւմ է։
«Համենայնդեպս, իրենց արած քայլը դրական չեմ բնորոշի, որովհետև տարբեր խոսակցություններ են եղել, տարբեր քննարկումներ եղել, իրենք էլ բազմիցս համարել են, որ իրենց ստացած քվեն իրենցը չէ, իրենք չեն վաստակել այդ քվեն»։

Պատգամավոր Հայկ Սարգսյանի՝ վերջերս լրագրողի հանդեպ դրսևորած վարքագիծը կարծես խորհրդարանում չեն պատրաստվում ուսումնասիրել, չի ստեղծվի նաև էթիկայի հանձնաժողով։ Հակոբյանն ասում է, որ եթե հանձնաժողովը գործի, ապա առաջինը պետք է քննի ընդդիմադիրների վարքագիծը։

«Եթե էթիկայի հանձնաժողով ստեղծելու մասին խոսենք, մինչև Հայկ Սարգսյանին հասնելը, կան բազմաթիվ պատգամավորներ, այդ թվում նաև մեծամասամբ ընդդիմադիր խմբակցություններից, որ նախ և առաջ էթիկայի հանձնաժողովը պետք է ստեղծվի իրենց համար։ Կոնկրետ դեպքի համար եմ ասում»,- եզրափակեց Հակոբյանը։

Աղբյուր` Փաստինֆո