Փաստ ինֆո

Արդյոք չեք կարծում, որ քաղաքական և բարոյական պատասխանատվությունը ենթադրում էր, որ նոյեմբերի 10-ին այդ կապիտուլյացիոն ցեղասպանությունից հետո, ամենախայտառակ փաստաթուղթը ստորագրելուց հետո պետք է Ձեր իշխանությունը հրաժարական տար։ Դուք չե՞ք կարծում, որ Դուք չեք կարող լինել համաշխարհային պատմության մեջ այն բացառիկ նախադեպը, որ նման կապիտուլյացիայից հետո պետք է հրաժարական չտաք։ Խոսքը բացարձակապես բարոյական պատասխանատվության մասին է։ Այս մասին ԱԺ-ում հայտարարել է ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը՝ դիմելով Նիկոլ Փաշինյանին։

«Շաբաթներ առաջ ինքներդ Ձեզ ուղիղ եթերում հարց տվեցիք՝ ասելով, որ Դուք պատասխանատուն եք, բայց արդյոք Դուք մեղավորն եք։ Այո՛, Դուք մեղավոր եք, որ Հայաստանը և Արցախը տարաք երաշխավորված պարտության, Դուք մեղավոր եք, որ հնարավորություն կար պատերազմի չորրորդ, հինգերորդ, քսաներորդ օրը կանգնեցնել այս կործանարար պատերազմը, ունենալ ավելի քիչ տարածքային կորուստներ և ավելի քիչ զոհեր, ինչն ասել են Ձեզ թե՛ ԳՇ պետը, թե՛ ԱԱԾ նախկին պետի պաշտոնակատարը, թե՛ ՌԴ նախագահը, Դուք դա չեք արել, որովհետև այդ դեպքում Ձեզ կասեին՝ Նիկոլ, դավաճան։Այո, Դուք մեղավոր եք 5000 զոհերի համար, մեղավոր եք տասնյակ հազարավոր անտուն մնացած արցախցիների համար, մեղավոր եք հաշմմված մեր երիտասարդների համար»,- նշեց Զոհրաբյանը։

Նիկոլ Փաշինյանն էլ արձագանքեց՝ նշելով, թե ավելի քիչ հողային կորուստներով պատերազմը կանգնեցնելու հնարավորություն չի եղել, դա միֆ է, ինչպես այն, որ պատերազմը կանգնեցնելու ուղղությամբ քայլեր չեն ձեռնարկվել։ Փաշինյանը նշեց, որ ետին թվով շատ հայտարարություններ են արվում և ինքը ետին թվով արձանագրում է, որ ՀՀ քաղաքական ուժերի մեծամասնությունը տարածքները զիջելու կողմնակից է եղել, բայց չի բարձրաձայնել այդ մասին։

«Ես չեմ ասել, որ մեղավոր չեմ, ասել եմ, որ ես թիվ մեկ պատասխանատուն եմ և հարց եմ տվել՝ արդյո՞ք ես թիվ մեկ մեղավորն եմ։ Այո, ես պատասխանատուն եմ և ես այսօր էլ կրում եմ այդ պատասխանատվությունը, որովհետև այդ պատասխանատվությունը նոյեմբերի 9-ով չի ավարտվում, դա շարունակվում է մինչև օրս։ Արդյո՞ք գտնում էինք, որ պետք է հրաժարական տանք։ Եթե գտնեինք այդպես, հրաժարական կտայինք և դա կլիներ շատ հեշտ լուծում»,- նշեց վերջինս՝ ավելացնելով, որ կկրեն պատասխանատվությունը՝ ժողովրդի առաջ։

Նրա խոսքով՝ պատասխանատվության մաս է նաև ժողովրդին պատկանող իշխանությունը պահպանել այնպես, որ որևէ մեկը ժողովրդի իշխանությունը չխլի այնպես, ինչպես երկար ժամանակ ՀՀ-ում խլված է եղել։

Նաիրա Զոհրաբյանն էլ ընդգծեց, որ Փաշինյանի պատասխանից կարելի է երեք արձանագրում անել. առաջին՝ ԳՇ պետը ստում էր, երբ ասում էր, որ չորրորդ օրը զեկուցել է պատերազմը կանգնեցնելու անհրաժեշտության մասին, որովհետև կունենանք շատ ավելի մեծ զոհեր և բանակցային գոևրծընթացում շատ ավելի վատ պայմաններ, երկրորդ՝ ՌԴ նախագահը ստում էր, երբ ասում էր, որ հոկտեմբերի 18-ին առաջարկել է շատ ավելի շահեկան պայմաններում դադարեցնել պատերազմը և Շուշին կարող էր մնալ մեր վերահսկողության ներքո, երրորդ՝ կարող ենք արձանագրել, որ Փաշինյանը չի կրում բարոյական պատասխանատվությունը և հրաժարական չի ներկայացնի։

Փաշինյանն էլ հայտարարեց, որ չի եղել քննարկման այնպիսի տարբերակ, որ ադրբեջանցի փախստականները Շուշի չվերադառնան, իսկ Շուշին հակամարտությունից և ազատագրումից առաջ ունեցել է 90 և ավելի տոկոս ադրբեջանցի բնակչություն։

«Այսինքն՝ Դուք ուզում եք ասել, որ 90 և ավելի տոկոս ադրբեջանցի բնակչություն ունեցող Շուշի քաղաքը հայկական է՝ իր այդ կարգավիճակով, հետո էլ ասում եք՝ բա հայտարարել ես, որ Արցախը Հայաստան է։ եթե դուք համարում եք, որ Արցախը Հայաստան չէ և դա ձեր դիրքորոշումն է, ձևակերպեք և պաշտոնապես արձանագրեք»,- հայտարարեց Փաշինյանը։

Աղբյուր` Փաստինֆո