Փաստ ինֆո

Երևանի ընդհանուր իրավասության դատարանը՝ դատավոր Տաթևիկ Ստեփանյանի նախագահությամբ, մասնակի բավարարել է ՀՀ ԶՈՒ ԳՇ նախկին պետ Յուրի Խաչատուրովի հայցն ընդդեմ քաղաքագետ Ստեփան Գրիգորյանի՝ պարտավորեցնելով Գրիգորյանին հերքել զրպարտություն հանդիսացող տվյալները։ Այս մասին

«Փաստինֆո»-ն տեղեկացավ Յուրի Խաչատուրովի ներկայացուցիչ, փաստաբան Անահիտ Սարգսյանից։

Հիշեցնենք, որ ՀԱՊԿ նախկին քարտուղար, ՀՀ ԶՈՒ ԳՇ նախկին պետ Յուրի Խաչատուրովը քաղաքագետ Ստեփան Գրիգորյանի դեմ հայցադիմում է ներկայացրել՝ պահանջելով հերքել զրպարտություն հանդիսացող տվյալները և 2 մլն դրամի չափով փոխհատուցում։

Հայցադիմումի պատճառ է դարձել 2018թ մայիսի 30-ին Գրիգորյանի կողմից ասուլիսներից մեկի ընթացքում արված հայտարարությունները, որով, ըստ Խաչատուրովի Գրիգորյանն արատավորել է իր պատիվն ու արժանապատվությունը։ Նշենք, որ Գրիգորյանի հայտարարությունը վերաբերում է 2016թ Ապրիլյան պատերազմի ընթացքում Յուրի Խաչատուրովի գործողություններին։

Անահիտ Սարգսյանի փոխանցմամբ՝ դատարանը գտել է, որ Գրիգորյանի հայտարարություններում առկա է զրպարտություն, ամբողջությամբ սուտ տեղեկություններ էին՝ չհիմնավորված որևէ կերպ և պարտավորեցրել է Ստեփան Գրիգորյանին նույն միջոցով հերքել, այսինքն, «Ա1+»-ով մամուլի ասուլիս հրավիրել և հերքել իր կողմից հրապարակված փաստացի տվյալները, իսկ գումարային պահանջը մերժվել է ամբողջությամբ, բավարարվել է փաստաբանի ծախսը։

Գումարային պահանջը մերժելու վերաբերյալ հիմնավորում առանձնապես չկա, դատարանը գտել է, որ միայն հերքման պահանջի բավարարումը բավարար է հայցի համար, ինչի հետ փաստաբանը համաձայն չէ։

Դատական ակտի բողոքարկման հարցը դեռևս պետք է քննարկվի Յուրի Խաչատուրովի հետ, սակայն փաստաբանը գտնում է, որ պահանջը հիմնավոր էր, և, եթե նույնիսկ առավելագույն՝ 2 մլն դրամի չափով պահանջը չբավարարվեր, ապա ինչ- որ չափով պետք է բավարարվեր։

«Կարծում եմ՝ գումարային պահանջի բավարարումը շատ ավելի մեծ ազդեցություն ունի մարդկանց վրա, քան՝ հերքման։ Այսինքն, եթե մարդը գումարային առումով որևէ վնաս չի կրում, նա կարող է կրկնել նման դեպքերը, իսկ գումարային պահանջի բավարարումը կանխարգելիչ նշանակություն ունի նաև։ Ի վերջո` զրպարտվել էր ոչ հասարակ մարդ, այլ՝ բանակի հրամանատար, այդ ժամանակ ՀԱՊԿ-ի քարտուղար։ Կարևոր է, թե ում ես զրպարտում և ինչ վնաս է հասցվում, իսկ վնասը մեծ էր՝ Յուրի Խաչատուրովի բարի համբավին»,- նշեց Սարգսյանը։

Նշենք, որ նշված գործով դատավարությունը տևել է շուրջ երկու տարի և, թեև քաղաքագետը հայտարարել էր, որ անձամբ կներկայանա դատական նիստերին և իր դիրքորոշումը կներկայացնի անձամբ, վերջինս որևէ դատական նիստի այդպես էլ չի ներկայացել։

Փաստաբանը գտնում է, որ դատական ակտը կարևոր ազդեցություն կունենա հետագայի համար, որովհետև Ստեփան Գրիգորյանն ինքն էլ հասարակ մարդ չէ և այլ հարց է, երբ երկու սովորական, ֆիզիկական անձինք վիրավորում և զրպարտում են՝ երրորդ անձի ներկայությամբ և բոլորովին այլ հարց է, երբ քաղաքագետ Ստեփան Գրիգորյանը, որն ունի ճանաչում, զրպարտում է ԳՇ պետին կամ ՀԱՊԿ-ի գլխավոր քարտուղարին։

«Կարծում եմ՝ քաղաքագետի համար շատ դժվար է հոգեբանորեն։ Նա, լինելով լուրջ անձնավորությունը, պետք է հրավիրի մամուլի ասուլիս և հասարակության ներկայությամբ հայտարարի, որ ստել է, նման բան չի եղել և ինքը հորինել է»,- նշեց նա՝ հավելելով, որ դա կարող է հետագայում ազդեցություն ունենալ նաև Գրիգորյանի առումով, վերջինս նման հայտարարություններ անելիս ավելի երկար կմտածի՝ կարող է արդյոք հիմնավորել իր խոսքերը, թե ոչ։

Նրա խոսքով՝ դատական ակտերը կարևոր ազդեցություն կարող են ունենալ հասարակության մթնոլորտի համար, հատկապես հիմա, երբ յուրաքանչյուրն առանց մտածելու վիրավորում, անվանարկում են։

Ինչ վերաբերում է Անդրանիկ Քոչարյանի՝ օրերս արված հայտարարությանը, թե Ապրիլյան պատերազմի քննիչ հանձնաժողովի 97 էջից բաղկացած զեկույցը հասանելի կլինի բոլորին, Սարգսյանը նշեց, որ, եթե զեկույցը լինի հրապարակային, կլինի ոչ ամբողջությամբ, քանի որ պետական գաղտնիք հրապարակելն արգելվում է, սակայն խնդիրներ կան հանձնաժողովի եզրակացության մասով, որովհետև օրենքով սահմանված բոլոր ժամկետները խախտվել են և չկա որևէ հիմնավորում, թե ինչու է այդքան ուշ հրապարակվում այն։

Դիտարկմանը, որ Անդրանիկ Քոչարյանը եզրակացության հրապարակման ձգձգումը պայմանավորել է երկրում ստեղծած պատերազմական իրավիճակով՝ Սարգսյանը նշեց, որ դա ծիծաղելի է, քանի որ նախատեսվում է 6 ամիս և ևս 6 ամսով երկարացնելու հնարավորություն, իսկ արդեն երկարաձգված ժամկետն ավարտվում էր սեպտեմբեր ամսին և այնպես չէ, որ քննիչ հանձնաժողովի անդամները պատերազմում էին, մասնակցում էին պատերազմին։

«Պատգամավորներ էին, իրենք իրենց տեղում նստած աշխատում էին։ Քննությունը վաղուց ավարտվել էր և ինչպես հիշում ենք՝ բոլորը գնացել էին, այդ թվում՝ ՀՀ երրորդ նախագահ Սերժ Սարգսյանը և իրենց մնում էր ընդամենն այդ հարցերը համադրել և եզրակացություն տալ»,- նշեց նա՝ հավելելով, որ յուրաքանչյուրը պետք է իր գործն անի և քննիչ հանձնաժողովի անդամներից որևէ մեկը պատերազմական գործողություններին չի մասնակցել։

Հեղինակ՝ Իզաբել Սահակյան

Աղբյուր` Փաստինֆո