Փաստ ինֆո

Վերջերս Ադրբեջանը մի քանի անգամ պնդել է, որ ԼՂ հակամարտությունը փաստացի լուծվել է: Ալիևը Շուշիում հանդես եկավ հերթական հայատյաց ելույթով և ասաց, որ Հայաստանում ռևանշի մասին մտածողները բախվելու են երկաթյա բռունցքի: ԱԳՆ-ն մի քանի հայտարարություններ տարածել է, այնուհանդերձ, կցանկանամ շեշտեք՝ ի՞նչ դիրքորոշում ունի ԱԳՆ-ն, և որոնք են այն առաջնահերությունները, որոնք ունի ԱԳՆ-ն խաղաղ գործընթացի համատեքստում: ԱԺ-ում կառավարության հետ հարցուպատասխանի ժամանակ ԱԳ նախարարին նման հարց ուղղեց «Իմ քայլը» խմբակցության պատգամավոր Տաթևիկ Հայրապետյանը:

ԱԳ նախարարն էլ, հարցին ի պատասխան, վկայակոչեց ԱԳՆ խոսնակի անդրադարձը Շուշիում նախագահ Ալիևի կողմից հնչեցված հայտարարությունների կապակցությամբ.

«Մենք վստահ ենք, որ պրն. Ալիևի հայտարարույթունները իրարամերժ են, որովհետև նա մի կողմից նշում է, որ հակամարտությունը լուծված է, մյուս կողմից նախաձեռնում է հակամարտությունը բորբոքող հայտարարություններ, ինչը վկայում է, որ հակամարտությունը մտել է նոր փուլ, որտեղ անհրաժեշտ է հայկական կողմերի միասնական օրակարգ ձևավորելու անհրաժեշտությունը»,-ասաց ԱԳ նախարար Արա Այվազյանը:

Այս առումով ԱԳ նախարարը կարևորեց նաև իր այցը Արցախ, որտեղ քննարկվել է ընդհանուր օրակարգ ձևավորելու և աշխատանքները համադրելու անհրաժեշտությունը:

Խոսելով հայկական կողմի առաջնահերթությունների մասին՝ ԱԳ նախարարը չնշեց Արցախի կարգավիճակի հարցը:
Արա Այվազյանը նշեց, որ Հայաստանը պատրաստ է սկսել բանակցությունները Մինսկի խմբի համանախագահների ֆորմատով և բանակցություններ վարել այն հիմնարար սկզբունքերի շուրջ , որոնց վերաբերյալ նախկինում էլ ձեռք է բերվել համաձայնություն.

«Մեզ համար առաջնային հարց է դեօկուպացիան և դրա հետ կապված հայ ազգաբնակչության անվտանգ վերադարձը իր բնակավայրերը, երրորդ՝ միջազգային հանրության կողմից հումանիտար աջակցության անխափան ապահովումը Արցախին, և չորրորդը վերաբերում է մեր մշակութային և կրոնական ժառանգության պահպանմանը»,-ԱԺ-ում ելույթի ժամանակ ասաց Արա Այվազյանը:

Աղբյուր` Փաստինֆո