Փաստ ինֆո

ԱԺ պատգամավոր, հանքարդյունաբերության ոլորտն ուսումնասիրող քննիչ հանձնաժողովի նախագահ Սերգեյ Բագրատյանն այսօր լրագրողների հետ զրույցում ներկայացրեց ՊԵԿ նախկին նախագահ Դավիթ Անանյանին հանձնաժողովի նիստին հրավիրելու գրությունը։ 

Հիշեցնենք, որ հունվարի 19-ին քննիչ հանձնաժողովի զեկույցը ներկայացնելու ժամանակ Սերգեյ Բագրատյանն ասել էր, որ մի քանի անգամ ՊԵԿ նախկին նախագահ Դավիթ Անանյանին հրավիրել է հանձնաժողովի նիստին, սակայն վերջինս չի ներկայացել։ Ավելի ուշ Դավիթ Անանյանը ֆեյսբուքյան գրառման միջոցով անդրադարձել էր պատգամավորի հայտարարությանն ու ասել, որ դա իրականությանը չի համապատասխանում։

«Դավիթ Անանյանի հրավերքն ապացուցելու համար ներկայացնում եմ թղթային և էլեկտրոնային տարբերակներով ուղարկած գրությունները։ Մեզ համար շատ կարևոր էր հասկանալ, թե X ընկերության ծախսային մասում կան հավելագրումներ, թե ոչ։ Այդ պարզաբանումը կարող էր տալ միայն ՊԵԿ-ը, որի պատասխանն այդպես էլ չստացանք և չկարողացանք ապացուցել տվյալ գործընթացի հավաստիությունը»,-ասաց պատգամավորը։

Հարցին՝ ու՞մ է պատկանում X ընկերությունը և արդյոք այստեղ միտում է տեսնում, Սերգեյ Բագրատյանը նկատեց՝ քանի որ ապացույց չունի, կդժվարանա խոսել միտումի առկայության մասին։ Խոսքը գնում է հայտնի ընկերության՝ «Լիդիան Արմենիա»-ի մասին, որի ներկրումների հետ կապված խնդիրներ կային, ինչն ապացուցելու համար անհրաժեշտ էր մաքսային մարմիններից ու ՊԵԿ-ից հստակ տվյալններ ունենալ․

«2000-ից ավել ջահերի ներկրման մասին էր խոսքը և ցանկանում էինք հասկանալ, թե այդ ջահերն ինչ նպատակով պետք է օգտագործվեն այդ ոլորտում։ Դրա ապացույցը չկարողացանք ներկայացնել, որովհետև պատկան մարմինը չներկայացավ՝ բացատրություններ տալու։ Մենք քննիչ հանձնաժողովների աշխատանքը լիակատար չենք կարող կազմակերպել, եթե չլինի պատկան մարմինների օժանդակությունը։ Հենց այդ մասին էր իմ զեկույցում նշված փաստը, որն իշխանության կողմից որակվեց որպես ոչ պատշաճ կատարված աշխատանք, այնինչ դրա պատասխանատուն կոնկրետ իշխանության կողմից ձևավորված կառավարության անդամն էր»,-նշեց Սերգեյ Բագրատյանը։

Վերջինս նկատեց՝ գուցե Դավիթ Անանյանը տեղյակ չի եղել նրա ուղարկած գրությունների մասին, բայց դրանք ուղարկվել են։

Աղբյուր` Փաստինֆո