Փաստ ինֆո

«Վիգենն այն քիչ արվեստագետներից էր, որ ոչ մի կերպ չհարմարվեց այս իշխանությունների և նրանց վարած քաղաքականության հետ, ինչը նա բացահայտ կերպով ցույց էր տալիս՝ հրապարակային պայքարի ելնելով նրանց դեմ», - ասում է մուլտիպլիկատոր Դավիթ Սահակյանցը՝ «Փաստինֆո»-ի հետ զրույցում խոսելով կյանքից հեռացած իր ընկերոջ և վաղեմի բարեկամի՝ բեմադրիչ, դերասան Վիգեն Ստեփանյանի մասին:

Հունվարի 19-ին 58 տարեկան հասակում կյանքից հեռացել է դերասան, բեմադրիչ, ՀՀ արվեստի վաստակավոր գործիչ, Վիգեն Ստեփանյանը:

Դավիթ Սահակյանցը հիշում է՝ Վիգենի հետ ընկերությունը երկար տարիների պատմություն ուներ, նա ոչ միայն իր, այլև հոր՝ մուլտիպլիկատոր Ռոբերտ Սահակյանցի մտերիմ ընկերն էր. «Ցավոք, Վիգենի անսպասելի մահով կիսատ մնացին նաև մեր համատեղ պլանները: Արդեն ավարտել էինք «Օլիմպիկոս» լիամետրաժ ֆիլմի աշխատանքները, որտեղ Վիգենը պատմիչին էր ձայնավորել: Կովիդի դաժան օրերին նա Ջերմուկից գալիս հասնում էր Երևան, որ ֆիլմի աշխատանքները չընդհատվեն: Վիգենի հետ համագործակցությունը ընդգծված ջերմ մթնոլորտում էր անցնում: Շատ եմ ցավում, որ չտեսավ մեր համատեղ աշխատանքի երկար սպասված արդյունքը:

Պլանավորել էինք, որ անցնող տարվա մայիսին ֆիլմի պրեմիերան էինք անելու, բայց համավարակը, հետո նաև պատերազմը փոխեցին մեր պլանները: Շատ եմ ցավում՝ չհասցրի ընկերոջս հետ քննարկել նաև նոր կարճամետրաժ նախագծի առաջարկը, որ ուզում էի կրկին միասին անեինք»,- ասում է մուլտիպլիկատորը:

Դավիթ Սահակյանցը նկատում է՝ վերջերս առավել հաճախ ընկերոջն ընդդիմադիր հարթակներից էր տեսնում, քան հասցնում էր շփվել նրա հետ. «Վիգենը շատ վշտացած էր վերջին երկու տարիների ընթացքում մեր երկրում կատարվող իրադարձություններից: Մենք շատ էինք խոսում այդ մասին՝ քննարկում իրավիճակը: Նա ոչ մի կերպ չէր հարմարվում այն ամենի հետ, որ կատարվում էր մեր երկրի ներսում: Ինչ – որ պահից սկսած, Վիգենը որոշեց մասնակցել իշխանության դեմ կազմակերպվող հանրահավաքներին ու ակցիաներին: Մենք միասին գնացինք սատարելու նաև ԿԳՄՍ նախկին նախարար Արայիկ Հարությունյանի հրաժարականը պահաջող դաշնակցական երիտասարդների կազմակերպած և օրեր շարունակվող ակցիային: Վիգենը կոնկրետ դիրքորոշում ուներ, նա դժգոհ էր և չէր թաքցնում դա: Պատերազմի արդյունքն էլ՝ իր հերթին, ուղղակի ցնցեց նրան, ինչպես նաև մեզ՝ շատերիս: Վերջին երկու ամիսների ընթացքում Վիգենը ճնշող հիասթափության և խորը դեպրեսիայի մեջ էր: Ցավոք, այդպիսի հոգեվիճակում էլ նա հեռացավ մեզանից…»,- եզրափակում է զրույցը մուլտիպլիկատոր Դավիթ Սահակյանցը:

Հեղինակ՝ Նվարդ Մանվելյան

Աղբյուր` Փաստինֆո