Փաստ ինֆո

Տարին դեռ չսկսված Երեւանի քաղաքապետը արձակուրդում է, արդյունքն այն է, ինչ տեսնում ենք. Մայրաքաղաքում ձնամաքրման աշխատանքները տապալված են։

«Քաղաքապետը գտնվում է արձակուրդի մեջ և, չեմ բացառում, որ նա բացակայում է երկրից: Համենայն դեպս, քաղաքապետարանում այդպես են ասում՝ նա գտնվում է Չեխիայի Հանրապետությունում: Ինչ վերաբերում է քաղաքում ստեղծված իրավիճակին, ապա, առատ տեղումներով պայմանավորված, Երևանում իրավիճակն, իսկապես, բարվոք չէ, - «Փաստինֆո»-ի հետ զրույցում ասել է Երևանի ավագանու «Լույս» խմբակցության ղեկավար Դավիթ Խաժակյանը՝ պատասխանելով առատ տեղումների հետևանքով կաթվածահար եղած մայրաքաղաքի և ստեղծված իրավիճակում պատասխանատուների վերաբերյալ հարցին։ Նրա արձանագրմամբ՝ ստեղծված այս վիճակը վատ համակարգված աշխատանքի հետևանք է:

«Այս տարիների ընթացքում երբևէ այսքան մեծ քանակությամբ ձնամաքրման տեխնիկա մեր քաղաքը չի ունեցել, բայց քանի որ մենք ինքներս ենք տեսնում, որ երեկվանից սկսած, ձնամաքրման աշխատանքներն ուղղակի արդյունք չեն տալիս, հետևաբար, կարելի է ենթադրել, որ աշխատանքը վատ է կազմակերպվում՝ թե ինչպե՞ս կգնա այդ տեխնիկան, ո՞ր փողոցներով կկատարի աշխատանքը, որպեսզի այն համակարգված և արդյունավետ լինի, պարզ չէ»,- ասաց նա:

Ըստ Խաժակյանի՝ քաղաքապետարանի համապատասխան բաժինն ինչ–որ քայլեր անում է, Երևանը ձյան շերտերից մաքրելու և քաղաքի փողոցները երթևեկելի, անվտանգ ու անցանելի դարձնելու համար, բայց, քանի որ քաղաքապետն այստեղ չէ, վերահսկողությունն ըստ պատշաճի չի կատարվում. «Քաղաքապետն անձամբ պետք է վերահսկեր աշխատանքը, նա պետք է տեղում լիներ, բայց քանի որ Հայկ Մարությանը տարին դեռ չբացված, հերթական արձակուրդի մեջ է, արդյունքն այն է, ինչ մենք տեսնում ենք: Քաղաքապետարանում հույսը դրել են եղանակային պայմանների բարելավման վրա, որ եղանակը կտաքանա և ձյունը հալվելով կմաքրվի», -ասում է Երևանի ավագանու «Լույս» խմբակցության ղեկավար Դավիթ Խաժակյանը:

Հեղինակ՝ Նվարդ Մանվելյան

Աղբյուր` Փաստինֆո