Փաստ ինֆո

Իշխանական շրջանակներից հաճախ է շրջանառվում այն թեզը, որ տրանսպորտային հաղորդակցությունների վերականգնումը Հայաստանի շահերից է բխում։ Պետք է փաստենք, որ Ադրբեջանի կողմից հակահայկական և թշնամական հռետորաբանությունը չի փոխվել։ Այս բոլոր խնդիրների առկայության պայմաններում ո՞վ և ինչի՞ հիման վրա է որոշել երկրի շահի առկայությունը։ Այս մասին ԱԺ-ում ասաց «Լուսավոր Հայաստան» խմբակցության պատգամավոր Արկադի Խաչատրյանը՝ դիմելով ՀՀ վարչապետ Նիկոլ Փաշինյանին։

Պատգամավորի հարցին, սակայն, պատասխանեց ՀՀ փոխվարչապետ Մհեր Գրիգորյանը՝ նշելով, որ տնտեսական և տրանսպորտային ապաշրջափակման պարագայում չկա որևիցե բաղադրիչ, որը չպետք է հաշվի առնվի․

«Այնուամենայնիվ, որպեսզի այդ ճանապարհով գնանք, պետք է հարթակ ձևավորվի, որտեղ այդ հարցերը պետք է քննարկվեն, իմպուլսներ ստացվեն, դրանց հակաիմպուլսները ձևավորվեն, որպեսզի հնարավոր լինի ապաշրջափակել տնտեսությունը և տրանսպորտային ապաշրջափակման խնդիրը լուծել։

Անձամբ կարծում եմ, որ այդ խնդիրը պետք է լուծվի։ Հակառակ դեպքում դա մեզ ավելի վտանգավոր իրավիճակում է դնում, քան այդ խնդրի լուծումը։ Այդ խնդրի ճիշտ լուծումն անվտանգության երաշխիք կարող է լինել»,-ասաց Մհեր Գրիգորյանը։

Փոխվարչապետը նշեց, որ այս պահին դեռ քննարկումների փուլը չի էլ սկսել, հունվարի վերջին լինելու է առաջին հանդիպումը, որի ընթացքում պարզ կլինի այդ քննարկումների ընթացքը։

Աղբյուր` Փաստինֆո