Փաստ ինֆո

ՊՆ վարչական տարածք ավտոմեքենայով մուտք գործած Գուրգեն Վարդանյանի որդու՝ անհետ կորած համարվող Գոռ Վարդանյանի դին, հայտնաբերվել է։ Նահատակված զինվորի հուղարկավորությունը կայացել է կիրակի օրը։ Այս մասին «Փաստինֆո»-ի հետ զրույցում ասաց Գուրգեն Վարդանյանի պաշտպան Կարեն Ստեփանյանը։

Նրա փոխանցմամբ՝ Գոռ Վարդանյանի անունը պատերազմի օրերին հրապարակվել էր զոհված զինծառայողների ցուցակում, սակայն մարմինն ամիսներ շարունակ գտնել չէր հաջողվում և միայն ուրբաթ օրը ստացվել է դեկտեմբեր ամսին հայտնաբերված դիակների ԴՆԹ փորձաքննության եզրակացությունները, որոնցից պարզ է դարձել, որ հայտնաբերված մարմիններից մեկը Գոռ Վարդանյանին է պատկանում։

Հիշեցնենք, որ նոյեմբերի 10-ից հետո անհետ կորած զինվորների հարազատները ակցիաներ են իրականացնում՝ պահանջելով տեղեկատվություն իրենց զավակների մասին։ Արդեն ավելի քան 100 օր է, ինչ շատերը լուր չունեն, թե որտեղ են իրենց որդիները՝ ողջ են, թե մեռած, գերի են, թե վիրավոր։ Դեպքի օրը՝ հունվարի 10-ին, անհետ կորած զինվորների ծնողների հերթական ակցիա ընթացքում նրանցից մեկը՝ Գ. Վարդանյանը, «ՎԱԶ 2107» մակնիշի ավտոմեքենայով հարվածել է ՀՀ ՊՆ վարչական համալիրի հսկիչ անցագրային կետի դարպասին, կոտրել դրանք և մուտք գործել ՊՆ վարչական համալիրի տարածք: Ըստ պաշտոնական վարկածի՝ նա մեքենայով կոտրել է նաեւ վարչական մասնաշենքի մուտքի դռները և մեքենայով մխրճվել շինության մեջ։

Հարուցվել է քրեական գործ՝ ՀՀ ՔԿ ԶՔԳՎ 4-րդ կայազորային քննչական բաժնում՝ ՀՀ քրեական օրենսգրքի 327.6 հոդվածի 5-րդ մասով՝ ռազմական դրության կամ պատերազմի պարագայում Զորամաս կամ հատուկ պահպանվող զինվորական այլ տարածք ապօրինի մուտք գործելու և 258 հոդվածի 4-րդ մասով՝ զենքի կամ որպես զենք օգտագործվող առարկաների գործադրմամբ խուլիգանություն կատարելու հատկանիշներով, որի շրջանակներում զինվորի հայրը ձերբակալվել է։ Հունվարի 13-ին Վարդանյանին մեղադրանք է առաջադրվել՝ ՀՀ քրեական օրենսգրքի 327.6 հոդվածի 5-րդ մասի և 258 հոդվածի 4-րդ մասի հատկանիշներով։

Պաշտպան Ստեփանյանը մեզ հետ զրույցում նշեց, որ մեղադրանք առաջադրելուց հետո Վարդանյանի մասնակցությամբ որևէ քննչական գործողություն չի կատարվել, ինչը օբյեկտիվ պատճառներ ունի։ Նախ՝ մեղադրանքը նոր է առաջադրվել, իսկ բացի դա՝ հայտնաբերվել է Վարդանյանի որդու մարմինը։

Ինչ վերաբերում է առաջադրված մեղադրանքին, ապա Վարդանյանը մեղադրանքի շուրջ ցուցմունք է տվել, մանրամասն հայտնել, որ երկար ժամանակ փնտրտուքների մեջ է եղել և դեպքի օրը ևս մի քանի դիահերձարաններում է եղել։ Հունվարի 10-ին, Վարդանյանն իմացել է հայտնաբերված նոր ութ աճյունների մասին, որոնք տարբեր դիահերձարաններում են եղել, այցելել է դիահերձարաններ՝ որդուն գտնելու հույսով, սակայն հայտնաբերված բոլոր մարմիններն անճանաչելի են եղել և ոսկրացած։ Այդպես էլ որևէ տեղեկություն չստանալով՝ վերադարձել է տուն, ապա որոշել գնալ ՊՆ՝ տեղեկություն ստանալու, իսկ միջադեպը սպոնտան է եղել։ Պաշտպանը հայտնեց, որ Վարդանյանն առաջադրված մեղադրանքը չի ընդունում՝ իրավական իմաստով, այսինքն՝ չի ժխտում, որ մեքենայի ղեկին ինքն է եղել և գործողությունները կատարվել են իր կողմից, սակայն իր գործողություններում որևէ դիտավորություն չի եղել, միջադեպը նախապես ծրագրավորված չի եղել, որևէ մեկի հետ չի քննարկվել, եղել է «սպոնտան»։

Հարցին ի պատասխան, թե արդյո՞ք վարույթն իրականացնող մարմնի կողմից քննարկման առարկա է դարձվել միջադեպի պահին Վարդանյանի հոգեբանական իրավիճակը և հնարավոր աֆեկտի տարբերակը, կա արդյոք նշանակված դատահոգեբանական փորձաքննություն, պաշտպանը նշեց, որ այս պահին կա ընդամենը Վարդանյանի ցուցմունքը, որևէ այլ քննչական գործողություն կամ քննիչի կողմից կայացված որևէ դատավարական որոշում չկա։

«Այս պահին նման փորձաքննություն նշանակելու մասին որոշում չկա, սակայն դա պարտադիր պետք է քննարկման առարկա դառնա։ Չի կարող անտեսվել որևէ կերպ։ Եթե քննչական մարմինը սեփական նախաձեռնությամբ նման որոշում չկայացնի, իմ կողմից նման միջնորդություն կներկայացվի»,- նշեց Ստեփանյանը։

Հեղինակ՝ Իզաբել Սահակյան

Աղբյուր` Փաստինֆո