Փաստ ինֆո

Միջազգային հանցագործություն կատարած անձանց հետ բարեկամական հարաբերություններ սկսելն անհնար է։ Նույնն է, ինչ Ցեղասպանություն իրականացրածների հետ ՀՀ-ն նստեր և բանակցեր առևտուր անելու ինչ-որ հարցերի շուրջ։ Այս մասին քիչ առաջ ԱԺ-ում ասաց «Լուսավոր Հայաստան» խմբակցության պատգամավոր Տարոն Սիմոնյանը։ 

Պատգամավորը նկատեց՝ Ադրբեջանի ռազմաքաղաքական ղեկավարությունը միջազգային հանցագործություններ է կատարել և շարունակում է կատարել։ Ռազմագերիներին պատանդ պահելն ակնհայտ միջազգային հանցագործության դրսևորում է․ «Կառավարության և իշխող քաղաքական ուժի ներկայացուցիչներն իրենց հանրային խոսքում երբեմն այնպիսի բառապաշար են օգտագործում, որն ակնհայտորեն հակասում է ձեր կառավարության կողմից սկսած իրավական գործընթացիներին։ Միջազգային հանցագործություն կատարած անձանց հետ բարեկամական հարաբերություններ սկսելն անհնար է։ Նույնն է ինչ Օսմանյան կայսրության ղեկավարների հետ ՀՀ-ն նստեր և բանակցեր առևտուր անելու ինչ-որ հարցերի շուրջ։ Ո՞րն է պատճառը, որ կառավարության ներկայացուցիչները չեն տիրապետում այդ կարևոր խնդրին։ Արդյոք ժամանակը չէ՞, որ ներկայացնեն, թե որ հարցի հետ կապված ինչ բառապաշար պետք է օգտագործենք՝ հետագայում իրավական գործընթացներ սկսելու պարագայում խնդիր չունենանալու համար»,-ասաց Տարոն Սիմոնյանը։

ՀՀ արդարադատության նախարար Ռուստամ Բադասյանը նշեց, որ կառավարությունն անհրաժեշտ բոլոր իրավական պրոցեսները, կոնվենցիոն բոլոր գործիքներն օգտագործում է ՀՀ-ի շահերը լավագույնս ներկայացնելու համար․ «Կառավարության դերակատարումն ամեն կերպ նվազեցնելու քննարկում և միտում կա։ Անընդհատ քարոզչություն է գնում, որ կառավարությունն անգործության է մատնված, որևէ նախաձեռնությամբ հանդես չի գալիս, մինչդեռ իրականացվում են գործողություններ։ Ի՞նչ նկատի ունեք բարեկամական հարաբերություններ հաստատել ասելով, որովհետև եթե նկատի ունենանք տրանսպորտային հաղորդակցությունների մասով բանակցությունները, չեմ կարծում, որ դա այդ որակման տակ է ընկնում»,-ասաց նախարարը։

Տարոն Սիմոնյանը նկատեց՝ իրենց քաղաքական ուժի կողմից երբեք չի նշվել, որ կառավարությունն իրավական գործընթացներ չի սկսել․

«Մենք նշել ենք, որ սկսել եք։ Կան իրավական գործընթացներ, որոնք չեք սկսել, օրինակ ահաբեկչության ֆինանսավորման հետ կապված Ադրբեջանին միջազգային պատասխանատվության ենթարկելու հարցը։ Կոնվենցիոն գործիքները կան, բայց դեռևս այդ գործընթացը չեք սկսել, հուսամ՝ կսկսեք»,-ասաց պատգամավորը։

Ռուստամ Բադասյանն ասաց, որ ահաբեկչության ֆինանսավորման դեմ պայքարի մասով իրավասու մարմինը ԿԲ-ն է, որի կողմից համապատասխան միջոցներ իրականացվել են․ «ԿԲ-ի կողմից որոշակի գործընթացներ նախաձեռնվել են»,-նշեց նախարարը։

Աղբյուր` Փաստինֆո