Փաստ ինֆո

«Քաղաքապետի հրաժարականի մասին լուրերը ինտենսիվ կերպով ընթանում են ոչ միայն քաղաքապետարանում, այլև իմ ունեցած տեղեկություններով, նաև իշխող խմբակցության ներսում: Նիկոլ Փաշինյանի և Հայկ Մարությանի հարաբերությունները խիստ լարված բնույթ ունեն: Ասում են նաև, որ «Իմ քայլ»-ում քննարկվում է քաղաքապետին անվստահություն հայտնելու տարբերակը, սակայն, ռազմական դրության պայմաններում դա հնարավոր չի իրականացնել,- «Փաստինֆո»-ի հետ զրույցում ասել է Երևանի ավագանու «Լույս» խմբակցության ղեկավար Դավիթ Խաժակյանը՝ կարծիք հայտնելով, որ արձակուրդից վերադառնալուց հետո՝ մինչև փետրվար, Հայկ Մարությանը հրաժեշտ կտա պաշտոնին։

«Չնայած վարչապետի և քաղաքապետի միջև առկա խորը տարաձայնությունների հանգամանքին, Հայկ Մարությանն, այնուհանդերձ, փորձում է դիմադրել: Թե ինչպիսի հանգուցալուծում կստանա այս իրավիճակը, մենք կտեսնենք մոտ ապագայում, երբ քաղաքապետը հետ կվերադառնա արձակուրդից, որը նա, իմ ունեցած տեղեկություններով, անցկացնում է Հայաստանից դուրս՝ Չեխիայի Հանրապետությունում»,- նշել է Խաժակյանը:

Անդրադառնալով Մարությանի և Փաշինյանի միջև առկա տարաձայնությունների պատճառներին՝ Դավիթ Խաժակյանը նկատել է՝ ամենայն հավանականությամբ, դրանք ծագել են պատերազմի ողջ ընթացքում քաղաքապետի դրսևորած անտարբեր վերաբերմունքի և, ըստ էության, անհաղորդ պահվածքի հետևանքով: Բացի այդ՝ վերջերս քաղաքապետը սկսել է շատ կտրուկ արտահայտվել իշխանության այս կամ այն ներկայացուցիչների հասցեին, որը նույնպես թիմակիցների ներսում լուրջ հակասությունների տեղիք է տվել. «Այլևս ակնհայտ է, որ քաղաքապետն ամբողջովին ձախողել է իր գործունեությունը: Ակնհայտ է նաև, որ Մարությանի և իր քաղաքական թիմի միջև լուրջ անջրպետ կա: Իշխող մեծամասնությունը նրան պաշտոնում պահելու նպատակ այլևս չի տեսնում: Հետևաբար, այս և մի քանի այլ փաստերի համադրության արդյունքում, ես կանխատեսում եմ, որ քաղաքապետի՝ արձակուրդից վերադառնալուց հետո, վերջինիս հրաժարականի վերաբերյալ ակտիվ զարգացումներ են սպասվելու: Սակայն, ուզում եմ հստակեցնել, որ քաղաքապետի հրաժարականը պայմանավորված է մի քանի այլ հանգամանքներով նույնպես և, միգուցե, նրա առաջիկա հրաժարականն այնքան էլ հարթ չընթանա»:

Խոսելով քաղաքապետի հավանական նոր թեկնածուի մասին, ավագանու «Լույս» խմբակցության ղեկավար Դավիթ Խաժակյանն ընդգծում է՝ չէր ցանկանա շտապել և ժամանակից առաջ ընկնել, այնուամենայնիվ, տրամաբանորեն , քաղաքապետի պաշտոնում Հայկ Մարությանին, ամենայն հավանականությամբ, կփոխարինի նրա առաջին տեղակալ՝ Հրաչյա Սարգսյանը:

Հեղինակ՝ Նվարդ Մանվելյան

Աղբյուր` Փաստինֆո