Փաստ ինֆո

Դուք, թեև գնում էիք Մոսկվա, հայտարարելով, որ առաջնահերթ գերիների վերադարձի հարցն է, բայց որևէ ձեռքբերում այս ուղղությամբ մենք չունեցանք, սա ապացուցում է, որ դուք այլևս ունակ չեք պաշտպանել Հայաստանի շահերը: Ինչու՞ չեք հեռանում՝ հնարավորություն տալով կարող ուժերին գալ և շարունակել բանակցությունները՝ հնարավորինս հայանպաստ ուղղությամբ: ԱԺ-ում հարցուպատասխանի ժամանակ Նիկոլ Փաշինայնին հարց ուղղեց ԼՀԿ քարտուղար Գևորգ Գորգիսյանը:

Նիկոլ Փաշինյանն էլ պարզաբանեց, որ ողջ ընթացքում երբեք ավելի մեծ թվով գերիներ Հայաստան չեն վերադարձվել, քան վերադարձվել են նոյեմբերի 9-ից հետո։

«Երկար տարիներ ամենատարբեր ֆորմատներով եղել են հայ-ադրբեջանական բանակցություններ, ինչու այդ հարցը չի հնչել, որ դուք գնացիք, չկարողացաք գերիներին վերադարձնել, հետևաբար, ինչու հրաժարական չեք տալիս: Ինչու չի հնչել նույն հարցը, որ այ դուք գնացիք բանակցեցիք,Ղարաբաղի հարցը չկարողացաք լուծել, ինչու հրաժարական չեք տալիս»,-արձագանքելով Գորգիսյանին՝ ասաց Փաշինյանը:

«Պետք է հասկանանք՝ մենք ուզում ենք գերիները վերադառնա՞ն, թե՞ ուզում ենք գերիների չվերադառնալու վրա քաղաքական միավորներ շահենք: Կներեք, ես այս ողջ ընթացքում ես չեմ տեսել ընդդիմադիր դաշտից արված որեւէ գործողություն, որն առնվազն չխանգարի գերիների վերադարձին»,-ասաց Նիկոլ Փաշինյանը

Նրա խոսքով՝ թվում է, թե հարց են հնչում ճանապարհի անվտանգությունն ապահովելու համար, բայց իրականում հարց են հնչում էժան քաղաքական միավոր շահելու համար, որի արդյունքում այդ ճանապարհի գործունեության համար ձեւավորվում է շատ կոնկրետ վտանգ.
«7-8 տարի Հայաստանից գերիներ են եղել Ադրբեջանում, բա ինչի՞ չէիք հարցնում այն ժամանակ: Ինչի՞ չեք ասում, որ գերի է եղել, որ 2.5 տարի սոցիալական հարթակներում խոսք էր գնում, որ այս մարդկանց ինչու՞ կառավարությունը չի վերադարձնում: Այդ մարդկանց կառվարությունը վերադարձրել է: Նախկինում երբեք այդ ծավալով գերիների վերադարձ տեղի չի ունեցել»,- ասաց Փաշինյանը.

Անդրադառնալով այն տեսակետին, թե այս իշխանությունն ի վիճակի չէ սպասարկել Հայաստանի շահը, Փաշինյանը պատասխանեց.

«Ես էլ ասում եմ, որ դուք որպես ընդդիմություն առավել ևս ի վիճակի չեք սպասարկել Հայաստանի շահը, որովհետեւ դուք ձեր շեշտադրումներով եւ էժան միավորներ հավաքելու փորձով վտանգի տակ եք դնում գերիների կյանքը, անվտանգությունն ու առողջությունը»:

Գևորգ Գորգիսյանը նկատեց, որ նոյեմբերի 9-ին ստորագրվել է փաստաթուղթ, որով գերիները պետք է վերադարձվեն, սակայն իշխանությունը չի կարողանում իրականացնել ձեռք բերված պայմանավորվածությունը.

«Դուք Ռուսաստան մեկնելիս ասել էիք, որ դա ձեր առաջնահերթությունն է և դրան չեք կարողացել հասնել: Երբ եղել է գերիների հարց, մենք այդ հարցը բարձրացրել ենք: Նախորդ իշխանությունների ձախողումները, բերեցին նրան, որ 2018-ին եղավ հեղափոխություն: Հիմա դուք ուզում եք ձեր ձախողումները ուրիշների ձախողումներով կամ թերացումներով արդարացնե՞լ: Դուք հենց ձեր նշած էժան մանիպուլացիաներով և բալեր հավաքելով փորձելով ռեյտինգ պահել, դեմ եք գնում Հայաստանի շահերին»,-ասաց ԼՀԿ-ական պատգամավորը՝ հավելելով, որ իրենք երբեք գերիների հարցը չեն շահարկել քաղաքական նպատակներով:

Աղբյուր` Փաստինֆո