Փաստ ինֆո

Ինձ առաջադրված մեղադրանքի մեխը՝ 20 օրով արտակարգ դրություն մտցնելն է։ Մոտ մեկ տարի է ապրում ենք՝ կամ արտակարգ դրության կամ ռազմական դրության պայմաններում։ Դատախազներն այստեղ անելիք ունե՞ն, թե ոչ։ Կորոնավիրուսի դեմ պայքարի անվան տակ քանի ամիս պահեցին արտակարգ դրություն, մեկ անգամ դատախազությունն արձագանքե՞ց, սա նորմալ ե՞ք համարում, հարգելի դատախազ։ Այս մասին դատական նիստին ասաց ՀՀ երկրորդ նախագահ Ռոբերտ Քոչարյանը։

«Ուզում եմ հասկանալ՝ հիմա ռազմական դրություն պահելն ինչի համար է պետք։ Ռազմական դրությունը պահելով՝ Շուռնուխում թուրքը գալիս, ասում է՝ էս տները պետք է ազատեք։ Մեր սահմանը պահողը գյուղապետն է՝ իր մի քանի գյուղացիների հետ, պետական հիմնական ֆունկցիան երկրի սահմանները պահելն է, քաղաքացիների անվտանգությունը պահելն է, սահմանադրական կարգն այստե՞ղ է տապալվել, թե մարտի 1-ին»,- նշեց Քոչարյանը՝ հավելելով, որ պետականությունը վարկաբեկվել է։

Նրա խոսքով՝ այս իշխանության հիմնական կարգախոսը եղել է հպարտ քաղաքացիներ, մինչդեռ ավելի նվաստացած քաղաքացիներ Հայաստանը երբեք չի ունեցել, ոչ միայն ՀՀ քաղաքացին, այլ ընդհանրապես հայ աշխարհում։

«Մոսկվայում ամաչում են, չեն կարողանում մի տեղ ռեստորան գնալ, որովհետև ադրբեջանցի են տեսնում, ամոթից մեռնում են, մկան ծակը փնտրում են, որ չերևան։ Այս ամենը սկսվեց նաև այս քրեական գործից և, եթե այսքանը չենք հասկանում, ուրեմն այսպիսի նվաստացված վիճակում մնալու ենք»,- նշեց նա՝ ավելացնելով. «Ինչ վերաբերում է դատախազին, ընդհանրապես տղամարդու կեցվածքի մեջ ինձ համար ամենաանընդունելին այդ լաչառությունն է, գոռգոռալն է։ Բան եմ ասել՝ այո, մտածել եմ, ասել եմ։ Կարող էր ընդմիջման ժամանակ մոտենար, ասեր՝ պարոն նախագահ, ինչու եք այդպես մտածում։ Նորմալ , հանգիստ կզրուցեինք։ Սա ինչ պահվածք էր։ Իմ գլխի մեջ չի տեղավորվում նաև այս աստիճանի պաշտոնյայի այսպիսի պահվածքը։ Դա գիտե՞ք որտեղից է գալիս, որովհետև մենք երկրում ունենք թիվ մեկ լաչառ»։

Մեղադրող դատախազ Գևորգ Բաղդասարյանն էլ անդրադարձավ այս դիտարկմանը՝ նշելով, որ ինքը հարգանքն է արտահայտել Շուշին պահած ցանկացած անձի նկատմամբ, բնականաբար նաև գործով հակառակ կողմում նստած անձանց նկատմամբ, մինչդեռ իր հասցեին վիրավորանք է հնչել, ինչին ինքը պատասխանել է։

«Իսկ ինձ բացատրել, թե ինչու են ինձ նման բան ասել՝ չի կարող լինել, որովհետև ինձ այդպիսի բան ասել չի կարելի։ Կարծում եմ՝ իմ կեցվածքն այստեղ չէ, որ պետք է քննարկվի։ Ես շատ հանգիստ պարզաբանում եմ ակնկալել՝ ինձ նման արտահայտություն անելու վերաբերյալ, ընդ որում՝ տղամարդկային ձևով, բայց չորրորդ անգամ հարցնելուց հետո նոր ստացել պատասխան»,- նշեց նա՝ հավելելով, որ միշտ հանդես է եկել՝ դատարանում միմյանց նկատմամբ հարգալից լինելու օգտին։

Բաղդասարյանը նշեց, որ ինքն այդ հայտարարությանը պատասխանել է ուղղակի, որովհետև իրեն դա «ոչ մի կերպ չի կպչում»։

Նշենք, որ այսօրվա դատական նիստն ընթացել է թեժ մթնոլորտում, մասնավորապես, վիճաբանություն է եղել Գևորգ Բաղդասարյանի և պաշտպանական կողմի միջև։ Մթնոլորտն առավել թեժացել էր, երբ Գևորգ Բաղդասարյանին բացարկ հայտնելու միջնորդության վերաբերյալ առարկություններ ներկայացնելիս վերջինս նշել էր, որ ինքը հարգում է Շուշին պահող բոլորին, սակայն Շուշին պահելու և Շուշին հանձնելու վերաբերյալ հանգամանքներն այս գործի հետ կապ չունեն։ Ռոբերտ Քոչարյանն էլ հայտարարել էր, որ Շուշին հանձնողներից մեկն էլ ինքն է՝ Բաղդասարյանը, ինչի հետևանքով վիճաբանություն է առաջացել։

Նախագահող դատավոր Աննա Դանիբեկյանն արձանագրեց, որ Յուրի Խաչատուրովի և Ռոբերտ Քոչարյանի կողմից անհարգալից վերաբերմունք է դրսևորվել դատարանի նկատմամբ, որը դրսևորվել է մեղադրող դատախազ Գևորգ Բաղդասարյանին վիրավորելով։ Դատարանը դատական սանկցիա կիրառեց Ռոբերտ Քոչարյանի, Յուրի Խաչատուրովի, դատախազ Գևորգ Բաղդասարյանի, նաեւ պաշտպան Արամ Վարդևանյանի նկատմամբ՝ նկատողության տեսքով։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո