Փաստ ինֆո

Զարմացած եմ, որ այսօրվա դատական նիստին նոր մեղադրող ներգրավված չէր։ Ինձ թվաց, որ ՀՀ գլխավոր դատախազի՝ իր կիրթ, համեստ գործընկերոջ հետ հանդիպումից հետո, փոխօգնության շրջանակներում, կարող էր նաև որոշում կայացվել՝ այլ մեղադրող ներգրավելու մասին։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց ՀՀ ԶՈՒ ԳՇ պետ Յուրի խաչատուրովի պաշտպան Միհրան Պողոսյանը։

Պաշտպանի հայտարարությունը «դուր չեկավ» մեղադրող դատախազ Գևորգ Բաղդասարյանին։ Վերջինս հայտարարեց, որ, եթե դատարանը չի արձագանքում սադրիչ և վիրավորական հայտարարություններին, ստիպված է մեղադրող կողմն արձագանքել։

«Եթե պարոն Պողոսյանը պատրաստ է մնալ դատական նիստից հետո և իր հայտնած տեղեկության վերաբերյալ ես իմ դիրքորոշումը նիստից դուրս հայտնեմ, պատրաստ եմ։ Բայց դատական նիստերի դահլիճում խոսում են կա՛մ մեզ ներկայացված բացարկի մասին, կամ չեն խոսում։ Ընդ որում՝ այդ հայտարարություն անողն ընդհանրապես այն սուբյեկտը չէ, որը կարող է այդ հանդիպման մասին խոսել»,- նշեց Բաղդասարյանը։

Նախագահող դատավոր Աննա Դանիբեկյանը պահանջեց՝ զերծ մնալ այնպիսի հայտարարություններից, որոնք կարող են վիրավորական լինել որևէ անձի նկատմամբ։

«Ես ուզում եմ հասկանալ՝ հանդիպելը վիրավորական չէ, բայց այդ հանդիպումների վերաբերյալ բարձրաձայնելը վիրավորակա՞ն է։ Դա էլ հանդիսանում է նաև իմ կողմից ներկայացված դիրքորոշումների մի մասը, որովհետև թշնամի երկրի ղեկավարին իշխանության բարձրագույն ներկայացուցիչն անվանում էր բարեկիրթ»,- նշեց Պողոսյանը՝ հավելելով, որ պարոն Բաղդասարյանը կարող է ցանկացած տեղ պարզաբանել։

Պողոսյանը նշեց, որ իշխանությունների կողմից այս 2.5 տարվա ընթացքում իրագործվող ծրագրին մասնակից են եղել նաև գործով դատախազները և քաղաքական իշխանության կողմից քաղաքական հսկողության ներքո գտնվող գործերով միջամտության փաստը հենց միջամտող անձն է հրապարակել։

«Ես՝ որպես մարդ, որպես փաստաբան շատ մեծ ամոթի զգացում ունեմ այն առումով, որ չկարողացա պահպանել ու պաշտպանել այն պետությունը, որը ժառանգել եմ այստեղ նստած մարդկանցից, այդ պետությունն ունենալու հարցը ժառանգել եմ իմ երեխաներին և այսօր դրա մեղավոր անձն այս դատավարության ընթացքում հրահանգներ է տալիս այս գործով մասնակցող մեղադրողներին։

Պատկերացնում եմ առարկությունների թեման՝ գործով մեղադրողները կարող են հայտնել, որ որևէ հանձնարարություն Նիկոլ Փաշինյանից՝ կապված անձնագրի վերադարձի հետ կապված չեն ստացել»,-նշեց Պողոսյանը՝ Նիկոլ Փաշինյանին անվանելով «գերագույն գլխավոր խաբեբա»։

Նախագահող դատավորը թույլ չտվեց Միհրան Պողոսյանին շարունակել խոսքը։ Միհրան Պողոսյանը պարզաբանում խնդրեց՝ իր խոսքի սահմանափակման վերաբերյալ և հրաժարվեց կարգադրիչին փոխանցել բարձրախոսը։

«Ի՞նչ հիմնավորմամբ է սահմանափակվում իմ խոսքի իրավունքը։ Ես հրաժարվում եմ կատարել Ձեր անօրինական կարգադրությունները»,- նշեց Պողոսյանը։

Մեղադրող դատախազ Գևորգ Բաղդասարյանն էլ միջնորդեց՝ սանկցիա կիրառել պաշտպան Միհրան Պողոսյանի նկատմամբ, քանի որ պաշտպանի ելույթը սահմանափակված է ոչ կոռեկտ վարքագիծ դրսևորելու պատճառով, իսկ պաշտպանը չի ենթարկվում դատարանի օրինական պահանջներին։

Նախագահող դատավորը Միհրան Պողոսյանի նկատմամբ կիրառեց դատական սանկցիա՝ դատարանի կարգադրությունները չկատարելու համար։ Միհրան Պողոսյանն էլ ցանկացավ առարկություն ներկայացնել, սակայն դատարանը թույլ չտվեց։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո